Marcos 11

Gita Bonchchora Yesusi Yerusalaame Buus

1 Istti gede Yerusalaamen Dabrazayte geetettiza zuma achchan diza Betefaagenne Bitaaniya geetettizaso matida wode Yesusi bana kaallizaytappe nam7ata, 2 «Gede intte sinththan diza gutayo biite. Intte he gelida mala heen asi toggi erontta qashon diza hare gutte intte demmana; birshidi iza haa ekki yiite. 3 Oonikka inttena, ‹Hayssa ays ooththeetii?› giikko Godaas koshshees giidi yootite; izikka inttes eeson zaari yeddana» gi kiittides.

4 Isttika biidi issi keeththa karen oge bolla qashetti diza hare gutte demmidi birshida. 5 Heen eqqida issi issi asati, «Hare gutteza aazas birsheetii?» gi oychchida.

6 Yesusa kaallizayti Yesusi isttas gida mala asatas yootiin ero ekki biite gida. 7 Guttezakka Yesusaakko ehidi ba may7o iza zokko bolla yeggiin Yesusi iza toggides. 8 Daro asay ba may7o kessi kessi oge bolla miccides. Bagga asay cilila miththa hayth qanxxi qanxxidi oge bolla laallides. 9 Yesusappe sinththaranne guyera diza asay qaala dhoqqu histtidi,

«Hoosa7inna;

Godaa sunththan

yizaadey anjjettidaade.

10 Hanna yizaara nu aawaa

Dawite kawoteththaya

anjjettidaaro;

hoosa7inna!

Bolla salon

Xoossi bonchchetto»

gishe waassides.

11 Yesusi Yerusalaame gakkidi hessafekka Xoossa Keeththe gelides. He heeran dizayssa ubbaa xeellidi gadey qammida gishshas tammanne nam7atara gede Bitaaniya kezides.