1 ಯೇಸುನಿ ತುಮ್ಚಿ ಮನ ಕಳ್ವಳು ನಾಹಿತ. ದೇವಾವ ಆನಿ ಮಾಜಿವಬಿ ಇಸ್ವಾಸ್ ಥೆವಾ. 2 ಮಾಜಾ ಬಾಚಾ ಗರ‍್ಹಾತ್ ಖುಬ್ ಖೊಲ್ಯಾ ಹಾತ್ತ ಆಸ ನಸ್‌ಲ್ಯಾವ ಮಿ ತುಮ್ಚಿ ಸಾಟಿ ಜಾ಼ಗಾ ತಯಾರ್ ಕರಾಯಾ ತಿಥ ಜಾ಼ತ್ಯೊ ಮನ್ಹುನ್ ಸಾಂಗಿತ್ ನವ್ಥೊ. 3 ಮಿ ತಮ್ಚಿ ಸಾಟಿ ಜಾ಼ಗಾ ತಯಾರ್ ಕರುನ್ ಜಾ಼ಲ್ಯಾವ, ಮಾಗಾರಾ ಯವುನ್ ಮಾಜಿ ಸಂಗ ತುಮಾನಾ ನೆಥೊ. ಆಸಿ ಮಿ ರಾಹಿನ್ ತಿಥ ತುಮಿಬಿ ರಾನ್ಹಾರ್. 4 ಮಿ ಜಾ಼ತ್ಯಾಲ್ಯಾ ಜಾ಼ಗ್ಯಾಚಿ ವಾಟ್ ತುಮಾನಾ ಠಾವಿ ಹಾ ಮನ್ಹುನ್ ಸಾಂಗ್ತೊ.

5 ತೊಮಾನಿ ಯೇಸುಲಾ ಇಚಾರ್ಲ, "ಪ್ರಭು ತು ಜಾ಼ಯಾಚಾ಼ ಕುಠ ತ್ಯೊ ಆಮಾನಾ ಠಾವಾ ನಾಹಿ ಆಸ ಆಸ್ಥಾನಾ ತೀ ವಾಟ್ ಆಮಾನಾ ಠಾವಿ ಹಾ ಮನ್ಹುನ್ ಕಸಿ ಸಾಂಗ್ನಾರ್"

6 ಯೇಸುನಿ ಸಾಂಗ್ಲ, "ಮೀಸ್ ಮಾರೊಗ್, ಖರಾ, ಜೀವ್, ಜಾ಼ಲ್ಯೊ. ಬಾಪ ಮಾಜಿ ಸಂಗ ಸುಡುನ್ ದಿಸರ‍್ಯಾ ಕುನಾಸಂಗ ಜಾ಼ಯಾ ವ್ಹಯಿತ್ ನಾಹಿ. 7 ಯೆಕ್ ಯಳಿ ತುಮಿ ಮನಾ ಖರ‍್ಯಾನಿಸ್ ಸಮ್‍ಜು಼ನ್ ಗೆತ್ಲಾ ಆಸ್ತಾಸಾತ ಮಾಜಾ ಬಾಲಾಬಿ ಶಾರ್ಕಾ ಸಮ್‍ಜು಼ನ್ ಗೆತ್ಲಾ ಆಸ್ಥಾಸಾ. ಫನ್ ಆತಾ ತುಮಿ ತ್ಯಲಾ ಸಮ್‍ಜು಼ನ್ ಗೆತಲ್ಯಾಸಾ ಆನಿ ಬಗ್‌ಲ್ಯಾಸಾ.

" 8 ಫಿಲಿಪ್ಪಾನಿ ಯೇಸುಲಾ ಸಾಂಗ್ಲ, "ಪ್ರಭು ಆಮಾನಾ ಬಾಲಾ ದ್ಯಾವ್ ತ್ಯವ್ಡಸ್ ಪುರೊ. "

