1 Ə tǝr kwathl kanan Ndiktǝsi, Ndiktaˈan nechan ndǝ tǝ Farta, Ndiktaˈan paɗ nechan kǝ Farta. 2 Mǝthlansi tǝr kwathl kanan tǝ Farta.

3 Tǝmɗiyan chǝt Farta chǝkami, ǝnsi tarech ha nggawakchǝ tǝmɗiyan wa. 4 Ndiktaˈan nech kǝ fǝl mbǝs shishingnda, shishingngǝn inni paɗ nech kǝ ɗaˈakǝta thlǝ pǝnanchǝ nafchǝ mbanda. 5 Ɗaˈkǝɗan wenan tǝ wuthlan kaɗi, wuthlan nech mbahǝn nggǝlan tǝ ɗaˈkǝɗan wa.

6 Thlǝn Farta yowun nefa thlǝman wa Yohanna. 7 Thla ɓecha kǝ mbuˈandǝ nafcha ǝnɗi sǝndǝn kǝ ɗar ɗaˈkǝta. Kǝthlǝm nat nafcha kǝ sǝk ndǝ ndiktaˈan kǝ fǝrndǝ kit. 8 Yohanna tǝ indiyan ngga mǝthlan nech kǝ ɗaˈkǝɗan wa. Ɓechan mbuˈ ndikta kǝ ɗar ɗaˈkǝɗan. 9 Mbuˈchǝ Yohanna wa, ɗaˈkǝt si thla nech kǝ kittaˈan nduk ha kǝ yim kǝ hur heshi, thla nech ɗǝf nafcha kǝ nandǝ mǝt ha.

10 Nechan hur heshi, chich Farta heshiˈan tǝmɗiyan, chǝka kǝɗu heshiˈan sǝnwa nda wa. 11 Ɓechan kǝmɗi nafchiyan, chǝka kǝɗu nafchiyan thlǝwandǝ anchi wa. 12 Nat fee thlich anchi, paɗ fǝrndǝ kit kǝ thlǝman, fǝrandech alkǝta kǝ chok ndǝ kǝ wanchi Farta. 13 Tǝ nggǝr fee nggǝt tanda, ngga wa kǝɗ thla thlǝ nggǝttǝ nunefa wa, ndu tǝmɗi yahti wanpong nafcha, ndu tǝ yahti hish nefa wa. Kǝɗu nggǝtchǝ fee tanda tǝmɗi Farta.

14 Paɗ Ndiktaˈan chǝkan kǝ nefa, chokkan hur heshi mǝɗiya ǝ hur mǝn. Ɓamǝn kan kaakǝt kaˈan tǝ kittaˈan. Nimǝn maandiyan tǝ wenitiyamǝn. Maanda thla fǝrandǝ Chinan wanɗeng thlutiyan.

15 Ndik kǝ Yohanna kǝ ɗaran tǝ kapa ɓǝrata. "Mǝthlanniya thla ndatiyu wa, ‘Yowunsi nech ɓat kǝrsǝna, thla nech manchan mǝ nggǝta, mǝthlansi, kǝ choh kǝn nggǝta.’ "

16 Kǝthlǝm kapa kakǝtɗi fǝrandǝ Farta, natmǝn thlǝmǝn kǝnau pafǝn har, kǝ ɗaran kǝ ɗaran. 17 Farta fǝrchan kusiˈ tǝmɗi Musa, kǝɗu kaakǝti Farta tǝ fǝrkit ɓechan tǝmɗi Yesu Kristi. 18 Yowunsi tam chǝ naa Farta wa? Thla nech kǝ wanɗeng thlutiyan ndak, thla nech tǝ indiyan kǝ Farta. Thla nech nduk tǝ wanɗǝkaɗati Chinda, mǝthlan pincha, ndu wun nech kǝ Farta.

19 Ənɗi mbuˈtǝ Yohanna thlǝ chǝt baptisma fartǝɗi thlǝndǝ paktechi Yahudawecha ǝ Urshelima. Pangngǝncha tǝ fee thlǝ ɗǝpech Wiri Farta har kǝmɗi Yohanna kǝ chǝhandǝ mee wa, "Wun nako?" 20 Mbuˈankan kittaˈan tanda, wuɓawa ndu wun nakan wa, ndakan wa, "Ngga nggǝt nech kǝ Kǝristi wa."

