Mateus 26

Yesuusa bolla maqettidosona

1 Yesuusi ha timirttiya ubbaa wurssida wode ba tamaaretakko, 2 "Nam77u gallasappe guye, Faasika Baale bonchchiya gallas gideyssa ereeta. He gallas Asa Na7ay masqaliya bolla kaqettanaw asa kushen aadhdhi imettana" yaagis.✝26:2 Kessa 12:1

3 He wode kahine halaqatinne cimati, Qayyaafa giya kahine halaqaa keethan shiiqidi, 4 asi eronna Yesuusa oykkidi, wodhanaw maqettidosona. 5 Shin entti, "Asay ooshshi kessonna mela gidi, Faasika bonchchiya gallas hessa oothoko" yaagidosona.

Issi maccasiya Yesuusa shitto tiyasu

6 Yesuusi Bitaaniya kataman baro harggida Simoona son de7ees. 7 Yesuusi imatuwa bolla de7ishin issi maccasiya albasxiroose philqqaaxe kumetha daro al77o shitto ekka yada Yesuusa huu7en tigasu.✝26:7 Luuqa 7:37 8 Shin Yesuusa tamaareti hessa be7idi hanqettidi, "Ha shittoy coo iitey aybisse? 9 Ha shittoy al77o gaten bayzettidi, miishey manqotas imettanaw dandda7ettees" yaagidosona.

10 Yesuusi entti geyssa eridi, enttako, "Ha maccasiw ays waaysetii? Iya taw lo77obaa oothasu. 11 Manqoti ubba wode hinttera daana. Shin taani hinttera ubba wode de7ikke.✝26:11 Zaare 15:11 12 Iya ha shittuwa ta bolla tigidayssi tana mooganaw giigisanaassa. 13 Taani hinttew tuma odays; biitta ubban ha Wonggelay sabbakettiya bessan awunkka, asay iyo hassayana mela iya oothidayssi odettana" yaagis.

Yihudi Yesuusa aathidi immanaw giigettis

14 He wode tammanne nam77u Yesuusa tamaaretappe issoy Asqoroota Yihuda geetetteyssi kahine halaqatakko, 15 bidi, "Taani hinttew Yesuusa aatha immiko, hintte taw ay immanee?" yaagidi entta oychchis.✝26:15 Zakka 11:12 Entti zorettidi hasttamu bira santime *26:15 Bira santime: Aykkoyka guzhettiboonna geeshsha bira guussu. *26:15 Hasttamu bira santime: Hasttamu bira santimey Isra7eele biittan aylley shamettiyanne bayzettiya gate. immidosona. 16 Hessafe guye, Yihudi Yesuusa aathidi immanaw injjetiya wode wochchees.

Yesuusi Faasika kahuwa ba hawaaretara mis

17 Uytha Baale bonchchiya koyro gallas, Yesuusa tamaareti iyaakko yidi, "Faasika bonchchiya gallas neeni maana kathi nuuni awun giigisino?" yaagidosona.

18 Yesuusi enttako, "Kataman de7iya addiyako bidi, ‘Asttamaarey, taw wodey gakkida gisho, ta tamaaretara Faasika bonchchiya gallasa ne son aathana yaagees’ yaagite" yaagis.

19 Iya tamaareti Yesuusi banttana kiittidayssada oothidi, Faasika Baale gallas maana kathaa giigisidosona.

20 Sa7ay omarssiya wode, Yesuusi tammanne nam77u hawaaretara kathi maanaw uttis. 21 Entti miishin, Yesuusi enttako, "Taani hinttew tuma odays; hinttefe issi uray tana aathidi immana" yaagis.

22 Entti daro dagammidi, huu7en huu7en, "Godaw, tuma taneshsha?" gidi iya oychchidosona.

23 Yesuusi zaaridi, "Ba kushiya taara issife shaatiyan yeddeyssi I tana aathidi immana.✝26:23 Maz 41:9 24 Asa Na7ay, Xoossaa qaalan iyaw xaafettidayssada hayqqana. Shin Asa Na7aa aathidi immiya uraa ayye; he uray yelettonna attidaakko iyaw lo77oshin" yaagis.

25 Iya aathi immanaw de7iya Yihudi zaaridi, "Asttamaariyaw, neeni gey taneyye?" yaagis.

Yesuusi zaaridi, "Neeni ne huu7en gadasa" yaagis.

Godaa kahuwa

26 Entti mishin, Yesuusi uythaa ekkidi Xoossaa galatis. He uythaa menthidi ba tamaaretas immidi, "He7ite, miite, hayssi ta ashuwa" yaagis.

27 Xuu7aa ekkidi, Xoossaa galatis. Enttaw immidi, "Ubbay hayssafe uyite. 28 Hayssi daro asaa nagaray atto geetettana mela gukkiya ta suuthaa. Ha suuthay Xoossay hinttera geliya caaquwa mintheyssa.✝26:28 Kessa 24:8; Er 31:31