1 Bulus kwa ɗahavant kiyava nǝg kǝ zǝr ɓǝlga Yesu Kǝristi dǝ naaga Daadamazhigǝl, ard zǝraabamiyam Sastanis. 2 Da vak cauc ma Korinti, lii pǝshavǝtǝran kǝ gata Kǝristi Yesu, dlaɓa ɗahavǝtǝrǝt kiyava nǝg uudahaan cacuwanacacuwana, ǝmtaɗ dǝ lii dzugwazhigǝl baɗǝm aanji takwar ma ɗaaga Yesu Kǝristi Yaazhigǝlamiyama, Yaazhigǝlaatǝra ard dǝgamiyam baɗǝmma. 3 Hɛrǝrra ard gabǝr vak Daadamazhigǝl Daadamiyam ard Yaazhigǝl Yesu Kǝristi da vakaruwa.

4 Ən tagar uus kǝ Daadamazhigǝl ba kǝlaa hǝnng kwakyarvad kurama, aɗaba hɛrǝrrǝn vǝlakur nǝ iin tǝdvad Kǝristi Yesu. 5 Aɗaba aanji takwar kǝ ghyaba vǝlakurvǝlǝg nǝ uud kǝ hyahǝr ma iina, tǝdvad taa ghaiya ard sǝrgasǝrgǝr baɗǝmma. 6 Bandkwa favǝdǝghǝrǝt shidamnd tǝghǝr kǝ Kǝristi ma taatakaruwa. 7 Mbakyarvad kwaha, hǝtsakurvaa bi tlǝkǝna aanji hulfa kwar kǝ gyaan kwa tlǝvǝkǝna tǝdvad Shǝɗkwa, ma sartǝn am fa gyi nǝ uuram am paka saaya Yaazhigǝlamiyam Yesu Kǝristi. 8 Da fǝkurnaafǝg Yaazhigǝlamiyam kǝ ndzǝɗ ba tanngw da tǝ ghaalaana, aɗaba am da nal kǝ lii maay dǝ haip ma sartǝn da saay Yaazhigǝlamiyam Yesu Kǝristi biya. 9 Daadamazhigǝl dadda righa langyi nǝ iina, Iin wa ɗahakurǝt kiyava ndzǝgana hwǝɗɗir ǝmtaɗ dǝ Zǝraan Yesu Kǝristi Yaazhigǝlamiyama.

10 Ən ghala kurama, zaraabahara, mbakyarvad ɗaaga Yaazhigǝl Yesu Kǝristi, taakiya, aa ndzandzǝg ghaiyaru ba vak palla, aandz maay tagwazhatagwazh ma taatakaru biya, bamma am dzant kǝ ghǝraru vak palla, ndzamandzǝg ba tǝ dǝgit palla, dzamaghǝraru ndakwani aandz ba vak palla. 11 Zaraabahara, tagarwatag lii ma hǝnnyaha Kuluwi taakiya, mǝnng mbaɗa ghai ma taatakaruwa. 12 Dǝgiti ǝn tlatlǝg naiya, iin taakiya, ma kwararuwa taa dǝgaan shaha, kwan taakiya, "Ən dǝga Bulus naiya," kwan taakiya, "Ən dǝga Afulus naiya," kwan taakiya "Ən dǝga Kefasa," kwan dlaɓ taakiya, "Ən dǝga Kǝristi naiya." 13 Mbats tagwavǝmtagw Kǝristi shahshaha? Əmtsaaǝmtsǝg Bulus tǝ tlaɓa hǝrtǝg kwakyarvad kurama? Nii ɓagakura dǝ ɗaaga Bulus ha nǝ uud kǝ tsuufǝgi? 14 Ən tagar uus kǝ Daadamazhigǝl ɓaganara bi aanji war ma kuram kǝ tsuufǝg biya, ba Kirisbus ard Gayusa. 15 Mbakyarvad kwaha, maay wa tagdatag taakiya ɓagakura dǝ ɗaagar nǝ uud kǝ tsuufǝg biya. 16 Dzamannadzamǝg dlaɓa, ɓagantǝraɓag kǝ tsuufǝg kǝ yaha Istafanusa, ma juujig ba kǝ yaha Istafanusa maay nǝ uudahi tlǝrǝn ɓagantǝra nai biya. 17 Ɓǝlakut bi Yesu mbakyarvad tsuufǝg biya, ɓǝlakut mbakyarvad taa ǝlbǝg marawa, ba kwal ɓa tlǝr dǝ dabariya ard mǝɗmǝɗa ghaiya. Aɗaba aa da hǝtsal bi nǝghǝga ndzǝɗa ǝmtsǝga Yesu tǝ tlaɓa hǝrtǝg biya.

