Lucas 1

Yesuusa yeletethay koyrottidi odettis

26 Elsabeexa qanthatin usuppuntha ageenan, Xoossay kiitanchchuwa Gabreele Galiila biittan de7iya Naazirete katamaa kiittis. 27 Kawuwa Dawite sheeshaappe gidida Yoosefa giya uraas oyshettida geela7eekko kiittis. He geela7iya Mayraamo geetettawusu.✝1:27 Maato 1:18 28 Kiitanchchoy iikko bidi, "Daro dosettidare, saroy new gido, Xoossay neera de7ees" yaagis.

29 Mayraama iya odan daro dagammada, "Hayssi aybi sarotho" gada heetasu. 30 Kiitanchchoy zaaridi, "Mayraame babbofa; neeni Xoossaa sinthan saba demmadasa. 31 Hekko neeni qanthatana adde na7a yelana, iya sunthaaka Yesuusa gada sunthana.✝1:31 Maato 1:21 32 I gita gidana, Ubbaafe Bolla Xoossaa na7aa geetetti xeegettana. Godaa Xoossay iya aawa Dawite araata iyaw immana.✝1:32-33 2Saamu 7:12-13, 16; Isa 9:7 33 I Yayqooba sheeshaa bolla merinaw kawotana; iya kawotethaas zawi baawa" yaagis.

34 Mayraama kiitanchchuwako, "Hessi waanidi hananee? Ta adde erikke" yaagasu.

35 Kiitanchchoy zaaridi, "Geeshsha Ayyaanay ne bolla wodhdhana, Ubbaafe Bolla Xoossaa wolqqay ne bolla kuyattana. Hessa gisho, yelettiya geeshsha na7ay Xoossaa Na7aa geetettana. 36 Hekko, ne dabbiya Elsabeexa ba cimatetha laythan adde na7a qanthatasu. Iya maynthi geetettidaaro, shin ha77i usuppuntha ageena oykkasu. 37 Xoossaa xooniyabay baawa"✝1:37 Medhe 18:14 yaagis.

38 Mayraama, "Hekko, taani Godaa aylliw, ne qaalada taw hano" yaagasu. Hessafe guye, kiitanchchoy iippe shaakettis.