1 Kun ɓamchi Galatiyawecha wun tǝranchi hur inchiyowun? Kun tǝɗi pǝnowundǝ fee hayang, mbanɗi kukwandǝ fee Yesu Kǝristi ɓǝra palangda. 2 Ən artǝ ndak nati chihowunda. Mbǝschowun shemeti Farta tǝmɗi chit tarchǝɗi mbuˈtǝ kusiˈ wa, ndu paɗ tǝmɗi fǝr kit kǝ ndiktǝɗi sǝktǝ wun wa? 3 Awi, ɓamkǝt ˈyowun ǝ sheˈ kǝɗaya wa? Ə tǝrwun kanan har tǝ Shemeta, nechowun tǝɓandǝ ha tǝ saktǝ yi fata wa? 4 Awi, pafǝn satwun ɓahtǝ ha samǝn samǝn wa? Nggǝta sǝninchi wa ngga pafǝn wa. 5 Awi mǝthlan tǝɗi, fǝrowunchi Shemetˈyan, chǝkan tarcha yi saka incha ǝ hur ɗǝfi tǝ wun. Chichan kǝɗu tǝmɗi tarchi kusiˈ tǝɗi chit wun wa, ndu tǝmɗi fǝr kitˈyowun kǝ ǝnɗi sǝk tǝ wun wa? 6 Kǝɗu paɗ Ibrahim fǝrtǝ kit kǝmɗi Farta, "Fǝr kit tǝ ini ˈyan yu, shengan fee kǝ chok kǝ kaakǝta kǝmɗiyan."*

7 Kǝ sǝnwun wa, fee nech tǝ fǝr kit fa, fen nech kǝ wanchi Ibrahim. 8 Mbǝsan fee hur Laulawaɗan, ndat wa, Farta nan nggǝrandǝ fee kaɗ nowakchǝ kǝ Yahudawecha, kǝ chok ndǝ kǝ fǝ kakicha, tǝmɗi fǝrkitǝɗi nessi yanda. Ndaˈan chicha, choh ndandǝ fee Ibrahim hur kusheˈtǝ kwastǝ ndiktǝ mbinchan tǝ ndat wa, "Tǝmɗi yo naa fee fǝran pong nafchǝ mbǝs ǝn har."* 9 Kǝthlǝm ndaˈan, fee fǝrchǝ kit, fen ɗǝfandǝ fee mbǝs ǝn tandǝ kǝ har, kǝɗ ǝnɗi ɗǝfandǝ fee Ibrahim thlǝ fǝr kit.

10 Tǝ kǝɗu fee ɗǝfchǝ kǝfatsi kǝ tarchǝɗi mbuˈtǝ kusiˈ wa kǝ chǝ fee, naa fee chakan mee tanda. Kǝthlǝm ǝ yaran fee ha tǝ ndat wa, "Nat nefa thla para wakchǝ nat ǝnɗi yara fee hur Laulawati kusiˈ, paɗ thlǝnawa wa naa fe chakanda mee." 11 Ə wethl ha wa nefsi nech mbǝs mban hǝraˈta ǝ pangngǝn Farta tǝmɗi para kusiˈ wa. Kǝthlǝm, "Thla naa kaakǝt ˈyansi tǝmɗi fǝr kit mǝthlan nech nat ha."* 12 Kusiˈ thlarwa ha kǝ ɗar fǝr kit wa. Kǝthlǝm ndech kusiˈ wa, "Thla thlǝ thlǝnanchǝ ichiɗiya nan nat ha tǝmɗiyanda."*

13 Nakanya Kǝrǝsti tapi thlǝt minchi hur chak meˈi kusiˈ tǝ anchi, tǝmɗi chokta kǝ thlǝ thǝt chak mee kǝthlǝm nggǝmǝn. Kǝthlǝm yaranchǝ fee ha ndat wa, "Nat thla kukwandǝ fee kǝ ɓǝra ɗǝfta, thlǝt chak mee." 14 Chich fee ǝnɗiya kǝthlǝm mbǝs ǝnaɗi har chandǝ fee Ibrahim, kǝ ɓǝ kǝ ɗar pong nafcha tǝmɗi Kǝrǝsti Yesu. Nggǝmǝn paɗ tǝmɗi fǝr kit kǝ mbǝsmǝn Shemeɗiya thla ɗǝftǝ fee miyan.

