Mateus 26

ಯೇಸುನಿ ಗೆತ್ಸೆಮನೆತ್ ಮಾಗ್ನ ಕೆಲ್ಯಾಲ

36 ಮಂಗ್ ಯೇಸು ಆಪ್‌ಲ್ಯಾ ಶಿಶಾಂಚೆ ಸಂಗ ಗೆತ್ಸೆಮನೆ ಮಂಥ್ಯಾಲ್ಯಾ ಜಾ಼ಗ್ಯಾವ ಗೆಲಾ. ಯೇಸುನಿ ಆಪ್‌ಲ್ಯಾ ಶಿಶಾನಾ ಮಿ ತಿಥ ಜಾ಼ವುನ್ ಮಾಗ್ನ ಕರುನ್ ಯಯಿಪರತ್ ಹಿತ್ತಸ್ ರಾವ್ಹಾ ಮನ್ಹುನ್ ಸಾಂಗ್ಲ. 37 ಯೇಸು ಪೇತ್ರಾಲಾ ಆನಿ ಜೆಬೆದಾಯಾಚಾ ದೊಗಾ ಪ್ಯೊರ್‌ಗ್ಯಾನಾ ಆಪ್ಲಿ ಸಂಗ ಗಿಹುನ್ ಗೆಲಾ. ತವಾ ಯೇಸುಚಾ ಮನಾಲಾ ಖುಬ್ ದುಕ್ ವ್ಹವುನ್ 38 ತ್ಯನಾ, "ಮಾಜಾ ಮನಾಲಾ ಖುಬ್ ದುಕ್ ಜ಼ಾಲ್ಯಾ. ಮಾಜ಼ ಮನ್ ದುಖಾನಿ ಮರ ಶಾರ್ಕಿ ಜಾ಼ಲ್ಯಾ. ತುಮಿ ಮಾಜಿ ಸಂಗ ಹಿತ್ತಸ್ ಜಾ಼ಗ ರಾವ್ಹಾ ಮನ್ಲಾ.

39 ಮಂಗ್ ಯೇಸು ತ್ಯಂಚಿಪ್ನಿ ಥೊಡಾ ದುರ್ ಜಾ಼ವುನ್ ಜಿಮ್ನಿವ ಆಡ್ವಾ ಪಡುನ್ ಮಾಜಾ ಬಾ ಜಾ಼ಲತ ತರಾಸಾಚ಼ ಹ್ಯ ಐದಾನ್ ಮನಾ ದಿವು ನಕೊ. ಫನ್ ಮಾಜಾ ಮನಾ ಶಾರ್ಕ ನವ್ಹ ತುಜಾ ಮನಾ ಶಾರ್ಕಸ್ ಕರ್ ಮನ್ಹುನ್ ಮಾಗ್ನ ಕೆಲ

40 ಮಂಗ್ ಯೇಸು ಆಪ್‌ಲ್ಯಾ ಶಿಶಾಂಚಿಕ್ಡ ಮಾಗಾರಾ ಪರಾತ್ಲಾ. ತೇ ನಿಸ್‌ತ್ಯಾಲ ಬಗುನ್ ತ್ಯನಿ, "ತುಮಾನಾ ಮಾಜಿಸಂಗ ಯೇಕ್ ತಾಸ್ ತರಿ ಜಾ಼ಗ ರಾಹ್ಯಾ ವ್ಹಯಿತ್ನಾಹಿ ಕ್ಯಾ? 41 ತುಮಿ ಪರಿಕ್ಷೆತ್ ಗಾವುನಾಹಿಸಾ ಮನ್ಹುನ್ ಜಾ಼ಗ ರಾಹುನ್ ಮಾಗ್ನ ಕರಾ. ಮನ್ ಶಾರ್ಕ ಹಾ ಫನ್ ಆಂಗಾಲಾ ಬಳ್ ಪುರೊ ವ್ಹಯಿನಾ" ಮನ್ಹುನ್ ಸಾಂಗ್ಲ.

42 ಯೇಸು ದೊನ್ವೆ ಪಾವ್ಟಿ ಥೊಡಾ ದುರ್ ಜಾ಼ವುನ್ ಮಾಗ್ನ ಕರೀತ್ ಮಾಜಾ ಬಾ ತರಾಸಾಚ಼ ಹ್ಯ ಐದಾನ್ ಮಾಜಿಪ್ನಿ ಕಾಡುನ್ ಗಿಹ್ಯಾ ವ್ಹಯಿತ್ನಾಹಿತ ಆನಿ ಮಿ ತ್ಯ ಕರಾಲಾಸ್ ವ್ಹಯಿ ಮನ್ಲಾಸ್ತ ತುಜಾ ಮನಾ ಶಾರ್ಕಸ್ ವ್ಹವುನಿ ಮನ್ಲಾ.

43 ಮಂಗ್ ಯೇಸು ಆಪ್‌ಲ್ಯಾ ಶಿಶಾಂಚಿಕ್ಡ ಮಾಗಾರಾ ಪರಾತ್ಲಾ ತವಾ ತೇ ಆನಿ ನಿಜ಼ಲ್ಯಾಲ ಬಗ್ಲ. ತ್ಯಂಚ಼ ಡೊಳ ಪೆಂಗಾನಿ ಬರ್ಲ ಹುತ್ತ. 44 ಮನ್ಹುನ್ ಯೇಸುನಿ ಆನಿಯಂಗ್ದಾ ತ್ಯನಾ ಸುಡುನ್ ಥೊಡಾ ದುರ್ ಜಾ಼ವುನ್ ತಿನ್ವೆ ಪಾವ್ಟಿ ತಸಸ್ ಮಾಗ್ನ ಕೆಲ.

45 ಮಂಗ್ ಯೇಸು ಆಪ್‌ಲ್ಯಾ ಶಿಶಾಂಚಿಕ್ಡ ಪರ್ತುನ್, "ತುಮಿ ಆನಿಕ್ ನಿಜ಼ತ್ ಆರಾಮ್ ಗೇಥ್ಯಾಸಾ ಕ್ಯಾ? ಪಾಪಿ ಜಾ಼ಲ್ಯಾಲ್ಯಾ ಲೊಕಾಂಚಿಪ ಮಾನ್ಸಾಚಾ ಲೇಕಾಲಾ ದಿಯಾಚಾ಼ ಯೊಳ್ ಜ಼ವಳ್ ಆಲಾ. 46 ಆಮಿ ಜಾ಼ಯಾ ವ್ಹಯಿ. ಉಠಾ! ಮನಾ ವಾದಿಪ್ನಿ ದೇತ್ಯಾಲಾ ಮಾನುಸ್ ಹಿತ್ತಸ್ ಯಯಾಲಾಗ್‌ಲ್ಯಾ" ಮನ್ಹುನ್ ಸಾಂಗ್ಲ.