João 6

Yesuusi ichchashu mukulu asaa muzis

1 Hessafe guye, Yesuusi Xibaaryoosa giya Galiila Abbaafe hefinthi pinnis. 2 I hargganchchota pason oothida malaata be7ida gisho, daro asay iya kaallidosona. 3 Yesuusi deriya bolla keyidi, yan ba tamaaretara issife uttis. 4 Ayhudeti bonchchiya Faasika Baale gallasay gakkis. 5 Yesuusi daro asay baakko yeyssa be7idi Filiphphoosakko, "Ha asaa ubbaa muzanaw gidiya kathi awuppe shammanee?" yaagis. 6 I hessa Filiphphoosa paaccanaw gisippe attin I ba huu7en ay oothaneekko erees.

7 Filiphphoosi zaaridi Yesuusakko, "Hari attoshin, Huu7en huu7en, issi issi barssi gathanaw, nam77u xeetu dinaaren *6:7 dinaare: Issi dinaarey issi asi issi gallas oothi pee7idi ekkiya miishe. Nam77u xeetu dinaarey issi asi laytha bagga oothidi ekkiya miishe keena. (Maato 20:2) xeellite. uythu shamminkka gidenna" yaagis.

8 Qassi Yesuusa tamaaretappe issoy, Simoon Phexiroosa ishay Inddiriyasi, 9 "Ichchashu bangga soollonne nam77u molo oykkida issi na7ay hayssan de7ees, shin ha asa ubbaas hessi ay maaddanee?" yaagis.

10 Yesuusi ba tamaaretakko, "Asaa utisite" yaagis. He bessan daro maati de7ees; asay ubbay uttis. Adde asaa tayboy ichchashu mukulu gidana. 11 Yesuusi uythaa ekkidi Xoossaa galati simmidi yan uttida asaas gishis. Moluwakka ekkidi hessada oothidi immin, asay ba koyidayssa mela mis. 12 Entti ubbay kallidaappe guye, Yesuusi ba tamaaretakko, "Issibaykka iitonna mela attida tiifiya shiishite" yaagis. 13 Hessa gisho, entti ubbaa shiishidosona. Asay min attida bangga soollo tiifiya shiishidi tammanne nam77u gayta kunthidosona.

14 Asay Yesuusi oothida malaatata be7ida wode, "Hayssi tuma ha alamiya yaana geetettida nabiya" yaagidosona.