1 जब दंगो थमी गयो ते पौलुस ने विश्वासीहोन खे बुलैइ खे होसलो, बडायो अरु बिदा हुइ खे मकिदुनी का तरफ चली दियो. 2 उ पुरा प्रदेश मे से हुइ खे अरु चेलाहोन खे भोत आनन्द करी खे उ अखाया मे आयो. 3 जब तीन महीना र्‍हि खे उ वहा से डोंगा पर सीरिया का तरफ जाना पर थो, ते यहूदीया दुन्या ओकी विरोध मे शाजिस लगैइ र्‍हा था, येका लिये ओने ठानी लियो कि मकिदुनी हुइ खे लौटी जायु. 4 बिरीया को पुरुर्स इन्सान को बेटो सोपत्रुस अरु थिस्सलुनीखे किहोन मे से अरिस्तर्खुस अरु सिकुन्दुस अरु दिरबे को गयुस, अरु आसिया प्रात को तुखिकुस अरु त्रुफिमुस आसिया तक तीमुथियुस ओका साथ हुइ गा. 5 पर वे आगे जैखे त्रोआस मे हमारी प्रतीक्षा करता र्‍हिये. 6 अरु अखमीरी रोटी का दिन बाद फिलिप्पी से डोगा पर चड खे पाच दिन मे त्रोआस मे उनका पास पहुच्या, अरु सात दिन तक व्हापर र्‍हिया.

7 हप्ता का पैयला दिन जब हम रोटी तोडन का लिये जमा हुया, तो पौलुस ने जो दुसरा दिन चली जाना पर थो, उनसे बातहोन करी खे अरु आधी रात तक शिक्षा देता र्‍हियो. 8 जो उपर की खोली मे हम जमा था, ओमे भोत दिवो जली दिया र्‍हा था. 9 यूतुखुस अरु नाम को खिडकी पर बैठ्यो हुयो गैरी नीद से झुकी र्‍हो थो, अरु जब पौलुस देर तक बातहोन करतो र्‍हियो ते उ नीद का झकोलामे तीसरा माली पर से गिरी पड्यो, अरु मर्यो हुयो उठी गयो. 10 पन पौलुस उतरी खे ओकासे लिपटी गयो, अरु गलो लगी खे बोल्यो, "घबरानु नी. क्युकि ओको जान ओमे हइ."

11 अरु उपर जैखे रोटी तोडी अरु खैइ खे येत्ती देर तक उनसे बातहोन करतो र्‍हियो कि भोर हुइ गइ. फिर उ चली गयो. 12 अरु वे उ जवान खे जिन्दो ली आयो, अरु भोत शांती पाइ.

13 हम पैयले से डोंगा पर चडी खे अस्सुस को यो बिचार से आगे गया, कि वहा से हम पौलुस खे चड्यै लिये क्युकि ओने यो येकालिए ठैरायो थो, कि खुद ही पइदल जानआला थो. 14 जब उ अस्सुस मे हम खे मील्यो ते हम ओखे चड्यै, मीतुलेने मे आया. 15 अरु वहा से डोंगा खोली खे हम दूसरा दिन खियुस का सामने पहुच्या, अरु दुसरा दिन सामेस मे जा पहुच्या, फिर दूसरा दिन मीलेतुस मे आया. 16 क्युकि पौलुस ने इफिसुस का पास से हुइ खे जाना की ठान्यो थो, कि कही असो नी हुये कि ओखे आसिया मे देर लग्ये. क्युकि उ जल्दी मे थो, कि अगर हुइ सक्येका ते उ पिन्तेकुस्त का दिन यरुशलेम मे र्‍हियो.

