1 Tapi chokwun kǝ wanchi Farta thla yahtǝn, tǝram saktaˈan mǝɗiyan hur choktǝ yowun. 2 Chokam tǝ thlǝrɗakta kǝɗ thla naa Kǝrǝsti chaminda, fǝrkan indiyan kǝ kǝnaw pafǝn thla chokchǝ kǝ ǝna tithla thla nech mbinchan kǝmɗi Farta.✝

3 Kǝ tamfe sǝk fǝlawkǝta hur wun wa ndu tǝkǝmnda wa, ndu yah ichǝ hur wun wa kǝmwasi kǝn pathlang nafchi Farta wa. 4 Chika ɓǝɓi ndikcha, tǝ ndikta wuwwa, tǝ ndikta kǝ sǝɓtaˈan kǝmwa sǝ kǝn hur wun wa. Tǝ kǝɗu, chokam kǝ nafchiɗi thlǝ chich usoko kǝmɗi Farta. 5 Kǝsǝn wu suwa nggǝ fǝlaw ndu fǝlawcha, ndu fǝ yah icha (ndu fǝ para ɗǝhacha wa), nggǝ chaktiyandǝs hur kutarakti Farta chika nguɗeh wa.

6 Mǝ lǝmyowun wunchi tǝ ndiktǝ samǝn samǝn wa. Kǝthlǝm ndaˈan fǝ ndikchiɗiya thlǝ naa sǝɓtǝ hwiri Farta ɓak kah kǝ inchiyanda fee karchǝ sǝk anchi. 7 Kǝthlǝm ndaˈan kǝ wumawun indǝ tǝ tanda wa.

8 Kǝthlǝm choh kun choktǝ hur wuthla nakanya nechowun kǝ yi Chinda thla nech kǝ ɗaˈkǝta. Kǝthlǝm ndaˈan chokam kǝ nafchi ɗaˈkǝta. 9 Kǝthlǝm ɗaˈkǝtɗi nech hur wun ya thlǝ ɓechan tǝ kaa icha tǝ thla nech ndiˈchan tǝ kit paɗ.

10 Kǝ sǝnwunsǝ paɗ wa ichiɗi natwun chita ǝna thla nech mbǝnandǝ Chindǝ si. 11 Chakan ha tǝ sǝɓtǝ tarcha yi wuthla thla naa nafchǝ chita, tǝ kǝɗu nakowun koh tandǝ tandǝ kesh. 12 Kǝthlǝm ǝna hartǝ fata ma fee sǝkta kun ndikta kǝ ɗar ichiɗi naa ɓǝɓi nafcha chita ǝ wuɓta. 13 Na ichiɗi thlǝ chit nda ɓat kesh ma ɓi ɗaˈkǝta kǝ indiyanda kǝ paɗ sǝn fee ndu weˈtǝ nafchi mǝ nakanda. 14 Kǝthlǝm ndaˈan nda fee wa,

"Thlaˈu chiɗi nech saˈyena.

Thlaˈu hur mǝmatecha.

Na Kǝrǝsti finuta."

15 Kǝthlǝm ndaˈan param har ndiˈchan tǝ wiˈtiyowun. Kǝ chokwun kǝɗ ɓamcha wa, chokam kǝɗ fee sǝnchǝ ǝna. 16 Nakowun chit ter tǝ mbanchiɗi natwun mbǝsta kǝ chiwun kaakǝta, kǝthlǝm wanminchaˈan sǝɓchaˈan.✝ 17 Kǝ chokwun kǝɗ ɓamcha wa, tǝ kǝɗu kweˈyam ha kǝ sǝnwun mǝ nech kǝ ǝnɗi yahtǝ Farta. 18 Mǝ nggalwun tǝ mbala wa, thla nech ɗǝfwunchi kǝ sǝɓtǝkaɗi. Kwech chan, kǝ ndiiɗ wun kaɗ tǝ Shemeti Farta, 19 nakowun ndiktǝ tǝ raˈan tǝ ndikti Zabura ta in ˈyamǝs sa kǝmɗi Chinda tǝ nat wandǝkaɗechˈyowun. 20 Chika yen parta kǝ chawun Farta usoko tǝ thlǝm Chinmǝn Yesu Kǝrǝsti kǝ ɗar ichi nat.✝ 21 Kǝ pangga, fǝram inchiyowun raˈan tǝmɗi tǝ maandǝ Kǝristi.

22 Nǝssa, fǝraman ichiyowun kǝ hǝssiyowun kǝɗ kǝmɗi Farta.✝ 23 Kǝthlǝm hǝssa fen nech kǝ indi nǝssiyanda kǝɗ thla naa Kǝristi kǝ indi fǝ parandi. Mǝthlan nech kǝ thlǝ hǝraˈandǝ tanda, fee nech kǝ yaˈan. 24 Fe thlǝ nech parandi yu thlǝ fǝrchandǝ inchiyanda kǝmɗi Kǝristi, nggǝwun nǝssi paɗ fǝram inchiyowun kǝmɗi hǝssǝyowun hur chika mǝ nat. 25 Hǝssǝ paɗ yaham nǝssiyowun, kǝɗ thla yahtǝ Kǝristi fee nech parandi. Fǝrtǝn shishingndiyan kǝmthlǝm tanda, 26 kǝ chapanchi kaɗi tǝ chiɗchiɗ kǝta, chaptǝ kaɗ tǝmɗi ndikti Farta. 27 Chichan kǝɗu kǝthlǝm kǝ fǝrtǝ anchi kǝmɗiyan kǝ ɗar kwastǝ ikkilisiya thla nggowakchǝ tǝ ǝnfa ndu sǝɓtǝfa. Tǝ kǝɗu nechan nat chiɗ chiɗ ngga tǝ ɓǝɓi anwa. 28 Tǝ mben ini paɗ, kǝmchis kǝ yah hǝssǝ nǝssiyanda kǝ fechˈyanda. Kǝthlǝm nafɗi yahchi nuwan indiyan yahtǝn. 29 Nefsi nech kar fatˈyan wa tǝ kǝɗu thlǝ nech sǝmandǝ ǝna tǝ parat tǝ indiyan ndiˈchan, kǝɗ thla thlǝ chit Kǝristi kǝ ikkilisiya. 30 Necha mǝn kǝ nafchiyan.

31 Kǝɗ thla mbuˈtǝ Lawlawaɗan tǝ ndat wa,

"Na nef mal chinan tǝ manan kǝ chok ndǝ artǝ tǝ nuwan,

chapnda nandǝ nat kǝ fat arta."✝

32 Thlǝya nech kǝ ǝna sakainda, tǝ kǝɗu thla paɗ nech kǝ saktaˈan kǝ ɗar Kǝristi tǝ fee nech para anchi ǝn arta. 33 Nggǝt chekowundǝs paɗ, chikawun nefa kǝ yahtǝ nuwan kǝɗ indiyan, nussi paɗ kǝ fǝrndǝ maandǝ kǝmɗi hǝssiyanda.