9 ಯೇಸುನಿ ಉತ್ತರ್ ದಿಲಾ, "ಫಿಲಿಪ್ಪಾ ಮಿ ಯವ್ಡ ದೀಸ್ ತುಜೆ ಸಂಗ ರಾಯ್ಲೊ ತರಿ ತು ಮನಾ ಸಮ್‍ಜು಼ನ್ ಗೆತ್ಲ ನಾಹಿಸ್ ಕ್ಯಾ? ಮನಾ ಬಗ್‌ಲ್ಯಾಲ್ಯಾನಿ ಬಾಲಾಬಿ ಬಗ್‌ಲ್ಯಾ ಮನ್ಹುನ್ ಬಾಲಾ ಆಮಾನಾ ದ್ಯಾವ್ ಮನ್ಹುನ್ ಕಾ ಇಚಾರ್ತಾಸಾ? 10 ಮಿ ಬಾಪ ಹಾ ಆನಿ ಬಾ ಮಾಜಿಪ ಹಾ ಮನ್ಹುನ್ ತುಮಿ ಇಸ್ವಾಸ್ ಥೆವ್ನಾರ್ ನಾಹಿಸಾ ಕ್ಯಾ? ಮಿ ಸಾಂಗ್‌ತ್ಯಾಲ್ಯಾ ಬೊಲ್ಯಾ ಮಾಜಾ ನವ್ಹತಾ ಮಾಜಿಪ ಆಸ್‌ಲ್ಯಾಲ್ಯಾ ಬಾಚಾ ಜಾ಼ಲ್ಯಾತಾ. 11 ಮಿ ಬಾಪ ಹಾ ಆನಿ ಬಾ ಮಾಜಿಪ ಹಾ ಮಂಥ್ಯಾಲೆ ಮಾಜೆ ಬುಲಿವ ಇಸ್ವಾಸ್ ಥೆವಾ ನಾಹಿತ ಮಿ ಸಾಕ್ಷಿ ಸಾಟಿ ಕೆಲ್ಯಾಲ್ಯಾ ಚಮತ್ಕಾರಾಚಿ ಕಾಮ ತರಿ ಬಗುನ್ ಮಾಜಿವ ಇಸ್ವಾಸ್ ಥೆವಾ 12 ಮಿ ತುಮಾನಾ ಖರ ಸಾಂಗ್ತೊ ಮಾಜಿವ ಇಸ್ವಾಸ್ ಥೆವ್‍ತ್ಯಾಲಾ ಮಾನುಸ್ ಮಿ ಕೆಲ್ಯಾಲಿ ಕಾಮ ಕರ್ನಾರ್ ತ್ಯೊ ಮಿ ಕೆಲ್ಯಾಲ್ಯಾ ಕಾಮಾವ್ನಿ ಮುಟಿ ಕಾಮ ಕರ್ನಾರ್ ಕಾ ಮಂಜೆ ಮಿ ಬಾಪ ಜಾ಼ತ್ಯೊ. 13 ತುಮಿ ಮಾಜಾ ನಾವಾನಿ ಕ್ಯಾ ಮಾಗ್ಲಸಾ ತರಿ ಮಿ ತ್ಯ ಕರ್ನಾರ್ ಹ್ಯಚಿಸ್ ಲಾಗುನ್ ಲ್ಯೊಕ್ ಬಾಲಾ ಮೈಮಾ ಆನ್ನಾರ್. 14 ತುಮಿ ಮಾಜಾ ನಾವಾನಿ ಕಾಯೇಕ್ ಮಾಗ್ಲಸಾ ತರಿ ಮಿ ತ್ಯ ಕರ್ನಾರ್.

15 ಜ಼ರ್ ತುಮಿ ಮಾಜಿ ಮಾಯಾ ಕರ್ತ್ಯಾಲ ಜಾ಼ಲ್ಹಾಸಾತ ಮಾಜಿ ಆಜ್ಞೆ ಪ್ಯಾಳ್ಸಿಲಾ. 16 ಮಿ ಬಾಪ ಮಾಗ್ತೊ ತವಾ ತ್ಯೊ ದುಸ್ರಾ ಮಜ಼ತ್ ಕರ್ತ್ಯಾಲ್ಯಾಲಾ ತುಮಾನಾ ದೇನಾರ್ ತ್ಯೊ ಮಜ಼ತ್ ಕರ್ತ್ಯಾಲಾ ಶಾಶ್ವತ್ ತುಮ್ಚೆ ಸಂಗ ರಾನ್ಹಾರ್ 17 ಖರ‍್ಯಾಚ಼ ಆತ್ಮಸ್ ತ್ಯೊ ಮಜ಼ತ್ ಕರ್ತ್ಯಾಲಾ ಹೆ ದುನೆನಿ ತ್ಯಲಾ ಬಗ್ಲಾನಾಹಿ ಆನಿ ಸಮ್‍ಜು಼ನ್ ಗೆತ್ಲಾನಾಹಿ. ಫನ್ ತುಮಾನಾ ತ್ಯೊ ಸಮಾಜ಼ಲ್ಯಾ ಮನ್ಹುನ್ ತ್ಯೊ ತುಮ್ಚಿ ಸಂಗ ಆನಿ ತುಮ್ಚೆ ಆತುಸ್ ರಾನ್ಹಾರ್.

