Lucas 10

Tuma siiqo

25 Hekko, issi gallas Muse wogaa eriya issi uray denddidi Yesuusa yaagidi paace oysho oychchis. "Asttamaariyaw, merinaa de7uwa laattanaw taani ay ootho?" yaagis.✝10:25-28 Maato 22:35-40; Mar 12:28-34

26 Yesuusi, "Muse maxaafan xaafettiday woygii? Ne waata nabbabay?" yaagis.

27 Addey zaaridi, " ‘Ne Godaa ne Xoossaa, ne kumetha wozanappe, ne kumetha shemppuwafe, ne kumetha wolqqaafenne ne kumetha qofaappe dosa. Qassi ase ne shooruwa ne huu7iyada dosa’ yaagees" yaagis.✝10:27 Leewe 19:18; Zaare 6:5

28 Yesuusi iyaakko, "Neeni likke zaaradasa, nekka hessada ootha. Neeni merinaw de7on daana" yaagis.✝10:28 Leewe 18:5

29 Shin uray bana xillo oothanaw koyidi, "Hanos I ta shooroy oonee?" yaagis.

30 Iya oyshaas Yesuusi yaagidi zaaro immis, "Issi ase de7eyssi Yerusalaame katamaappe duge Iyaarkko katamaa bishin oge bolla panggati keyidi shocidosona. Iya ma7uwa qaari ekkidi hayqoppenne paxappe giddon yeggidi bidosona. 31 Guyeppe, Ayhude kahine issoy he ogiyara ba buussu bishe uraa be7idi deshshi gidi aadhdhis. 32 Qassi issi Leewe de7eyssi he bessaa gakkishe uraa be7idi harasoora aadhdhidi bis. 33 Shin, issi Samaare biitta ase de7eyssi he ogiyara yishe uraa be7idi iyaw qadhettis✝10:33-34 2Taari 28:15 34 Iyaakko shiiqidi, iya madunthaa bolla zaytenne woyne tigidi qachchis. Ba hariya bolla utisidi imathi aqiya keethi efis. He bessan iyaw koshshiyaba ubbaa oothis. 35 Wonttethe nam77u dinaare kessidi imatha keethaawas immidi, ‘Hayyana ha uraa loytha xeella. Taani new immidayssafe bollara ne kessiyabaa ubbaa ta new ciggana’ yaagis.

36 "Hiza, ha heedzu asatappe panggati shocida uraas shoorotey new oona daanii?"

37 Uray zaaridi, "Iyaw qadhettidayssaka" yaagis.

Yesuusi, "Nekka bada hessada ootha" yaagis.