1 Kǝthlǝm ndaˈan, nggǝta, pursuna kǝthlǝm para Chinda, ni shiyowunda kǝ chokkam tǝmɗi ˈyaɗi ˈyat fee wunchi, kǝthlǝm Farta ˈyech wunchi. 2 Chika kwati kǝ nowun kǝmma tǝ hashaskǝta. Kǝ nowun tǝ kǝrǝs raˈan, nakowun nggǝmandǝ raˈan kǝ ɗar kafaɗi nechsi yowun. 3 Kweˈyam ha kǝ nowun tǝ wum inda hur Shemeta, kǝnankowun fechˈyowun hur kǝɓikaɗi. 4 Kǝthlǝm faɗan arta tǝ Shemet artǝ paɗ, kǝɗ thla ˈyech fee wunchi kǝ hur kappa maanda tǝ ɗǝf kǝfatsi kǝ ichiɗi nech ɓata ǝ pangga. 5 Chinda arta, tǝ fǝrkit arta, tǝ baptisma artǝ paɗ, 6 mǝthlan neck ɗar chikamǝ nat hur mǝ nat paɗ nakan ha hur nat paɗ.

7 Chika kǝɗu, fǝran tǝ chika wuni mbǝr ǝna tǝmɗi kafati Kǝrǝsti. 8 Ndaˈan mbutǝ Lawlawaɗan wa,

"Fartǝɗi pǝɗatǝn kafǝrta,

tǝrtǝ fee kǝssandǝn tanda* tǝ anchi,

fǝrankan wanchi Adamu mbǝr ichǝ samǝn samǝn."✝

9 Mǝ nech kǝ "tir kafǝrta." Ə pinwa Kǝrǝsti ɗǝ kah kǝ ndukwa kan haha. 10 Thla saˈchǝ kaha mǝthlan paɗ pǝɗech kafǝrta pǝɗankan hulafǝrtǝ ha, kǝthlǝm kǝ ndiiɗan tǝ hulafǝrta tǝ heshi nat ǝ indiyan.

11 Nakanya mbǝr ichiɗiya fǝrtǝ Kǝrǝsti kǝmɗi nafchiyan: ndǝ kǝmsicha, fǝ mbancha, fǝ ɓascha, tǝ mbuˈ ndiktiyan, fǝ chaˈandǝ nafchi kaɗi. 12 Tarchiyandǝ kǝ thsandǝ nafchi Farta kǝ chit ndǝ tarchiyan kǝ paɗ tǝnandǝ fati Kǝrǝsti. 13 Nan ɗǝt kǝ pangga tarɗiya kǝ fartǝɗi natmǝn choktǝ kǝ nafchi arta hur Chinda, kǝ chokmǝn paɗ hur sǝn Wa ˈi Farta. Namǝn choktǝ kǝ ndiiɗ ti nafcha kǝ saˈmǝn kǝ mǝɗi yahtǝ Farta hur Kǝrǝsti.

14 Chich fee kǝɗu kǝthlǝm kǝ chokmǝn tǝ ǝna chiti wancha wa, ndu kǝ chokmǝn kǝɗ fee naa taraktǝs tǝ hur inchiyanda, kǝn fee shipa mǝn nda kǝ renna tǝ chaˈaɗanˈyanda nakandǝ terandǝ hur inchiyamǝn, nafchiɗi nech tǝ hwanaˈata nakandǝ lǝmminchi tǝ ɗathla mǝn nda. 15 Tǝ kǝɗu mbuˈankamǝn raˈan kittaˈan hur kafata, nakamǝn maanda hur tarchiyamǝn nat kǝ saˈamǝn weˈtǝ chiti Kǝrǝsti thl nech kǝ indi nafchi nat. 16 Kǝthlǝm mǝthlan nech parat tǝ nat ɓǝtǝl tǝ fata nat kǝnandǝ chit ter ndiˈchan. Chika yeni mǝthlan thlǝnandǝ terˈyan, nakandǝ kǝssandǝ raˈan kǝ nandǝ maanda, thla ɗǝfchǝ faɗan nat kǝn has has tǝ maanda hur ndiiɗ ti kafata.