18 ಮಿ ತುಮಾನಾ ಆಯಿ ಬಾ ನಸ್‌ಲ್ಯಾಲ್ಯಾ ಪೊರಾಂಚಿಗತ್ ಪರದೆಶಿ ಸುಡುನ್ ಜಾ಼ಯಿತ್ನಾಹಿ. ಮಿ ತುಮ್ಚಿಪ ಯತೊ 19 ಆನಿ ಥೊಡ ದೀಸ್ ಜಾ಼ಲ್ಯಾ ನಂತರ್ ಹೆ ದುನೆತ್ಲಿ ಲೊಕ ಮನಾ ಹಿತ್ನಿ ಮೊರ‍್ಹ ಬಗ್ನಾರ್ ನಾಹಿತ. ಫನ್ ತುಮಿ ಮನಾ ಬಗ್ನಾರ್. ಕಾ ಮಂಜೆ ಮಿ ಜಿತ್ತಾ ಹಾ ಮನ್ಹುನ್ ತುಮಿ ಜಿತ್ತಿ ರಾನ್ಹಾರ್. 20 ತೆ ದಿಸಿ ಮಿ ಮಾಜಾ ಬಾಪ ಆಸ್‌ಲ್ಯಾಲಾ ಆನಿ ತುಮಿ ಮಾಜಿಪ ಆಸ್‌ಲ್ಯಾಲಿ ಮಿ ತುಮ್ಚಿಪ ಆಸ್‌ಲ್ಯಾಲಾ ಸಮಜು಼ನ್ ಗೆನ್ಹಾರ್.

21 ಯಕಾನಿ ಮಾಜಾ ಆಜ್ಞೆ ಹು ಮನ್ಹುನ್ ತ್ಯಂಚಿಗತ್ ಚಾ಼ಲ್ಲಾತ ತ್ಯನಿ ಮಾಜಿ ಖರ‍್ಯಾನಿಸ್ ಮಾಯಾ ಕಿಲಿ, ಕೊನ್ ಮಾಜಿ ಮಾಯಾ ಕರ್ತೊ. ತ್ಯಚಿ ಮಾಜಾ಼ ಬಾ ಮಾಯಾ ಕರ್ತೊ. ಆನಿ ಮಿ ತ್ಯಚಿ ಮಾಯಾ ಕರ್ತೊ. ಮಿ ತ್ಯಲಾ ಮನಾಸ್ ದಾವುನ್ ದೇತೊ ಮನ್ಹು‍ನ್ ಉತ್ತರ್ ದಿಲಾ.

22 ತವಾ ಯುದ್ ಹ್ಯೊ ಇಸ್ಕರಿತ್ ಯುದ್ ನವ್ಹ, "ಫನ್ ಪ್ರಭು ತು ತುಲಾ ಹೆ ದುನೆಲಾ ದಾವುನ್ ದಿಯಾಚೆ ಆಂದಿ ಆಮಾನಾ ತ್ಯವ್ಡಸ್ ದಾವುನ್ ದಿಯಾಚ಼ ಕಾ? ಮನ್ಹುನ್ ಇಚಾರ್ಲ.

23 ಯೇಸುನಿ ಆಸಾ ಉತ್ತರ್ ದಿಲಾ. ಮಾಜಿ ಮಾಯಾ ಕರ್ತ್ಯಾಲಾ ಮಿ ಸಿಕಿವ್‌ಲ್ಯಾ ಶಾರ್ಕ ಚಾ಼ಲ್ತೊ ಮಾಜಾ಼ ಬಾಬಿ ತ್ಯಚಿ ಮಾಯಾ ಕರ್ತೊ. ಆಮಿ ದೊಗ ಯವುನ್ ತ್ಯಚಿಪ ರಾಥಾವ್ 24 ಫನ್ ಮಾಜಿ ಮಾಯಾ ಕರೀತ್ ನಸ್ನಾರಾ ಮಿ ಸಿಕಿವ್‌ಲ್ಯಾ ಶಾರ್ಕಾ ಚಾ಼ಲತ್ ನಾಹಿ. ತುಮಿ ಐಕ್‌ತ್ಯಾಲ ಹ್ಯ ಸಿಕ್ಷನ್ ಖರ‍್ಯಾನಿಸ್ ಮಾಜ಼ ನವ್ಹ. ಮನಾ ಲಾವುನ್ ದಿಲ್ಯಾಲ್ಯಾ ಮಾಜಾ ಬಾಚ಼

