1 जब यीशु मन्‍दिर से नीकलीखे जय रो थो, ते ओका सेवक होन ओखे मन्‍दिर की रचना बतान का लिये ओका पास आया. 2 ओने ओकासे बोल्यो, "तुम यो सब नी देखस? मी तुम से सच्ची बोलुस हइ, यो पत्थर पर पत्थर भी नी छोड्यो, जो रख्यो नी जाये."

3 अरु जब उ जैतून की टेकडी पर बठ्यो थो, ते सेवक होन ने अलग से ओका पास अयखे बोल्यो, "हम से बोल की या बात कब हुये? अरु तरो आन को, अरु जगत को अन्त: को का चिन्ह हुये."

4 यीशु ने उनखे उत्तर दियो, हुशार ऱ्हे! कोय तुमखे फसय नी पाय. 5 क्युकी भोत सा असा हुये जो मरा नाम से अयखे बोले, मी मसीह हइ ,अरु भोत झना खे बिचकय दिह्ये. 6 तुम झगडाहोन अरु झगडाहोन की बातचीत सुने. देख घबऱ्य नी जानु क्युकी उनको होनो जरुरी हइ, पन उ टेम खतम नी हुये. 7 क्युकी राष्ट्र पर राष्ट्र, अरु राज्य पर राज्य चेढ्या कर्‍हे, अरु जगा-जगा अकाल हुय खे अरु भूकम्प हुये. 8 या बात पीडाहोन का पैयले से हुये. 9 तब वे देन का लिये तुमखे पकड्ये, अरु तुमखे मारी डाल्ये अरु मरा नाम का कारण सब राष्ट्रहोन का दुन्या तुम से बैर रख्ये. 10 तब भोत झना ठोकर खाये, अरु एक दुसरा खे पकड्ये, अरु एक दुसरा से बैर रख्ये. 11 भोत सा झुठा भविष्यव्दक्ता उठी खे खडा हुये खे अरु भोतझना खे बिचकाये. 12 अरु बुरा का बडना से भोतझना को प्रेम ठण्डो हुइ जाये. 13 पन जो अन्नत तक धीरज धरी खे रखे, ओको उध्दार हुये. 14 अरु राज्य को यो सुसमाचार पुरा जगत मे प्रचार कर्‍यो जाये, कि सब राष्ट्रहोन पर गवाही हुये तब खतम हुइ जाये.

15 येका लिये जब तुम उ खतरनाक घुणित चिज खे जेकी बातचीत दानीएल भविष्यव्दक्ता का वजेसे हुइ थी, पवित्र जगा मे खडी हुइ देख, जो पढ, उ समझ. 16 तब जो यहूदीयाहोन मे हुये वे टेकडी पर भागी जा. 17 जो घर पर छपर हुये, उ अपना घर मे से सामन लेन खे नी उतह्ये. 18 अरु जो खेत मे हुये, उ अपना कपडा लेन खे पीछे नी आह्ये. 19 उ दिन मे जो पेट से अरु दूध पिलान आली हुये, उनका लिये दुख को दिन बोल्यो जाये. 20 अरु प्रार्थना कर. की तुमखे ठंडी मे या आराम का दिन भागनो नी पडे. 21 क्युकी उ टेम असो भी क्लेश हुये, जसो जगत का पैयलेसे अभी तक नी हुयो, अरु नी कभी हुये. 22 अरु अगर उ दिन कम नी हुय जाये, ते कोय जनवर नी बचता. पन चुन्या हुया का कारण उ दिन कम नी हुय जाये.

23 उ टेम अगर कोय तुम से बोले, की देख, मसीह यो हइ! या उ हइ! ते विश्वास नी करणु. 24 क्युकी झुठा मसीह अरु झुठा भविष्यव्दक्ता उठीखे खडा हुये, अरु बडो चिन्ह चमत्कार अरु बडो काम बताये, की अगर हुय सकस ते चुन्या हुया खे भी भयकय दे. 25 देख, मेने पैयले से तुम से या सब कुछ बोली दियो हइ.

26 येका लिये अगर वे तुम से बोल्ये देख, उ जंगल मे हइ, ते बाहेर नी नीकली जानु; देख उ खोलीमे हइ. ते विश्वास नी करणु. 27 क्युकी जसी बिजली पुर्व से नीकलीखे पश्चिम तक चमकती जास हइ, असो ही इन्सान का बेटा खे भी आनो हुये.

