1 Tǝn fee sakta wa, thlǝ sǝm kǝrsǝ mǝrta, ma peˈchan kǝ wanwaa, nechan keˈkeˈ tǝ mafata, chǝka mǝnakan wa mǝthlan malandǝ fee chǝka mi ha nat. 2 Nechan nat hari thla thlǝ parech tǝ anchi, tǝ fee thlǝ kǝschǝ ichaˈan har kǝ fartǝɗi fǝrtǝ chinan wa kǝ pǝnan fee ichiˈyan. 3 Nechan kǝɗu ǝ mǝɗiyamǝn, tǝ ndat wa, peˈtǝmǝn kǝɗ wanwancha, chokmǝn kǝ mafechi tar raˈecha thla ɗǝftǝ nafchi heshi.

4 Paɗaa kǝ ndiiɗ kǝ wanminchaˈan ha, thlǝn kǝ Farta Waˈyan, thla nggǝttǝ nunefa, nggǝttǝ fee paɗ ǝ fǝl kusiˈ. 5 Kǝthlǝm kǝ hǝraˈan tǝ fee nech kan kusiˈ, kǝ nggǝraminchǝ fee kaɗ kǝ wanchi Farta. 6 Kǝthlǝm kun wanchiyan, thlǝn kǝ Farta shemeti Waˈyan kǝ hur wanɗǝkaɗech ˈyamǝn, nakan ˈyat wa, "Abba, Papa"* 7 Kǝthlǝm ndaˈan, nakanya ngga mafat nako paɗ wa, chǝ waˈyan. Nakanya chǝ Waˈyan, Farta nggǝruchǝ kaɗ kǝ thlǝ sǝm kǝrsǝ mǝrtaˈan.

8 Choh fartǝɗi sǝn waktǝwun Farta, chok wun kǝ mafecha tǝmɗi manandǝ ɗǝhacha, fee thlǝ mbahǝn wakchǝ chǝt ǝna. 9 Paɗaa nakanya kǝ sǝn kowun Farta, ndu kǝ ndǝ fee wa sǝn Farta wunchi, tǝ kǝni nat wun nggǝr nggǝrandǝ in kǝ fǝl kusiˈ tǝ tar raˈechi heshi, fee nggawakchǝ thlee ndǝ ǝn kaɗi. Michicha nggǝrawun in kǝ chok wun kǝ mafechˈyanda hacha? 10 Thlǝ parechowun parcha, tǝ ndǝricha, tǝ wanshengngǝncha, tǝ hurecha. Mbǝrowun wandǝ ha wa. 11 Ənɗi thlǝ chǝtwun fǝritǝ lekǝt kaan, kǝthlǝm kǝ chok wa ɓahtinchi ha pǝthlǝr wun, kǝn pafǝn wa.

12 Nggǝt shiyowun nda, wanmanchina, chokam kǝɗ nggǝta, kǝɗ thla chokti kǝɗ kun. Tam wowun chi ǝna thla nech kǝ sǝɓtaˈan wa.

13 Sǝn wunsǝ wa, kǝthlǝm hatǝfatinchi ɓassowundi kwastǝ ndiktǝɗisi mbinchan, ǝ ɓatinchi yi tǝrkwathl kanan. 14 Chǝka mǝ nakan wa hatǝfatinchi chok kǝ ǝna che wansarta ǝ mǝɗiyon, njir wowun nenchi wa, wuɗek wowun nenchi wa. Kǝɗu thlǝkowun nenchi kǝɗ thlǝ thlǝndi Farta, kǝɗ Yesu kǝristi tǝ indiyan. 15 Ai sǝk mbǝnɗi sǝk tǝwun fǝ tǝ nenchi? Kǝthlǝm ni mbahǝn mbuˈta wa, mamwa nan chǝta mǝ ɓǝtawun wenichiyowun kǝ fǝrichi wun. 16 Awi, nakanya tǝ choki kǝ atǝkretǝwun, kǝthlǝm mbuˈowunchi kit wa?

