Mateus 26

Ayhudati Yesusa wodhanas maqetida

1,2 Yesusay hessa hasa7i wursidappe guye bena kalizaytas namm7u galasappe guye paziga gididaysa ereti? Assa nay kaqistanas adhi immistana gidees. 3,4 Hessappe guye qesista halaqatinne dere cimmati Qayafa getetiza qessista halaqa gibe gidon shiqidi hiillara Yesusa oythidi wodhisanas maqetida. 5 Gido atin asa garsan oshi dendontamala ba7ale galas gidoppo gidi qachida.

Yesusa shito tiyida macashayo

6 Yesusay Bitaniyan inchiracha hargera diza Simona getetizade son dishin 7 Issi macashi dizara wagay kezi al7o gidida albasxirose getetiza shito issi bilqaxe kumeth oykkada Yesusakko shiqada izi madan utidishin iza hu7e bolla shitoza gusadus. 8 Iza kalizayti hessa beydi haysi aazas mela moretize? 9 Shitozi daro wagas bayzetidi mishay manqotas imetizakoch? gida. 10 Yesusay hessa eridi hano macashayo aazas wayseti? iza tass lo7o othadus. 11 Manqoti wurso wode intenara detees, ta gidikko wurso wode intenara dikke gidees. 12 Iza shitoza ta bolla gusidaysi tana mogos gigidanasa. 13 Ta intess tumu gays haysi wongelay sabaketiza alame yushon awnkka iza othidaysi izo qopisizaz gididi hasa7istana.

Yihuday Yesusa athi immanas gigetidees.

14 Hessappe guye tammane namm7atappe issay Asqorotu Yihuda getetizaysi qesista halaqatakko bidi 15 ta intees iza atha immikko inte tass ay immane? gidees. Istika izas hezu tammu birra iza kushen taybi immida. 16 He galasappe simidi Yihiday Yesusa istas athi immanas giga wode nagishe gam7idees.

Goda ka7o

17 Uketha ba7ale giza ba7ale galas iza kalizayti Yesusakko shiqidi ne paziga manaso awan gigisana mala koyay? gida. 18 Izikka istas zaridi gede katamma bidi ebelo getetiza ass asstamarey ta wodey matida gish tana kalizaytara paziga ta ne kethan bochana gidees gidi yotite gidees. 19 Iza kalizaytikka Yesusay ista azazida mala paziga kawo gigisida. 20 Gadey omarsishin Yesusay tammane nam7atara madan utidees. 21 Isti musan dishin izi istas ta tumu gays intefe issay athi immana gidees. 22 Istika kehi muzetidi taran taran Godo tanesha gida. 23 Izikka zaridi tana athi immanadey keren tanara kushe yedizadekko gidees. 24 Iza gish kasse xafetidaysa mala asa nay baana, gido attin asa na athi immizadees aye anna! he uray yeletonta atidakko izas lo7okoshin 25 Iza athi immana Yihuday "tamarsizayso tanesha?" gides. Izikka Ee ne gida mala, gidees. 26 Isti musan dishin Yesusay miza qummappe ekkidi anjidees. Menthidine bena kalizaytas immidi he7itte miitte, haysi ta ashokko gidees. 27 Qassekka usha denthidi galatidinne bena kalizaytas immidi "wurkka hayssappe uyitte." 28 Daro asa nagarappe marana gukiza ta oratha caqo suthay hayssa.