17 Nggǝt mbuˈowunda tǝ alkǝti Chinda: Kǝ chokwun kǝɗ Pong nafchi paɗ wa, kǝthlǝm tapi chohiˈ hur inchiyandǝ kaɗi. 18 Ndiiɗ kǝ wandǝkaɗechˈyandǝ kaɗi tǝ wuthla; pǝɗi ndǝ langga tǝ Farta thla thlǝ fǝrchǝ shishingnda kǝthlǝm wandǝkaɗechˈyanda kwaˈkwa paɗ chi wandǝ ǝn ɗi yahtǝn wa. 19 Haraw fat tanda wa. Ɗǝf kandǝ inchiyanda kǝ fǝlawkǝta, nakandǝ chit chika yen tǝkǝmǝn icha.

20 Ngga ndaˈan chaˈat wun mǝɗi Kǝrǝsti wa. 21 Kǝfartǝɗi sǝktǝwun ndikta kǝ indi Yesu paɗ sǝkkowun kittaˈan thla ɓech mǝɗiyan. 22 Ənɗi chaˈowundǝfee har ndat wa, mǝkaman ɗohtǝ ǝna chitˈyowun kaɗi paɗ kǝ parowun chit fata wa ndu lǝmndǝ paɗ wa.✝ 23 Tǝ kǝɗu, malaman Shemeti Farta kǝn parata tǝ wunchi tǝmɗi mbǝɗa ndǝ kaɗechˈyowun ha tǝ ǝna chitˈyowun. 24 Mǝkkowun yuwa chita, thla nech kǝ yi thla tahǝs tǝ Farta, thla nech ɗǝt tǝ wunchǝ kǝ kaakǝta tǝ chiɗ chiɗ kǝta.

25 Malaman mbuˈ lekta. Nakamǝn mbuˈandǝ raˈan kittaˈan, kǝthlǝm natmǝn nechamǝn kǝ ɓǝtǝl tǝ fati raˈan nat.✝ 26 Ma ǝ sǝɓanwun hwirkaɗi, kǝ malawun kǝ ɗǝ tǝ wunchi kǝ chit ɓǝɓifata wa. Kǝ malawun sǝɓtǝ hwirˈyowun kǝ ndǝrǝm kǝ hǝm farta.✝ 27 Kǝ fǝrawun Hweˈrǝ mbanda wa. 28 Thla thlǝ yarkǝchǝ choh kǝ malanchi. Tǝ kǝɗu chikan tertǝ harchiyan yi kit thla natǝn mbahǝn mbǝs ichi har tǝ paɗ kǝssantǝ fowun si fee nawaktǝnˈyandǝ si. 29 Kǝ nggǝrwun mbuˈan nef ɓawa mee wa, ndiktǝɗi nech mbahǝn kǝssandǝ nafchis ndak nat wun mbuˈta. Tǝ minni naa ndiktiyowun choktǝ kǝ ǝna kǝssandǝ fee nech sǝkwunchi.

30 Parakowun har ndiˈchan kǝthlǝm kǝ sǝɓawun hwiri Shemeti Farta kaɗ wa, kǝthlǝm nechan klu saktǝ thlǝ chektaˈan i Farta indiyowun thla natǝn pǝnda ǝ Ndukwa heshi tǝ ndat wa kun yaˈan. 31 Chakan ha tǝ sǝɓtǝ hwira, tǝ nduhul ɓǝstǝ hwira, tǝ kǝnandǝ chimanda, tǝ yaka ˈyara fata, tǝ tǝhuɓta, tǝ chika weˈtǝ yen ɓǝɓifata. 32 Cham thlǝrɗakta tǝ raˈan, nakowun haɗa ndǝ raˈan fa, kǝnowun kalandǝ raˈan ha kǝɗ thla thlǝ kalowundǝ Fartǝ ha tǝmɗi Kǝrǝsti.✝