15 Wanmanchina, ni fǝrowun saktaˈan hur naaɗi ha ya. Chǝka ɗǝf mee ǝ pǝthlǝr nafcha, nefsi nech mbahǝn mbeɗandǝ ha wa, ma tapi wethl ha. Nefsi nech mbahǝn chekandǝ ǝn kǝ ɗaran paɗ wa. 16 Fǝrchǝ Farta ɗǝf michaˈan kǝmɗi Ibrahim tǝ yowun hur nafchiyan.✝ Ndawu fee wa tǝ kwathlˈcha wa, kǝɗ nechandǝ terchan wa, auwa, arta nda fee, "Yowun hur nafchiyo." Ndat wa, Kǝristi. 17 Ənɗiya nati sakta: Kusiˈtǝɗi fǝrtǝ fee hurechǝ kum chit kum foɗɗa tǝ kum chit mahkan ǝ kǝrsa, nech chentǝ ɗǝf miɗi kaɗ thla wathlandǝn Farta ha kǝ choh wa. Nech chokan tǝ ɗǝf miyan kǝ kohaɗan wa. 18 Mamwa sǝm kǝrsǝ mǝrtǝɗiya thlǝ mbǝschǝ fee tǝ mban kusiˈ, awi mǝ nech chok kǝ yi ɗǝf me wa. Kǝɗu fǝranchǝ Farta Ibrahim tǝmɗi ɗǝf mee.

19 Mǝ chicha fǝr tǝ fee kusiˈ? Fǝrchǝ fee kusiˈ taˈan kǝthlǝm nafcha kǝ naa ndǝ ɓǝɓifechˈyandǝ ha. Nech kusiˈtaˈan choktǝ kǝ fartǝɗi naa Wanan thla ɗǝftǝ fee miyan nan ɓat hur kwalth Ibrahim. Fǝrchǝ fee kusiˈtaˈan tǝmɗi fǝ thlincha, tǝ paɗ ɗǝfan kǝ fee thla hurɗǝfi kǝ hera. 20 Maa tǝn fee ndik thla thlarchǝ hurɗǝfi, ngga kǝthlǝm nef arta wa. Kǝɗu Farta nechan arta.

21 Chokcah kusiˈ tǝn chǝt atekrikǝt tǝ ɗǝf meˈi Farta hacha wa?✝ Auwa, ngga kǝɗu wa chǝka ngguɗyeh. Mamwa tǝ fǝr fee yowun kusiˈ thla nech fǝr shishingnda, mǝ naa fee mbǝs kaakǝta pangngǝn Farta tǝmɗi kusiˈ. 22 Paɗaa Yara ndikti Farta ǝ nggǝlan tǝ chǝka wuni kǝ hur ɓǝɓifata, kǝthlǝm mbǝs ǝnaɗi har ɗǝf tǝn miyan, tǝmɗi fǝr kit kǝ Yesu Kǝrǝsti, kǝ fǝr fee anchi kǝmɗi fee fǝrchǝ kit.

23 Kǝn fǝr kit ɓata thla nech hur Kǝrǝsti, kusiˈ ǝ nggǝlaminchi kǝɗ nafchǝɗi nggǝlandǝ fee kǝ hur pursuna, kǝɗu kǝ fartǝɗi che fǝr kit kesh ǝ kǝrsa.

24 Awi kusiˈ, ɗǝpech minchi har kǝ fartǝɗi ɓa Kǝristi. Kǝthlǝm kǝ mbǝs mǝn hǝraˈta ǝ pangngǝn Farta tǝmɗi fǝr kit. 25 Nakanya kǝ ɓa fǝr kit tǝɗiya, peˈwamǝn hari thla nech ɗǝpaminchi har wa.

26 Kǝthlǝm nat wun nechowun kǝ wanchi Farta tǝmɗi fǝr kit kǝ Yesu. 27 Nat wun kun tǝɗi chowundǝ fee baptisma ǝ hur Kǝristi, ǝ tǝr wun ǝna chǝti Kǝristi. 28 Peˈwu ndatsǝ wa thlǝ Yahudawata, ndu pong nafcha, ndu waa, ndu mafata, ndu hishnefa ndu nunefa wa. Kǝthlǝm nat wun nechowun artǝ hur Kǝristi Yesu. 29 Maa paɗ yi Kǝristi nakowun, kun nech kǝ kwathl Ibrahim, fǝ sǝm kǝrsǝ mirchiyan paɗ, kǝ ɗǝf miɗiya.