Marqqoosa 5

Tuna ayyaani oykkida uray paxis

1 Yesuusinne iya tamaareti abbaa pinnidi, Gerggesoone giya biittaa gakkidosona. 2 Yesuusi wogoluwappe wodhdhiya wode tuna ayyaanay oykkida issi uray duufoppe keyidi iyara gahettis. 3 He uray duufuwan aqi pee7idi de7ees. Iya oonikka santhalaatan qachchanaw dandda7enna. 4 I daro toho duthaninne santhalaatan qashettidi de7ees. Shin santhalaata duuserethees, duthaa mentherethees. Iya teqqanaw dandda7iya oonikka baawa. 5 I qammanne gallas he duufuwaninne dere bolla waasses, ba bollaaka shuchchan gaarees.

6 Yesuusa haahon be7ida wode woxxi bidi iya sinthan gulbbatis. 7 He uray ba qaala dhoqqu oothidi, "Ubbaafe Bolla Xoossaa Na7aw Yesuusa, nenanne tana aybe gathey? Tana dhayssona mela taani nena Xoossaa sunthan woossays" yaagis. 8 I hessa giday Yesuusi iya, "La ha tuna ayyaanaw, ha addiyafe keya" yaagida gishossa.

9 Yesuusi iyaakko, "Ne sunthay oonee?" yaagidi oychchis.

I, "Nuuni daro gidiya gisho, ta sunthay Leegiyona" yaagis. 10 Tuna ayyaanati bantana he biittaafe kessi yeddonna mela Yesuusa minthidi woossidosona.

11 He deriya bolla daro guduntho wudey hamuttees. 12 Tuna ayyaanati Yesuusakko, "Nuna hini guduntho wudiyakko yeddarkki, enttan bidi geloos" yaagidi woossidosona. 13 Yesuusi enttako, "Biite" yaagis. Yaatin tuna ayyaanati addiyafe keyidi gudunthotan gelidosona. Nam77u mukulu gidiya guduntho wudey aafo doonara dirggidi bidi abban gelidi mitettidosona.

14 Guduntho wudiya heemmeyssati baqati bidi hanidabaa katamaaninne gaxariyan odidosona. Yaatin asay hanidabaa be7anaw keyidosona. 15 Asay Yesuusakko yaa wode tuna ayyaanan oykettida uraa be7idosona. I ba wozanaakko simmidi, ma7o ma7idi, yan uttidayssa be7ida wode ubbay yayyidosona. 16 Hessa be7ida asati tuna ayyaanati oykkida uraa bollanne gudunthota bolla hanidabaa ubbaa asaas odidosona. 17 Hessa gisho, asay bantta biittaafe Yesuusi baana mela woossidosona.

18 Yesuusi wogoluwan geliya wode kase tuna ayyaanati oykkidi yeddida uray,, Yesuusa kaallanaw iya woossis. 19 Shin Yesuusi ixxidi iyaakko, "Ne soo simmada, Goday new ay mela gitabaa oothidakkonne new ay mela keehidakko ne soo asaas oda" yaagis. 20 Uray bidi Tammu Katamata giyason yuuyidi, Yesuusi baw ay mela gitabaa oothidaakko odis. I odidayssa si7ida asa ubbay malaalettidosona.