ಮಾರ್ಕ್ 2

ಯೇಸುನಿ ಪಾರ್ಶಿ ಮ್ಯಾರ್ಲ್ಯಾಲ್ಯಾಲಾ ಬರ ಕೆಲ್ಯಾಲ

1 ಥೋಡ್ಯಾ ದಿಸಾ ನಂತರ್ ಯೇಸು ಕಪೆರ್ನೌಮತ್ ಪರ್ತುನ್ ಆಲಾ. ಗರ‍್ಹಾತ್ ಹಾ ಮನ್ಹುನ್ ಸುದ್ದಿ ಪಗಾಳ್ಳಿ. 2 ತವಾ ಖುಬ್ ಲೊಕ ಜ಼ಮುನ್ ಆಲಿತ ಮನ್ಹುನ್ ದಾರಾಚೆ ಕಡಸ್ ಬೀ ಜಾ಼ಗಾ ರಾಯ್ಲ ನಾಹಿ. ಯೇಸು ಲೊಕಾನಾ ದೇವಾಚಿ಼ ವಚ್ನ ಸಾಂಗಿತ್ ಹುತ್ತಾ. 3 ತ್ಯವ್‌ಡ್ಯಾತ್ ಯಕಾ ಪಾರ್ಶಿಚಾ ರೊಗಿಲಾ ಚಾರ್ ಜ಼ನಾಂಚಾನಿ ಉಚ್ಲು಼ನ್ ತಿಥ ಆನ್ಲಾ 4 ಲೊಕ ಖುಬ್ ಜ಼ಮ್ಲಿಹುತ್ತಿತ ಮನ್ಹುನ್ ತ್ಯಲಾ ಯೇಸುಚೆ ಜ಼ವಳ ನಿಹ್ಯಾ ಜಾ಼ಲಾ ನಾಹಿ ಮನ್ಹುನ್ ಯೇಸು ಬಸ್‌ಲ್ಯಾಲ್ಯಾ ಗರಾಚೆ ವೈಲಾ ಥಾಟ್ ಕಾಡುನ್ ವೈನಿ ಹಾತ್ರುನಾಸಾಹಿತ್ ತ್ಯಾ ರೊಗಿಲಾ ಯೇಸುಪ ಉತರ್ಲಾ. 5 ಯೇಸುನಿ ತ್ಯಂಚಾ಼ ಇಸ್ವಾಸ್ ಬಗುನ್ ತ್ಯಾ ರೊಗಿಲಾ "ಲೇಕಾ ತುಜಾ ಪಾಪಾಂಚಿ ಮಾಪಿ ಜಾ಼ಲಿ ಮನ್ಲಾ. "

6 ಫನ್ ಥೋಡಜಾ಼ನ್ ದರ್ಮ ಸಿಕಿವ್‌ತ್ಯಾಲ ಶಾನ ತಿಥ ಬಸುನ್ 7 "ಹ್ಯೊ ಕಾ ಆಸಾ ಬೊಲ್ತೊ ಹ್ಯನಿ ದೇವಾಲಾ ಅವ್ಮಾನ್ ವ್ಹತೊ ದೇವಾಲಾ ಸುಡುನ್ ಆನಿ ಕುನಾಲಾ ಪಾಪ ಮಾಪ್ ಕರಾಯಾ ವ್ಹಯಿತ್ನಾಹಿ? ಮನ್ಹುನ್ ಆಪ್‍ಲ್ಯಾ ಆಪ್‍ಲ್ಯಾ ಮನಾತ್ ಮನ್ಹಿತ್ ಹುತ್ತ.

8 ತ್ಯ ಯೇಸುನಿ ತವಾಸ್ ಆಪ್‍ಲ್ಯಾ ಆತ್‌ಮ್ಯಾತ್ ಸಮಜು಼ನ್ "ತುಮಿ ತುಮ್ಚಾ ಮನಾತ್ ಕಾ ಆಸ್ಲ ಯವಸ್ತಾಸಾ? 9 ಕಚ಼ ಸಲ್ಪ; ತುಜ಼ ಪಾಪ್ ಮಾಪ್ ಜಾ಼ಲ ಮನ್ಹಾಚ಼ ಕ್ಯಾ ಉಠುನ್ ತುಜ಼ ಹಾತ್ರುನ್ ಗಿವುನ್ ಜಾ಼ ಮನ್ಹಾಚ಼? 10 ಫನ್ ಪಾಪ್ ಮಾಪಿ ಕರಾಯಾ ಮಾನ್ಸಾಚಾ ಲೇಕಾಲಾ ದರ್ಥಿವ ಹಾಕ್ ಹಾ ಮನ್ಹುನ್ ತುಮಾನಾ ಸಮಜಾ಼ಯಾ ಪಾಯ್ಜೆ" ಮನ್ಹುನ್ ತ್ಯಾ ಪಾರ್ಶಿವಾಯಿ ರೊಗಿಲಾ ಬಗುನ್ 11 "ಉಠುನ್ ತುಜ಼ ಹಾತ್ರುನ್ ಗಿವುನ್ ಗರ‍್ಹಾತ್ ಜಾ಼" ಮನ್ಲಾ.

12 ತ್ಯೊ ತವಾಸ್ ಉಠುನ್ ಆಪ್ಲ ಹಾತ್ರುನ್ ಗಿವುನ್ ಸಗ್‌ಳ್ಯಾಂಚೆ ಮದ್ನಿ ಗೆಲಾ. ತ್ಯ ಬಗುನ್ ಸಗ್ಳಿ ಗಾಬಾರ್ಲಿತ ಆಜು಼ನ್ ಪರ‍್ಯಾತ್ ಆಮಿ ಆಸ್ಲ ಕವಾಸ್ ಬಗ್ಲ ನಾಹಿ. ಮನ್ಹಿತ್ ದೇವಾಲಾ ಸ್ತುತಿ ಕರುನ್ ತ್ಯಚ಼ ನಾವ್ ಗ್ಯಾವ್ಲ.