25 ಮಿ ತುಮ್ಚಿಪ ಆಸ್ಥಾನಾ ಹ್ಯಾ ಸಗ್‌ಳ್ಯಾ ಖನ್ಕತಿ ತುಮಾನಾ ಸಾಂಗ್‌ಲ್ಯಾ. 26 ಫನ್ ತ್ಯೊ ಮಜ಼ತ್ ಕರ್ತ್ಯಾಲಾ, ತುಮನಾ ಸಗ್ಳ ಸಿಕಿವ್ನಾರ್ ಆನಿ ಸಾಂಗ್ನಾರ್ ಮಿ ತುಮಾನಾ ಸಾಂಗ್‌ಲ್ಯಾಲ್ಯಾ ಖನ್ಕತಿ ತ್ಯೊ ಮಜ಼ತ್ ಕರ್ತ್ಯಾಲಾ ತುಮ್ಚೆ ಯದತ್ ಆನ್ನಾರ್ ಬಾ ಮಾಜಾ ನಾವಾನಿ ಲಾವುನ್ ದೇತ್ಯಾಲ ಪವಿತ್ರಾತ್ಮಸ್ ತ್ಯ ಮಜ಼ತ್ ಕರ್ತ್ಯಾಲ.

27 ಮಿ ಸಮಾದಾನ್ ತುಮ್ಚಿ ಸಂಗ ಶೊಡ್ತೊ. ಮಾಜಾ಼ ಸಮಾದಾನ್ ತುಮಾನಾ ದೆತೊ. ಹಿ ದುನ್ಯಾ ದೇತ್ಯಾ ಶಾರ್ಕಿ ನವ್ಹ. ತುಮ್ಚಿ ಮನ ಕಳ್ವಳು ನಸುಂತ ತುಮಿ ಬಿಹುನಕೊಸಾ. 28 ಮಿ ನಿಗುನ್ ಜಾ಼ತೊ ಖರ ಪರ್ತುನ್ ಮಾಗಾರಾ ಯನಾರ್ ಮನ್ಹುನ್ ಮಿ ಸಾಂಗ್‍ಲ್ಯಾಲ ತುಮಿ ಐಕ್ಲಸಾ ತುಮಿ ಮಾಜಿ ಮಾಯಾ ಕರ್ತ್ಯಾಲ ಜಾ಼ಲಾಸಾತ ಮಿ ಬಾಪ ಪರ್ತುನ್ ಜಾ಼ಯಾಚೆ ಖನ್ಕತಿತ್ ಸಂತೊಶ್ ವ್ಹಯಿತಾಸಾ ಕಾಮಂಜೆ ಬಾ ಮಾಜಿವ್ನಿ ಥೊರ‍್ಲಾ ಹಾ. 29 ಹ್ಯ ವ್ಹಯಾಚೆ ಆಂದಿ ಮಿ ತುಮಾನಾ ಸಾಂಗ್‌ಲ್ಯಾ. ಆಸ ಆಸ್ಥಾನಾ ಹ್ಯ ವ್ಹತಾನಾ ತುಮಿ ಇಸ್ವಾಸ್ ಥೆವ್ನಾರ್ 30 ಮಿ ತುಮ್ಚಿ ಸಂಗ ಆನಿ ಖುಬ್ ಯೊಳ್ ಬೊಲತ್ ನಾಹಿ ಹೆ ದುನೆಚಾ಼ ಅಧಿಕಾರಿ ಯತ್ಯೊ. ತ್ಯಲಾ ಮಾಜಿವ ಕಾಯೇಕ್ ಹುಕುಮ್ ನಾಹಿ. 31 ಫನ್ ಮಿ ಬಾಚಿ ಮಾಯಾ ಕರ್ತ್ಯೊ ಆನಿ ತ್ಯ ಮಿ ಮಾಜಾ ಬಾಚೆ ಆಜ್ಞೆ ಶಾರ್ಕ ಕರ್ತ್ಯೊ ಮನ್ಹುನ್ ದುನೆಲಾ ಸಮ್‍ಜಾ಼ಯಾ ವ್ಹಯಿ.

ಯವಾ ಆಮಿ ಹಿತ್ನಿ ಜಾ಼ವುಯಾ.