17 अरु ओने मीलेतुस से इफिसुस मे बुलाओ भेज्यो, अरु मंडली का बुजरुक खे बुलायो. 18 जब वे ओका पास आया, ते उनसे बोल्यो,

तुम जानस हइ, कि पैयला ही दिन से जब मी आसिया मे पहुच्यो, मी हर टेम मे तुम्हारा साथ कोनता प्रकार र्‍हियो. 19 यानी बडी दीनता से, अरु आसू बह्ये-बह्ये खे अरु उ परीक्षाहोन मे जो यहूदीयाहोन कि साजिस करण जो मरा पर अय पडी. मी प्रभु की सेवा करतो ही र्‍हियो. 20 अरु जो-जो बातहोन तुम्हारा लोभ की थी, उनखे बतानु अरु दुन्या का सामने अरु घर-घर सिखाना से कभी नी झिझकनु. 21 क्युकी यहूदीयाहोन अरु यूनानीहोन खे चेतावनी देतो र्‍हियो कि परमेश्‍वर का तरफ मन फिराव, अरु हमारो प्रभु यीशु मसीह पर विश्वास करणु.

22 अरु अब, मी आत्मा मे बध्यो हुयो यरुशलेम का जउस हइ, अरु नी जानतो, कि वहा मरा पर का बीत्ये. 23 फक्त यो कि पवित्र आत्मा हर नगर मे गवाही दि-दि खे मरासे बोलस हइ कि बन्धन अरु क्लेश तरा लिये तैयार हइ. 24 पन मी अपनो जा खे कुछ नी समझु कि ओखे प्रिय जानू, क्युकी यो कि मी अपनी दौड, अरु वा सेवा खे पूरी कर्यु, जो मेने परमेश्‍वर का अनुग्रह को सुसमाचार पर गवाही देन का लिये प्रभु यीशु से पायो हइ.

25 अरु अब मी जानुस हइ, कि तुम सब जेमे मी परमेश्‍व का राज्य को प्रचार करतो फिर्यो, मरो मुडो फिर नी देख्ये. 26 येका लिए मी आज का दिन तुम से गवाही दि खे बोलुस हइ, कि मी सब का खुन से नीर्दोष हइ. 27 क्युकि मी परमेश्वर की पुरी योझना खे तुम्ह खे पूरी रीति से बताना से नी झिझक्यो. 28 येका लिए अपनी अरु पूरा झुण्ड की देख-रेख करणु. जेमे पवित्र आत्मा ने तुम्ह खे मुखियो ठैराया हइ कि तुम परमेश्वर की मंडली की रखवाली करणु, जेका से ओने अपना खुन से मोल लियो हइ. 29 मी जानुस हइ, कि मरा जाना का बाद फाडनआला मेढाहोन तुम मे अयखे जो झुण्ड खे नी छोड्ये. 30 तुम्हारा ही बीच मे से भी असा-असा इन्सान उठ्येका जो चेलाहोन के अपना पीछे खीची लेन कि टेडी-मेडी बातहोन बोल्ये. 31 येका लिए जागते र्‍हेनु, अरु याद करणु कि मेने तीन साल तक रात दिन आसू बोह्ये-बोह्ये खे हर एक खे सिखायो.

32 "अरु अब मी तुम्ह खे परमेश्‍वर के अरु ओका अनुग्रह को सोपी देस हइ तुम उन्नती करी सकस हइ अरु तुम परमेश्वर कि दुन्या का साथ पुरी आशिष दिल्ये सकस हइ. 33 मेने कोय खे चादी, सोन्ना या कपडा को लालुच नी कर्यो.✝20:33 1 शमुवेल 12:3 34 तुम खुद ही जानस हइ कि यइ हाथहोन ने मरी अरु मरा साथिहोन की जरुरतहोन पूरी करी. 35 मेने तुम्ह खे सब कुछ करी खे दिखायो, कि या रीति से मेहनत करता हुये नीर्बलहोन खे सम्भालनो, अरु प्रभु यीशु की बातहोन याद रखन जरुरी हइ, कि ओने खुद ही बोल्यो हइ लेना से देनो अच्छो हइ."

36 यो बोलि ओने घुटना टेक्या अरु उन सब का साथ प्रार्थना करी. 37 तब वे सब भोत अरु पौलुस का गल्लो मिलीखे ओखे चूमन लग्या. 38 वे विशेष करीस या बात को शोक करता था, जो ओने बोली थी कि तुम मरो मुडो फिर नी देख्ये का अरु उनने ओखे डोंगा तक पहुचायो.