1 येका बाद व्हा नगर नगर अरु गाव गाव प्रचार करते हुयो अरु प्रभु को राज की सुसमाचार सुनाते हुयो फिरन लग्यो 2 अरु वे बारा वोका सात था अरु केतनी बयहोन भी जो बुरीआत्माहोन से अरु बीमारीहोन से छुडाये गया थो अरु वे यो हइ मरियम जो मगदलीनी बोली थी जोमे से सात बुरीआत्‍माहोन नीकली थी 3 अरु हेरोदेस, भण्‍डारी खुजा की बायको योहन्‍ना अरु सूसन्‍नाह अरु खुप सी अरु बयहोन ये तो अपनी धन से वो की सेवा करती थी

4 तब बडी गर्दी जमा हुय अरु गाव गाव का दुन्या वोका पास चली आता था, ते वो ने दृष्‍टान्‍त मे बोल्योस:

5 कि एक बोन आलो बीज बोन नीकल्यो भोते हुयो कुछ रस्ता का किनार गिर्यो. अरु खोद्यो गयो. अरु बद्दल का पक्षिहोन ने वोखे चुनी लियो. 6 अरु कुछ फतर पर गिर्यो. अरु वुग्यो. पन पानी नी मीलना से सूखी गया 7 कुछ झाडि का बीच मे गिर्यो. अरु झाडि का सात सात बडीखे वोखे दबय दियो. 8 अरु कुछ अच्छी जमीन पर गिर्यो.अरु वुगी खे सौव गुणा फल आया ह्या बोलीखे

वो ने वुचा आवाज से बोल्यो. जेका सुनन खे कान हुये वे सुनी ले.

9 ओका सेवक ने यीशु से "यो दृष्‍टान्‍त को मतलब पुछ्यो का हइ?" 10 यीशु ने बोल्यो, "तुम खे परमेश्वर को राज का रहस्यो को पडय तुम दुन्या खे दि गय हइ. पन दुसरा खे फक्त दृष्‍टान्‍त मील्हे. जोका से वे देखी खे भी नी देख्या अरु नी सुनीखे भी नी समज्या."

11 "दृष्‍टान्‍त को मतलब यो हइ बीज तो परमेश्वर को वचन हइ." 12 रस्ता का किनार का गिर्या हुया बीज वे दुन्या हइ. जिनने सुन्‍यो. तब सैतान अयखे उनका मन मे से वचन उठय ली जास हय. कि खय असो नी होनु कि वे विश्वास करीखे उध्दार मील्हे. 13 चट्टान पर का वे हइ. कि जब सुनय हइ. ते खुशी से वचन खे स्वीकार करस हइ. पन जडी नी पकडना से वे थोडी देर तक विश्वास रखस हइ. अरु परीक्षा खे टेम भैइकी जास हइ. 14 जो झाडिहोन मे गिर्यो. यो वे हइ. जो सुनस हइ. पर आगे चली खे चिन्ता अरु दौलत अरु जिवन खे सुख-विलास मे फसी जास हइ. अरु उनको फल नी मील्हे. 15 पर अच्छी जमीन मे का वे हइ. जो वचन सुनीखे अच्छो अरु अच्छो मन मे सम्भाल्हे र्‍हेस हइ. अरु रुखी खे फल लास हइ.

16 "कोय भी दिवो खे जलय खे नी ते ओखे बर्तन से झाकस हइ अरु नी ओखे खटीया का नीचे रखता आस हय पन ओखे दीव्वा पर रखस हइ कि घर मे आन खेनी पन दुन्या देखी सख्ये."

17 कुछ लुक्योस नी. जो प्रगट नी होय. अरु नी कुछ लुक्यो हइ. जो जान्यो नी जाह्ये. अरु प्रगट नी होय.

18 येका लिये चतरो र्‍हे कि तुम कोय रीति से सुनस हुये? क्युकी जेका पास हइ. ओखे दियो जाह्ये. अरु जेका पास नी हइ. ओकासे उ भी ली लियो जाह्ये. जेखे उ अपनो समझस हइ.

