ರೋಮಾಪುರಾತ್‌ಲ್ಯಾನಾ 4:17-21

17 ಮೀ ತುಲಾ ಖುಬ್ ಲೊಕಾನಾ ಆತ್ಮಿಕ್ ಬಾ ಕೆಲ್ಯಾ. ಮನ್ಹುನ್ ಪವಿತ್ರ ಗ್ರಂಥಾತ್ ಲಿವ್‌ಲ್ಯಾ ಹ್ಯ ದೇವಾಚೆ ಮೊರ‍್ಹ ಖರ ಜಾ಼ಲ್ಯಾ ಮೇಲ್ಯಾಲ್ಯಾನಾ ಜೀವ್ ದೇನಾರಾ ಆಜು಼ನ್ ಗಡ್‌ಲ್ಯಾ ನಸ್‌ಲ್ಯಾಲಿ ಕಾಮ ಕರ್ನಾರಾ ಜಾ಼ಲ್ಯಾಲ್ಯಾ ದೇವಾವ ಅಬ್ರಾಹಾಮಾನಿ ಇಸ್ವಾಸ್ ಥೆವ್ಲಾ. 18 ಅಬ್ರಾಹಾಮಾಲಾ ಪೊರ ವ್ಹತಿಲ ಮನ್ಹುನ್ ಇಸ್ವಾಸ್ ನವ್ಥಾ. ಫನ್ ತ್ಯೊ ದೇವಾವ ಇಸ್ವಾಸ್ ಥಿವುನ್ ಆಪ್ಲೆ ಆಶೆನಿ ಮೊರ‍್ಹ ಸರ್ಲಾ. ತ್ಯಾಸ್ ಕಾರ್ನಾನಿ ತ್ಯೊ ಖುಬ್ ದೆಶೆನಾ ಆತ್ಮಿಕ್ ಬಾ ಜಾ಼ಲ್ಹಾ. ದೇವ್ ತ್ಯಲಾ ತು ಖುಬ್ ಲೊಕಾನಾ ಗೆನಾರ್" ಪವಿತ್ರ ಗ್ರಂಥಾತ್ ತುಜಿ ಪಿಳ್ಗಿ ಆಬ್ಳಾತ್‌ಲ್ಯಾ ಚಾನ್ಯಾಂಚೆಗತ್ ರಾನಾರ್ ಮನ್ಹುನ್ ಪವಿತ್ರ ಗ್ರಂಥ ಸಾಂಗ್ತ. 19 ಅಬ್ರಾಹಾಮಾಲಾ ಜ಼ವ ಜ಼ವಳ್ ಶೆಂಬರ್ ವರ್ಸ ಜಾ಼ಲ್ಥಿತ. ತವಾ ತ್ಯಚ಼ ಶರಿರ್ ಬಳ್ ನಸ್‌ಲ್ಯಾಲ ಜಾ಼ಲ್ಥ. ಮನ್ಹುನ್ ತ್ಯಲಾ ಪೊರ ವ್ಹತಿಲ ಆಶಿ ಆಶಾ ನವ್ತಿ. ನಾಹಿತ ಸಾರಾಳಾಲಾ ಸಾಹಿತ್ ಪೊರ ವ್ಹಯಿತಿಲ ಮನ್ಹುನ್ ಆಶಾ ನವ್ತಿ. ಫನ್ ದೇವಾವ ಆಸಲ್ಯಾಲಾ ತ್ಯಚಾ಼ ಇಸ್ವಾಸ್ ಕಮ್ಮಿ ಜಾ಼ಲ್ಹಾ ನಾಹಿ. 20 ದೇವಾನಿ ದಿಲ್ಯಾಲ್ಯಾ ಸಬ್ದಾಚೆ ಗುಶ್ಟಿತ್ ತ್ಯಲಾ ಸಂಶೆವ್ ಆಲಾ ನಾಹಿ. ಆನಿ ಆಪ್ಲಾ ಇಸ್ವಾಸ್ ನಾಹಿ ಕೆಲಾನಾಹಿ. ತ್ಯಚಾ ಇಸ್ವಾಸಾನಿಸ್ ತ್ಯಲಾ ಬಳ್ ದಿಲ ಆನಿ ದೇವಾಲಾ ಸ್ತೊತ್ರ ಕಿಲಿತ. 21 ದೇವಾನಿ ಆಪ್ನು ದಿಲ್ಯಾಲಾ ಸಬ್ದ ಖರ‍್ಯಾನಿಸ್ ಚಾ಼ಲಿವ್ನಾರ್ ಮನ್ಹುನ್ ಆಬ್ರಾಹಾಮಾನಿ ಘಟ್ ಇಸ್ವಾಸ್ ಥೆವ್ಲಾ.