17 Nafchiɗiya yah kandǝ kweˈtǝ ha, kǝ kahandǝ hur inchiyowun, kǝɗu kaɗat ˈyanda ngga kaɗan wa. Yah channdǝ si kǝ chakaminchi ndǝ ha tǝ wunchi, kǝthlǝm kweˈtǝ yowun ha kǝ nggǝranchǝ in kǝmɗiyanda. 18 Ndiˈchan si kǝ ɗǝf nef wandǝkaɗatˈyansi kǝ chǝt ǝna, maa tǝ ka kaɗata. Kǝn chǝta chǝka kǝ kwati, ngga wa ma nggǝt si minni wa.

19 Wanchinchi fee nech wechicha fee thlǝ mbǝndi faɗan, nggǝt nggǝr chukuta kǝɗ tǝni nggǝr nggǝt wunchi. Nggi yip wa, kǝ fartǝɗi naa ndikti Kǝrǝsti chokta ǝ hur wun. 20 Mamwa kǝ ndǝ fee wa nggǝt tǝ wunchi nakanya, kǝthlǝm kǝ nggǝrani ɓǝra ndiktinchǝ ha kǝmɗi yowun. Kǝthlǝm ndikti yowun ɗaktǝ nenchi.

21 Mbuˈami tǝn, yahwunsǝ kǝ chokwun kan kusiˈ wa, sǝn wowun ǝnɗi mbuˈtǝ kusiˈtaˈan wa? 22 Kǝthlǝm nechan kǝ yaraɗan wa Ibrahim wanchiyansǝ chap. Arta tǝ nuɗi nech kǝ mafat yu. Artǝ paɗ tǝ nu thla nggawak chǝ kǝ mafata.* 23 Wannan ˈyan thla nggǝttǝ mafaɗan yu, nggǝt chǝ fee anchi kǝɗ ǝnɗi thlǝ nggǝttǝ nafchǝ wancha. Kǝɗu wananˈyan thla nggǝttǝ fee tǝmɗi nuɗi nggowak chǝ kǝ mafat yu, nggǝt chǝ fee anchi tǝmɗi ɗǝf mee i Farta.

24 Ichiɗiya chokchan kǝ ǝna chaˈata. Nǝssǝɗiya nandǝ pǝn saktǝ ɗǝf me chap. Arti ɗǝf miyan thlaˈtǝ ngwal Sinai, thlǝ nechan nggǝt wancha fee nech chokta kǝ mafecha, ndaˈan nech kǝ Hajaratu. 25 Nakanya Hajaratu ngwal Sinai hur hahi Larabawecha. Ndaˈan nech kǝ saktǝ Urshelima nakanya, kǝthlǝm mǝthlan tǝ wanchiyan nat nda nechandǝ kǝ mafecha. 26 Kǝɗu Urshelima tǝɗi nech hulafǝrta, peˈ wa kǝ mafata wa, mǝthlan nech kǝ man mǝn. 27 Kǝthlǝm nechan kǝ yaraɗan, ndat wa,

"Mbunu fat fa chǝ nunefa kwareya,

chaɗi tam wakchǝ sǝk hatǝ nggǝtta.

Shenuˈu yi mbǝnfata tǝ kapa ɓǝrata

chaɗi tam wakchǝ chukuta.

Kǝthlǝm wanchi nuɗi nawak tǝ chimaɗan si terchan nda

mbǝrandǝ wanchi nuɗi ha naa chimaɗan si."*

28 Kun, wanmanchina, chokmǝn kǝ wanchi Farta tǝmɗi ɗǝf mee kǝɗ Ishaku. 29 Kǝɗ ǝnɗi choh waa thla nggǝttǝ fee, kǝɗ ǝnɗi thlǝ nggǝttǝ nafchǝ wancha, ɓahan kan thla nggǝt tǝ fee tǝmɗi alkǝti Shemeti Farta, nechan kǝɗu kǝ nakanya.✝

30 Paɗaa mǝ mbuˈtǝ kwastǝ ndiktaˈan? "Rǝkandǝn nuɗi kǝ mafat yu tǝ waˈyan, kǝthlǝm wanan i mafaɗan nggech mbǝs chaktǝ hur kǝnawa tǝ wanɗi nuɗi nggowakchǝ kǝ mafat yu wa."✝ 31 Kǝthlǝm ndaˈan wanmanchina, nggǝmǝn ngga nechamǝn kǝ wanchi nuɗi nech kǝ mafata wa, nechamǝn kǝ wanchi nuɗi nggawakchǝ kǝ mafata.