ಕುರುಬುರ್ ಆನಿ ದೇವ್ ಧುತ್
8 ತೇ ರಾತಿ ಥೊಡ ಕುರುಬುರ್ ಗಾವಾತಲ್ಯಾ ಸೇತಾತ್ನಿ ರಾಹುನ್ ಆಪ್ಲಾ ಮೆಂಡ್ರಾಂಚಾ಼ ಹಿಂಡ್ ರಾಖಿತ. 9 ಪ್ರಭುಚಾ಼ ಯೊಕ್ ಧುತ್ ಯವುನ್ ತ್ಯಂಚೆ ಮೊರ‍್ಹ ಉಬಾ ರಾಯ್ಲಾ. ಪ್ರಭುಚಾ಼ ಉಜಿಡ್ ತ್ಯಂಚೆ ಸರ್ಬೌಥ ಪಡ್ಲಾ; ತೇ ಖುಬ್ ಬಿಹ್ಯಾಲ್ಹ. 10 ತ್ಯಾ ಧುತಾನಿ ತ್ಯನಾ ಬಿಹುನಕೊಸಾ, ಐಕಾ ಲೊಕಾನಾ ಸಂತೊಶ್ ಆಂತ್ಯಾಲಾ ಚಾ಼ಂಗ್ಲ ಸಮಾಚಾರ್ ಮಿ ತುಮಾನಾ ಸಾಂಗ್ತೊ. 11 ತ್ಯ ಕ್ಯಾ ಮನ್‌ಲ್ಯಾವ, ಹೆ ಯಳಿ ತುಮ್ಚೆಸಾಟಿ ದಾವಿದಾಚಾ ಗಾವಾತ್ ಯೊಕ್ ರಾಖ್ನಿ ಜ಼ಲಾಮ್‌ಲ್ಯಾ, ತ್ಯೊ ಪ್ರಭು ಜಾ಼ಲ್ಯಾಲಾ ಯೇಸು ಕ್ರಿಸ್ತ ಹಾ. 12 ತ್ಯ ತುಮಾನಾ ಠಾವಾ ವ್ಹಯಾ ವಳಕ್ ಕ್ಯಾ ಮನ್‌ಲ್ಯಾವ ಕಪ್‌ಡ್ಯಾನಿ ಗುತ್ಪಳ್ಯಾಲ ಯಾಕ್ ಮುಲ್ ಅಡ್ಗಳಿತ್ ನಿಜಿವ್‌ಲ್ಯಾಲ ಬಕ್ಸಿಲಾ. ಮನ್ಹುನ್ ಸಾಂಗ್ಲ.
13 ಪಾಕ್ಕನ್ ತ್ಯಾ ದುತಾ ಸಂಗ ಪರಲೊಕ್ ಸೈನ್ಯಾಚಾ಼ ಯೊಕ್ ಮೊಟಾ ಹಿಂಡ್ ಯವುನ್ ಆಂದಿಚಾ ದೇವ್ದುತಾ ಬರ್ಬರ್ ಮಿಳುನ್ ದೇವಾಲಾ ಸ್ತುತಿ ಕೆಲಿ
14 ವೈಲ್ಯಾ ದುನಿಯಾತ್ ದೇವಾಲಾ ಮಹಿಮೆ;
ಭುಲೊಕಾತ್ ಮಾನ್ಚಾಮದಿ ಸಮಾದಾನಾ ದೇವ್ ತ್ಯನಾ ಪಾವನ್ ವ್ಹನಾರ್
ಮನ್ಹುನ್ ದೇವಾಲಾ ಉಪ್ಕಾರ್ ಸಾಂಗ್ಲ.