1 Kun wanmanchina, maa ǝ nii fee yowuna mǝthlan hur chǝt ɓǝɓifata, kun tǝɗi nech hur Shemeta, nggǝrang kowun kaɗi tǝ kafata. Mbǝramsi inchiyowun, kǝthlǝm kun paɗ kǝ hǝmwun kǝ hur yah icha wa. 2 Kǝsaman raˈansi tǝmɗi tǝr heˈti raˈan. Tǝ kǝɗuyu nowun ndiiɗa ndǝ kusiˈ i Kǝristi ha. 3 Maa tǝr yowun wa ǝn nakan, paɗaa mǝthlan ngga ǝna wa, tǝn lǝm indiyan.

4 Malaman chǝka wuni kǝ kaɗan tǝ tarchiyan kǝ na. Maa ǝ chǝ ndiˈchan, kǝnan mbahǝn thlaˈandǝ indǝ kǝ ɗar ichiɗi chitǝn tǝ indiyan, ngga wa tǝn kaɗa ndǝ indiyan tǝ yowun wa. 5 Kǝthlǝm kǝmchan si chǝka wuni kǝ chǝt tarɗi fǝrandǝ fee.

6 Nat thla chaˈandǝ fee ndikti Farta har, kǝ chak tǝ ichiyan nat yi kaakǝta tǝ thla chaˈan chǝ har.

7 Kǝ lǝm wun inchiyowun wa, pǝnawu fee ɗathlǝ Farta wa. Nat ǝnɗi hǝftǝ nefa ndaˈan natǝn hathlanda. 8 Thla chehcha tǝ yahti wanɗǝkaɗat ˈyan, tǝ yah ti wanɗǝkaɗat ˈyan nan hathl mǝthlan. Thla chehcha ǝ Shemeta, tǝmɗi Shemeta nan hathl shishingnda kǝ poriˈ. 9 Kǝ hatamǝn ha tǝ chǝt tar kaakǝta wa, kǝthlǝm namǝn hathlǝ tǝ chectaˈan, maangga tǝ wulamǝnchǝ wa. 10 Kǝthlǝm ndaˈan, maa mbandǝsi, kǝmchan si kǝ kǝsamǝn nafchǝs nat. Kapaɗan fenchǝmǝn fee fǝrchǝ kit kǝ Kǝristi.

11 Ɗǝpaman paktǝ yerechiɗi thlǝ nati yarowundǝs tǝ herinchi.

12 Fee thlǝ pinanchǝ nafcha wa mbǝra ndǝ tandǝ ha tǝ teri fata, fen thlǝ nech kweˈyowundǝ fa, kǝ hechowunchi fee. Ənɗi ɗǝfchǝ kǝ nandǝ chit kǝɗu, kǝthlǝm tǝ nandǝ rakandǝ saa ɓahta ha, kǝthlǝm ndik palangndi Kǝrǝsti. 13 Chǝka fee hechandǝ fee tanda, para wandǝ kusiˈ taˈan wa. Kǝɗu yah chandǝ kǝ hechowunchǝ fee, kǝthlǝm kǝ thlaˈandǝ inda, tǝ ndat wa, hechowunchǝ fee.

14 Paɗaa ǝ mǝɗinchi, nggi thlaˈan tǝ indi kǝ ɗar ǝna wa, mangga yi palangnda i Chinmǝn Yesu Kǝrǝsti wa. Kǝthlǝm palangǝnɗiya ɗǝfchǝ ichiɗi nech hur heshi, chok wa kǝ ǝn mǝɗinchǝ wa, kǝ nden wa tapi kukwan fee ichiɗiya, kǝ ɓǝra palangngǝnɗi kukwandǝ fee Yesu. Chokchi kǝɗ nafɗi tapech kǝ malan tǝ ichi heshiɗiya. 15 Hechata tǝ kumi hechata ngga meˈi ǝna wa. Yuwa chokta ndaˈan nech meˈi ǝna. 16 Kǝɓikaɗi i Farta tǝ haɗamǝn ndǝ ˈyan fa, kǝ chok kǝ ɗar fee nech para kusiˈtǝɗi, ndat wa, Israila yi kit i Farta.

17 Thlaˈtǝ nakanya, kǝ nggǝr yowun ɗahitǝ in wa, kǝthlǝm nggǝt tǝ kwar mǝrǝngchǝ fa, thla pincha wa nggǝt mafati Chinda Yesu.

18 Wanmanchina, kaakǝti Chinda Yesu Kǝrǝsti, kǝ chok tǝ shemetˈyowun. Kǝ chok kǝɗu.