ಯೊಹಾನ್ 20

ಮಗ್ದಲಾಚೆ ಮರಿಯಾಲಾ ಯೇಸುಚ಼ ದರ್ಶಾನ್

11 ಫನ್ ಮರಿಯಾ ರಡತ್ ಮಸುರ್ಡಿಚೆ ಬಾಹಿರ್ ಉಬಿ ಹುತ್ತಿ. ತಿನಿ ರಡತ್ ರಡತ್ ಮಸುರ್ಡಿತ್ ವಾಕುನ್ ಬಗ್ಲ. 12 ತವಾ ಪಾಂಡ್ರ ಕಪ್ಡ ಗ್ಯಾತ್‌ಲ್ಯಾಲ್ಯಾ ದೊಗಾ ದೇವ್ದುತಾನಾ ಬಗ್ತಿ ಯೇಸುಚ಼ ಮಡ ಥೆವ್‌ಲ್ಯಾಲಾ ಜಾ಼ಗಾ ತ್ಯಾತ್ಲಾ ಯೊಕ್ ಯೇಸುಚೆ ಡುಯಿಪ ಆನಿಯೊಕ್ ಪಾಯಾಕ್ಡ ಬಸ್ಲಾ ಹುತ್ತಾ. 13 ದೇವ್ ಧೂತ್ ಮರಿಯಾಲಾ ಬಾಯಿ ಕಾ ರಡ್ತೇಸ್ ಮನ್ಹುನ್ ಇಚಾರ್ತ್ಯಾತ.

ಮರಿಯಾ ಮಾಜಾ ಪ್ರಭುಚ಼ ಮಡ ಥುಡಿ ಲೊಕ ಗಿಹುನ್ ಗೇಲ್ಯಾತ ತ್ಯಂಚಾನಿ ತ್ಯಲಾ ಕುಠ ಥೆವ್‌ಲ್ಯಾ ಮನಾ ಠಾವಾ ನಾಹಿ. ಮನ್ಹುನ್ ಉತ್ತರ್ ದೀತಿ.

14 ಮರಿಯಾ ಆಸಸ್ ಸಾಂಗುನ್ ಮಾಗಾರಿ ಪರಾತಿ ತವಾ ತಿಥಸ್ ಯೇಸು ಉಬಾ ರಾಯ್‌ಲ್ಯಾಲಾ ಬಗ್ತಿ ಫನ್ ತ್ಯೊ ಯೇಸು ಮನ್ಹುನ್ ತಿಲಾ ಠಾವಾ ನವ್ಥಾ.

15 ಯೇಸುನಿ ತೀಲಾ ಬಾಯಿ ಕಾ ರಡ್ತೇಸ್ ತು ಕುನಾಲಾ ಶೊತೇಸ್ ಮನ್ಹುನ್ ಇಚಾರ್ಲ. ತ್ಯೊ ಬಾಗ್ ರ‍್ಯಾಕ್‌ತ್ಯಾಲಾ ಆಸಲ್ ಮನ್ಹುನ್ ಮರಿಯಾನಿ ಯವಜು಼ನ್ ತ್ಯಲಾ, ಬಾಬಾ ತು ಯೇಸುಲಾ ಗಿಹುನ್ ಗೇಲ್ಯಾಸ್ ಕ್ಯಾ? ತ್ಯಲಾ ಕುಠ ಥೆವ್‌ಲ್ಯಾಸ್ ಮನಾ ಸಾಂಗ್ ಮಿ ಜಾ಼ವುನ್ ತ್ಯಲಾ ಬಗ್ತೆ ಮಂತಿ.

16 ಯೇಸು ತಿಲಾ ಮರಿಯಾ ಮನ್ಲಾ ಮರಿಯಾ ತ್ಯಚಿಕ್ಡ ಪರ್ತುನ್ ಇಬ್ರಿಯಾ ಬಾಶೆತ್ ರಬ್ಬಿ ಮನ್ಲಿ ರಬ್ಬಿ ಮಂಜೆ ಗುರು.

17 ಯೇಸುನಿ ತಿಲಾ ಮನಾ ಹಾತ್ ಲಾವು ನಕೊಸ್ ಮಿ ಬಾಪ ಆಜು಼ನ್ ಮಾಗಾರಾ ಗೇಲೊ ನಾಹಿ ಫನ್ ತು ಮಾಜಾ ಬಾವ್ಹಾನಾ ಜಾ಼ವುನ್ ಮಾಜಾ಼ ಬಾ ತುಮಚಾ಼ ಬಾ಼ ಮಾಜಾ಼ ದೇವ್ ತುಮಚಾ಼ ದೇವ್ ಜಾ಼ಲ್ಯಾಲ್ಯಾಪ ಮಿ ಮಾಗಾರಾ ಜಾ಼ತ್ಯೊ ಮನ್ಹುನ್ ಸಾಂಗ್ ಮನ್ಲಾ.

18 ಮಗ್ದಲಾಚಿ ಮರಿಯಾ ಶಿಶಾಂಚಿಪ್ನಿ ಜಾ಼ವುನ್ ಮಿ ಪ್ರಭುಲಾ ಬಗ್ಲ ಮನ್ಹುನ್ ಸಾಂಗ್ತಿ ಆನಿ ಯೇಸುನಿ ಸಾಂಗ್‌ಲ್ಯಾಲ್ಯಾ ಗುಶ್ಟಿ ತೀ ತ್ಯನಾ ಸಾಂಗ್ತಿ.