1 Abeet GODAWU!

Nu bolla gakkidayssa ne qoppa;

nu kawushshateththaka xeella.

2 Nu biitta allagati laattida;

nu keeththaaka

baas duussaso ooththida.

3 Nuni yi7o gididos;

nu aayeti am7eta gidida.

4 Nuni nu haaththa

miishshan shammi uyidos;

nuni nu miththaaka

shammi ekkidos.

5 Nuna gooddizayti

nuus geedon eqqida;

keehippe daaburdos;

shempoka digettidos.

6 Nuni kath kallanaas giidi

Asoore asatassinne

Gibxes kushe immidos.

7 Nu aawati nagara ooththida;

nuni istta qixaate ekkidos.

8 Aylleti nuna haarida;

istta kusheppe nuna kessi

ekkanay oonikka deenna.

9 Bazzon diza ola gaason

nuni nu shemppo

aaththi immidi kath demmidos.

10 Kosha daroppe

dendidayssan hargidos;

nu medhaykka

shaala mala gidides.

11 Maccassata Xiyoonen tunisida;

geela7otakka Yuhuda katamatan

wolqqan oykki kawushshida.

12 Daannata istti kaqqida;

cimatakka bonchchibeettenna.

13 Yelaga attuma nayti

woxan gaaccana mala

wolqqaththida;

panththati deexo mith

tookkidi gadigadida.

14 Cimati pirdanaas

uttiza dubbusha aggida;

panththatikka

bantta mazamure aggida.

15 Ufayssi nu wozinappe dhaydes;

nu durissika

yeehon laamettides.

16 Kallachchay nu hu7eppe kundides;

nu nagara ooththida gishshas

aayye ana!

17 Hessa gaason

nu wozinay daaburdes;

nu ayfeykka baljumides.

18 Xiyoone biittay bula gidida gishshas

worakanati guppizasoho gidides.

19 Abeet GODAWU!

Neni mernaas haaraasa;

ne kawoteththay yeletappe

yeleta gakkanaas daana.

20 Ne nuna ays ubba wode

co7u gay?

qasse ays

hayssa gakkanaas aggaagadii?

21 GODAWU! Neni nuna neekko zaara;

nunikka neekko simmana!

beni nu bonchchoza zaarada

nuna ooraththa!

22 Ne hessaththo ooththontta aggiko

nuna mulera aggadii?

ne hanqozaska zaway baawee?