28 झा लाश हुये, व्हा घुब्बड जमा हुये.

29 उ दिन क्लेश का बाद झल्दी सुरज अंधारो हुय जाये, अरु चांद को ऊजालो जातो ऱ्हीये, अरु तारा बद्दल से गिरी जाये अरु बद्दल की शक्ति हली जाये. 30 तब इन्सान का बेटा को चिन्ह बद्दल मे बतायो जाये अरु तब पृथ्वी का सब कुल का दुन्या छाती पीट्ये; अरु इन्सान का बेटा की बडी सामर्थ्य अरु महिमा का सात बद्दल का बद्दल पर आते देख्ये 31 अरु उ पिपडी का बडा बोल का सात, अपना स्वर्गदूतहोन खे भेजो, अरु वे बद्दल का या पार से वा पार तक, चारी दिशा से ओका चुन्या हुया खे जमा कर्‍हे.

32 अंजीर का झाड से यो दृष्‍टान्‍त सीख जब ओकी डग्‍यान नाजुक हुय जास अरु पत्ता नीकलन लगस हइ, ते तुम जानी लेस हइ, की गर्मी को टेम पास हइ. 33 या रीति से जब तुम या सब बातहोन खे देख, ते जानी लेस, की उ नजीक हइ, पन दरवाजा पर हइ. 34 मी तुम से सच्ची बोलुस हइ, कि जब तक या बात पुरी नी हुइ जाये, तब तक या पीडी को नाश नी हुये. 35 बद्दल अरु पृथ्वी टली जाये, पन मरो बोल कभी नी टले.

36 उ दिन अरु उ टेम का बारे मे कोय नी जानस, नी स्वर्ग का दूतहोन, अरु नी बेटा होन, पन फक्त बाप. 37 जसो नूह को दिन थो, असा मे इन्सान का बेटो को भी आनो हुये. 38 क्युकी जसो पानी-प्रलय से पैयले का दिन मे, जो दिन तक की नूह डोंगा पर नी चढ्यो थो, उ दिन तक दुन्या खाता-पीता था, अरु ओमे भ्याव शादी होस हइ. 39 अरु जब तक जल-प्रलय अयखे वे सब खे बोह्य खे ली गयो, तब तक उनखे कुछ भी मालुम नी थो. असा मे इन्सान का बेटो को भी आनो हुये. 40 उ टेम दो झना खेत मे हुय खे एक खे ली जाये अरु दुसरा खे छोडी दियो जाये. 41 दो बयहोन चक्की पिसती ऱ्ही जाये, एक ली जाये, अरु दुसरी छोडी जाये. 42 येका लिये जागता ऱ्हे, क्युकी तुम नी जानस की तुम्हारो प्रभु कोनता दिन आह्ये. 43 पन यो जानी ले कि अगर घर का स्वामी खे यो मालुम हुये की चोर कोनता टेम आये ते जागतो ऱ्हेस. अरु अपना घर मे चोरी नी होन देस. 44 येका लिये तुम भी तैयार ऱ्हे, क्युकी जो टेम का बारे मे तुम सोचस भी नी, उ टेम इन्सान को बेटो अय जाये.

45 "उ विश्वासयोग्य अरु डिमाकआलो सेवक कोन हइ, जेखे स्वामी ने अपना नौकर चाकर पर मुखियो बनायो, की टेम पर उनखे खानो दिये? 46 अच्छो हइ, उ सेवक, जेखे ओको स्वामी अयखे असो ही करतो देखे. 47 मी तुम से सच्ची बोलुस हइ, उ ओखे अपनी पुरी संपत्ती पर अधिकार ठैराये. 48 पन अगर उ दुष्ट सेवक सोचन लग्यो, की मरा स्वामी खे आना मे देर हइ. 49 अरु अपना सात का सेवकहोन खे मारन लग्यो, अरु पीन आला का सात मे खायो-पीयो. 50 ते उ सेवक को स्वामी असो दिन अयो, जब उ ओका टुकडा टुकडा कर्‍हे, अरु असो टेम की जेखे उ नी समजस हइ, 51 अरु उ कठोर दण्ड दिये ओको भागी कपटिहोन का सात ठैरायो जाये व्हा रोनो अरु दात पीसनो हुये."