18 Əlbǝga tlaɓa hǝrtǝga, ǝlbǝga dlagǝr nǝ iin vak lii gata ɗuula ruuga, amma vaka miyamǝn katakiyamǝtkatǝg nǝ uudna, ǝlbǝga tlaɓa hǝrtǝg ndzǝɗa Daadamazhigǝla. 19 Aɗaba vindavavindǝg ma Kakkaɗa Daadamazhigǝl taakiya, "Ən da badzǝgaan kǝ dabariya lii dǝ dabariya. Ən da nǝdal kǝ ɗyamɗyama lii ɗyamɗyam kǝ dlagǝra"

20 Aitsaa, ar mǝr yaa dadda dabariyi? Ar mǝr lii tsaga adzahadzaha Muusi? Ar mǝr lii taakiya ar sǝrgasǝrǝg kǝ dǝgitah baɗǝmmi? Mbats marada bi Daadamazhigǝl taakiya, dabariya lii dǝ dabariya kwan kǝ duuni ba dlagǝr nǝ iin biya? 21 Aɗaba tǝdvad dabariya Daadamazhigǝla, uudaha duuni ar sǝrga bi kǝ Daadamazhigǝl tǝdvad dabariyatǝr biya. Cinngucinng Daadamazhigǝl kǝ ǝmtakǝr tǝdvad dlagǝra ǝlbǝg maraw tagavdan kiyava kata lii fardǝghǝrǝtfǝga. 22 Yahudah ar naa maa marvǝtǝrda dǝga sǝrga, Helenaha dlaɓa ar gata dǝga dabariya. 23 Amma kǝmnd kǝm taa ǝlbǝg marawa Kǝristi kwa ǝmtsaa tǝ tlaɓa hǝrtǝga, kwa nal kǝ ɗuula mbǝɗǝg kǝ Yahudaha, dlaɓa dǝga dlagǝr vak lii ar Yahudah biya. 24 Kiyava lii ɗahatǝrǝt Daadamazhigǝla, Yahudaha ard lii Yahudah biya, Kǝristi ndzǝɗa Daadamazhigǝl ard dabariya Daadamazhigǝla. 25 Aɗaba dlagǝra Daadamazhigǝl juujig dǝ ɗyamɗyam kǝ dabariya uuda dǝgshiga, dlaɓa hǝtsǝgalhǝtsǝga Daadamazhigǝl juujig dǝ ndzǝɗ kǝ ndzǝɗa uuda.

26 Zaraabaha, dzamamnadzamǝg kǝ ndzǝganaru ma sartǝn ɗahakurt Daadamazhigǝla, ndza ba hǝɗikǝn ma kuram wa dǝ dabari ma zharǝg nǝ uudaha, ndza ba hǝɗikǝn lii dzǝgadzǝga nǝ ahyapaatǝr ma kurama, dlaɓa ndza ba hǝɗikǝn lii zarha uud maamaala. 27 Amma kǝsǝghaakakǝsǝg Daadamazhigǝl kǝ dǝgitahi dlagǝr vak duuniya, kiyava tsǝtǝr zhǝru kǝ lii dǝ dabariya, kǝsǝghaakakǝsǝg Daadamazhigǝl kǝ dǝgitahi maay dǝ ndzǝɗ ma duuniya, kiyava tsǝtǝr zhǝru kǝ lii dǝ ndzǝɗ ma duuniya. 28 Kǝsghantkǝsǝg Daadamazhigǝl kǝ dǝgitahi maay dǝ zhǝru ma duuni biya, ard dǝ dǝgitahi nenenanena, ard dǝgitahi maay paiɗaan biya. Kǝsǝghaaka mbakyarvad kǝlda Daadamazhigǝl kǝ dzaara dǝgitahaan kwa zharǝg duuni bandgi mǝnng tlǝrana. 29 Bagaaɓag Daadamazhigǝl kwanahaan baɗǝm haik kǝ tsa kusǝgh kǝ uuda dǝgshig tǝvuukwa Daadamazhigǝla. 30 Daadamazhigǝl wa faafǝg kwa namal nǝ uuram kǝ dǝga Kǝristi Yesu, Daadamazhigǝl dlaɓ wa haighanthaig kǝ Kǝristi nal kǝ dabariyamiyama. Tlǝyamkǝna tǝdvad iin nǝmiyam kǝ ndzǝgana kalkal tǝvuukwa Daadamazhigǝl kǝ pǝshiga ard varga. 31 Mbakyarvad kwaha, band kwa vindavidan ma Kakaɗa Daadamazhigǝl taakiya, "Baɗǝm dadda tsa kusǝgha aa tsǝg tǝ Yaazhigǝla."