Lucas 19

Yesuusi gita bonchchon Yerusalaame gelis

28 Yesuusi hessa odidayssafe guye enttafe sinthe aadhdhi hamuttidi Yerusalaame bis. 29 Shamaho Deriya *19:29 Shamaho Deriya: Shamahoy daro doliya Dere guussu. bolla de7iya Beetefaagenne Bitaaniya matattida wode ba tamaaretappe nam77ata yaagidi kiittis: 30 "Hintte sinthan de7iya gutaa biite, hintte yaa gakkiya wode oonikka toggonna qashettada de7iya hare mari demmana. Iya billidi haa ekki yiite. 31 Oonikka, ‘Ays billeeti?’ gidi oychchiko, ‘Goday iya koyees’ yaagite" yaagis.

32 Kiitettidayssati bidi I gidayssada hanin be7idosona. 33 Entti hare maraa billishin godati be7idi, "Hare maraa ays billeeti?" yaagidosona.

34 Entti zaaridi, "Goday iya koyees" yaagidosona.

35 Yaappe hare maraa Yesuusakko ehidosona. Bantta ma7uwa hare maraa zokkon yeggidi Yesuusa hare maraa bolla utisidosona. 36 Asaykka I biya ogiya bolla bantta ma7uwa hiixidosona.

37 Shamaho Deriya dugethaa wodhisiya ogiyakko matiya wode, taybon keehi daro asay entti be7ida malaalisiyaban ufayttidi bantta qaala dhoqqu oothidi,

38 "Godaa sunthan yaa kawoy anjjettidayssa

saluwan saroy

ubbaafe dhoqqa saluwan bonchchoy

Xoossaas gido."

yaagidi Xoossaa galatidosona.✝19:38 Maz 118:26

39 Asaa giddofe issi issi Farisaaweti Yesuusakko, "Asttamaariyaw, ne tamaareta hayzite gada hanqetta" yaagidosona.

40 I enttako, "Entti si7i giikko shuchchati waassana" yaagis.