19 ओकी माय अरु ओको भैइ नजीक आयो. पर गर्दी का कारण ओकासे मीली नी सक्या. 20 अरु ओकासे बोल्यो गयो. "तरी माय अरु तरो भैइ बाहेर खडो हुयो तरा से मीलनो चाहस हइ."

21 यीशु ने ओखे उत्तर मे उनसे बोल्यो. "मरी माय अरु मरो भैइ ये य हइ. जो परमेश्वर को वचन सुनस अरु मानस हइ."

22 फिर एक दिन वे अरु ओका सेवक डोंगा पर चेढ्या. अरु ओने उनका से बोल्यो. "आ. नद्दी का पार चल." येका लिये उनने डोगो खोली दीयो. 23 पर जब डोगो चली रोथो. ते व्हा सोय गयो अरु नद्दी पर आधी अय. अरु डोंगा मे पानी से भरन लग्यो अरु वे आपत मे था. 24 तब उनने नजीक अयखे ओखे जगायो. अरु बोल्यो.

"गुरुजी! हम नाश हुया जास हइ." तब ओने उठीखे आधी खे अरु पानी की लाट खे धमकय अरु वे रुखी गयो. अरु चुप हुय गयो. 25 अरु उनने उनका से बोल्यो. "तुम्हारो विश्वास खा थो?" पर वे डरी गया.

अरु अचम्बो हुयखे आपस मे बोलन लग्या. "यो कोन आय. जो आधी अरु पानी खे भी आज्ञा देस हइ. अरु वे ओकी बात मानस हइ?"

26 फिर वे गिरासेनीयहोन का देस मे पहुच्या. जो वा पार गलील का सामने हइ. 27 जब व्हा किनार पर उतर्‍यो ते जमीन उ नगर को एक इन्सान ओखे मील्यो. जोमे बुरीआत्मा थी. अरु भोत दिन से कपडा नी पेनतो थो अरु नी घर मे र्‍हेतो थो क्युकी मरगट मे र्‍हे तो थो. 28 वहा यीशु खे देखी खे चिल्लायो. अरु ओका सामने गिरीखे बडा आवाज से बोल्यो. "हे परमप्रधान परमेश्वर को बेटो यीशु! मेखे तरा से काम? मी तुम्हारा से प्रार्थना करुस हय. मेखे दुख नी देनु." 29 क्युकी व्हा उस बुरी आत्मा खे उ इन्सान मे से नीकलन की आज्ञा दि रा था. येका लिये कि व्हा ओका पर घडी घडी प्रबल होती थी. अरु अगर दुन्या ओखे हतकडी मे अरु साकल से बाधता था. ते भी व्हा बाधी आला खे को तोडी डालतो थो. अरु बुरीआत्मा ओखे जंगल मे भगायो फिरता था.

30 यीशु ने ओकासे पूछा. "तरो का नाम हइ?"

ओने बोल्यो. "सेना." क्युकी खुप बुरीआत्माहोन ओमे टेम मे गइ थी. 31 अरु उनने ओकासे प्रार्थना की. "हमखे यानेकी गड्डा मे जान की आज्ञा नी दे."

32 व्हा टेकडा पर डुक्कर को एक बडो धन चरी रोथो. अरु उनने ओकासे प्रार्थना करी. "हमखे उनका सामने दे." अरु ओने उनखे जान दियो. 33 तब बुरीआत्माहोन उ इन्सान से नीकलीखे डुक्कर मे समा गय अरु उ धन पर से झपटी नद्दी मे जय गिर्‍यो अरु डूबी मर्‍यो.

34 चरानआलो यो जो हुयो थो देखीखे भाग्हे. अरु नगर मे. अरु गावहोन मे जयखे ओको खबर बोल्यो. 35 अरु दुन्या यो जो हुयो थो ओखे देखन खे निकाले. खे अरु यीशु का नजीक अय खे जो इन्सान से बुरीआत्माहोन नीकली थी. ओखे यीशु का पास कपडा पेन्या अरु सचेत बठयो हुयो मील्यो ते वे डरी गया. 36 अरु देखनवाला ने उनखे बतायो. कि व्हा बुरीआत्मा का सताया हुया इन्सान कोय रंग अच्छा हुया. 37 तब गिरासेनीयहोन का नजीक पास का सब दुन्या ने यीशु से प्रार्थना करी. कि हमारा ह्या से जय जा. क्युकी उनका पर बडो डर हुय गयो थो. अरु व्हा डोंगा पर चडीखे वापीस गया. 38 जो इन्सान से बुरीआत्माहोन नीकली थी व्हा ओकासे प्रार्थना करण लग्यो.

