1 Kǝthlǝm chok inɗiya, hǝraˈamǝndǝ Kǝrǝsti. Thlaram changchang, kǝ nggǝr wun fǝr indiyowun, kǝ kǝnowunchi fee tǝ chalala yi chok mafakǝt paɗ wa.

2 Kam thlǝmat ha, nggǝta Bulus nech mbuˈowunda, tǝ ndat wa, ma ǝ nggǝm wun fa kǝ hechowunchǝ fee, thleya pǝnchan wa Kǝrǝsti nenǝ tǝ mbǝs ǝnhar kǝɗiyowun wa. 3 Nggǝt nggǝr mbuˈowun nda tǝ alkǝtfa kǝmɗi chǝka wuni, thla nggǝmchǝ fa kǝ hechan fee, ndat wa, chokchan nwaat kǝ para nat ǝnɗi mbuˈtǝ kusiˈ wa kǝ chǝ fee. 4 Kun tǝɗi nech ka hǝraˈta tǝmɗi para kusiˈ, kǝtawun indiyowun kesh hur Kǝristi, karkowun kaakǝti Farta.

5 Kǝthlǝm tǝmɗi alkǝti Shemeta, ɗǝftǝmǝn kǝfatsi kǝ namǝn ndiiti mbǝs kaakǝti Farta, kǝthlǝm fǝr kit. 6 Maa nggǝmǝn hur Kǝrǝsti, hecheta ndu kumi hecheta ngga meˈi ǝn natǝn wa. Ənɗi mbǝranchǝ ndǝt ha, ndaˈan nech kǝ fǝr kit, thla thlǝ pǝnchǝ indiyan tǝmɗi mbǝnfata.

7 Choh kun rakata kun ɗǝt kǝ pang keˈkeˈ. Wun ˈyatowunchǝ fǝr maanan tǝ kittaˈan? 8 Sǝninchi wa lǝmǝnɗiya ngga mǝɗi thla ˈyech wunchi wa. 9 Kǝɗ ǝnɗi mbuˈtǝ fee, Yisti ngguɗyeh kǝɗa thlǝ ɗǝfchǝ fuhwa njohǝma kǝ hupa. 10 Fǝrinchǝ kit kǝmɗiyowun hur thlǝm Thlǝwira Yesu, tǝ ndat wa, nowun para ndikti yowun samǝn kǝ malawun thla inchi mbuˈowundi wa. Nafɗi thlǝ nech thlaˈandǝ hur inchiyowun, naa fee chakan mee, chǝka wun nakan.

11 Wanmanchina, mamwa paˈ kǝ nakanya tǝni ɓassa tǝ ndat wa, nwaat kǝ hechan fee nafcha, kǝthlǝm mii paˈ kǝ nakanya thlǝ naa fee ɓahita? Maa kǝɗuyu natǝn kǝ kittaˈan, ndiktǝɗi nati mbuˈta ndat wa kukwan fee Yesu kǝ ɗar palangnda, mǝ nech kǝ ǝna chǝt wansarta kǝmɗi chǝkawun wa. 12 Maa kǝ ndǝ fee wa, nafchǝɗi thlǝ nech thlaˈandǝ hur inchiyowun, kǝ nggǝmndǝ fa, kǝ tasan fee sahtǝ karchiyandǝ kaɗ nat.

13 Kun wan manchina, ˈyech fee wunchi ngga kǝthlǝm chok mafakǝta wa. Paɗaa kaɗam har kǝ chok kumi mafakǝtˈyowun kǝ chok kǝ yi ǝnɗi yahtǝ fata. Tǝmɗi mbǝnfata kǝ nowun kǝsandǝ raˈansi. 14 Ichiɗi nat naa kusiˈ mbuˈta, ɓi keˈkeˈ tǝ kusiˈ tǝɗi ndech wa, "Yahu wanmu, kǝɗ ǝnɗi yahtu indiyo" * 15 Kǝɗu maa kun ǝsˈraˈan kǝnowun yandǝ tǝ raˈan, mbǝramsi, kǝthlǝm tǝ minni nat wun tǝkandǝ raˈan ha.

16 Ndiktinchi ndat wa, kǝ chok natˈyowun hur Shemeta. Maa kǝɗu nowun chǝt tarchiɗi yahtǝ fata wa. 17 Tarchiɗi thlǝ yahtǝ fata tǝthl nǝ chǝt atǝkrekǝta tǝ Shemeta. Paɗ tarchiɗi thlǝ yahtǝ Shemeta tǝthl nǝ chǝt atǝkrekǝta tǝ ǝnɗi yahtǝ fata. Ichiɗi chap ya tǝthl nandǝ yaan raˈan, kǝthlǝm kǝ mbahan wun chǝt ǝnɗi yahtǝ wun wa. 18 Maa Shemeti Farta nech parat tǝ wunchi, ngga nechowun hur kusiˈ wa. 19 Tarchi fata nechan hayang, fen nech kǝ, fǝlaukǝta, chǝt tǝkǝmǝn icha, tǝ kaa mban sǝk mbǝndǝ fa yi kumi hartǝ fata, 20 tǝ manaandǝ ɗǝhacha, tǝ hurkakta, tǝ kar raˈan, tǝ yaanda, tǝ sǝraˈ raˈan, tǝ sǝɓtǝ wanɗǝkaɗata, tǝ yah inda, tǝ chaktǝ ha, tǝ thlaˈ mbata, 21 tǝ ǝna fata, tǝ nggathla tǝ ǝnɗi nech hurandǝ indǝ kaɗi, tǝ nggomnda yi saa ichiɗi nech tǝrandǝ nefa, tǝ takǝt ɓǝɓifecha kǝɗ feya. Nggǝt yanowun nda, kǝɗ ǝnɗi chiti choh, ndat wa fee thlǝ nech chǝt weˈtǝ ichǝ ini, nggandǝ mbǝs maandi hulafǝrta wa.

22 Paɗaa mbǝs ǝna thla thlǝ fǝrtǝ Shemeta, fen nech kǝ, mbǝnfata, tǝ chiɗ chiɗ tǝ wanɗǝkaɗata, tǝ kǝɓikaɗi, tǝ kǝrǝs ǝna, tǝ chit kafata, tǝ kaakǝta, tǝ chit ǝnɗi naa nef chǝt ndiˈchan, 23 tǝ paˈpaˈ tǝ hur inda, tǝ kǝmmǝ kǝta. Fee thlǝ chich weˈtǝ ichiɗiya nggǝ kusiˈ tǝkan her tandǝ fa wa. 24 Paɗ fee nech kǝ yi Yesu Kǝristi, tapi kukwandǝ ǝna chitˈyanda yi fata, tǝ ɓǝɓiˈ icha samǝn samǝn, thla thlǝ yah tǝ fata. 25 Maa Shemet thlǝ nech parat tǝ minchi, malaman natˈyamǝn ha kǝn tǝmɗi Shemeta. 26 Kǝ chokmǝn kǝ fǝ maan incha wa, ndu fǝ thlaˈandǝ hur inchi raˈan, ndu sǝraˈ raˈan wa.