कि मेखे अपना साथ र्‍हेन दे. पन यीशु ने ओखे बिदा करीखे बोल्यो. 39 "अपना घर मे पलटी जा अरु दुन्या से बोली दे. कि परमेश्वर ने तरा लिये कसो बडो-बडो काम कऱ्योस हइ"

व्हा सब नगर मे प्रचार करणे लगा. कि यीशु ने मरा लिये कसो बडो-बडो काम कर्‍यो.

40 जब यीशु पलटी रोथो. ते दुन्या ओकासे दुन्या खुसी का साथ मील्हे. क्युकी वे ओका सब उसकी प्रतीक्षा करी राथा. 41 अरु देख. याइर नाम एक इन्सान जो आराधनालय को मुखियो थो. आयो. अरु यीशु का पाय पर गिरीखे ओकासे प्रार्थना करणे लग्या. "मरा घर मे चल." 42 क्युकी ओका बारा साल की एककुलती बेटी थी.

अरु वा मरना पर थी. जब उ जय रो थो. तब दुन्या ओका पर गिरी गा. 43 अरु एक बय ने जेखे बारा साल से खुन बोहान की बिमारी थी अरु जो अपनी सब जिवन डाॅकटर का पीछे खर्चो कर चुक्या था अरु फिर भी कोय का हात से अच्छो नी हुय सकी थी. 44 पीछे से अयखे ओका कपडा को पदर खे छियो. अरु तुरुत ओको खुन बोहानो रुखी गयो. 45 येका पर यीशु ने बोल्यो. "मेखे कोने छियो?"

जब सब मुकरण लग्या. ते पतरस अरु ओका सोपती ने बोल्यो. "हे स्वामी. तुमखे तो गर्दी दबय रीस हइ अरु तरा पर गिरी पडस हइ."

46 पन यीशु ने बोल्यो. "कोय ने मेखे छियो हइ क्युकी मेने जानी लियोस हइ कि मरा मे से सामर्थ्य नीकलस हइ." 47 जब बय ने देख्यो. कि मी लुकी नी सकु तब कापते हुयो आयो. अरु ओका पाय पर गिरीखे सब दुन्या का सामने बतायो. कि मेने कोय करण से तोखे छियो. अरु कसी तुरुत अच्छी हुय गयो. 48 ओने ओकासे बोल्यो. "बेटी तरो विश्वास ने तोखे अच्छो कर्‍योस हइ. शांती से चली जा."

49 जब उ बोली रोथो. कि कोय ने आराधनालय को बुजुक का ह्या से अयखे बोल्यो. "तरी बेटी मरी गइ गुरु खे दुःख नी देनु."

50 यीशु ने सुनीखे ओखे उत्तर दियो. "मत डरे. फक्त विश्वास रख. ते उ बची जाह्ये."

51 घर मे अयखे ओने पतरस. अरु यहून्ना. अरु याकूब. अरु बेटा का माय बाप खे छोडी खे अरु कोय खे अपना सात अंदर आन नी दियो. 52 अरु सब ओका लिये रोय पीटी रा था. पन ओने बोल्यो. "रोय मत. वा मरी नी पन सोय रीस हइ."

53 वे यो जानीखे कि मर गय हइ. ओकी हसी उडन लग्या 54 पन ओने ओका हात पकड्यो. अरु फुकारी खे बोल्यो "ओ बेटी उट!" 55 जब ओकि जान पलटी गयो अरु व्हा तुरुत उठी. फिर ओने आज्ञा दी. कि ओखे कुछ खान खे दियो जाह्ये. 56 ओकी माय-बाप चमकिगो हुयो. पन ओने उनने धम नो दी. कि यो जो हुयो हइ. कोय से नी बोल्यो.