21 Chǝhan kandǝ mee wa, "Maa kǝɗu, wun naa ko? Chǝnech kǝ Iliya wa?" Nggǝrang kan tandǝs wa, "Auwa, ngga nggǝta wa." Nda kanda wa, "Chǝnech kǝ thlǝ mbanɗi Fartiyu wa?" Nggǝrang kan tandǝs wa, "Auwa, ngga nggǝta wa."

22 Kǝɗu ndangkan nda wa, "Wun nako? Mbuaˈandǝn kǝthlǝm kǝ ɗǝ ǝn mbuˈandǝ fee thlǝnchi nggaˈan. Mǝ thlǝ mbuˈtu kǝ ɗar indiyo?"

23 Nggǝrang kǝ Yohanna tandǝs tǝ ǝnɗi mbuˈtǝ thlǝ shenuˈtǝ tǝ yahti Farta Ishaya. Ndat wa, "Nggǝt nech kǝ hur ɓǝrati nefa thla nech ˈya fata ǝ hur chenjeya. Thla nech ndat wa, ‘Tahsaman mbandi Chindǝ kaɗi, tahsaman kaɗ ndellengnga.’ "

24 Hur fee thlǝndǝ fee fowun Farisiyawecha huran. 25 Chǝhan kandǝ Yohanna tǝ ndat wa, "Mangga chǝnech kǝ Kǝristi wa, ngga Iliya nako wa. Paɗ ngga chǝnech kǝ thlǝ shenuˈtǝ tǝ yahti Farta thla nech ɓata wa. Maa kǝɗu kǝthlǝm mǝ thlǝ chandu nafchi baptisma? Wun fǝruchǝ alkǝt chǝt baptisma?"

26 Tǝ kǝɗu nggǝrang kǝ Yohanna tandǝs wa, "Nggǝta, thlǝ chi chi baptisma tǝ ema, yowun si kit hur wun, thla sǝnwaktǝ wun anchi. 27 Chǝka mǝ ɓechan kǝrsǝ na, chaˈwisi kǝ kwasani sahtǝ pahamchiyan ha wa."

28 Sǝɓchǝ ichiˈni ǝ hahi Betani, tǝ mǝt che Farta ǝ kufi Urdun, mǝɗi naa Yohanna chǝt baptisma.

29 Əssaɗan Yohanna nakan Yesu ɓat tǝmɗiyan, paɗ ndakan wa, "Nama, Wan Chohrati Farta thla nech tǝrandǝ ɓǝɓifati heshi kaɗi. 30 Thleya nech kǝ nafɗi ndikti kǝ ɗaran tǝ ndat wa, ‘Nef ɓata ǝ kǝrsǝ naa thla pǝɗichǝ ha. Kǝthlǝm mǝthlan hur heshiɗiya kǝn fee nggǝt nenchi.’ 31 Nggǝta sǝnwi anchi wa, kǝɗu nati chǝt baptisma tǝ ema kǝthlǝm kǝ pǝni anchi kǝmɗi nafchi Israˈila."

32 Yohanna ndakan wa nggǝt minni, "Ninchi Shemeti Farta ɓat kaha kǝɗ kunggurha ǝ hulafǝrta, kǝ choktǝ fiyan. 33 Choh sǝnwi wa mǝthlan wa. Kǝɗu Farta thla thlǝnchi nenchǝ kǝ chi baptisma tǝ ema. Mǝthlan mbuˈicha wa, ‘Nafɗi natu Shemet ɓat kah kǝ chok tǝ fiyan, methlan nech chǝt baptisma tǝ Shemeti Farta.’ 34 Ninchi tǝ wenitinchi, kǝthlǝm ndaˈan, nggǝt mbuˈowunda, nafɗiya Waˈi Farta."

35 Əssaɗan nggǝrkǝ Yohanna kǝ minni thlarkan ha fen tǝ kǝmsichiyan chap mǝɗan. 36 Nakan Yesu wiˈta nakan ɗǝpanda, ndakan wa, "Nama, wan Chohrati Farta."

37 Kǝ sǝkkǝ kǝmsichǝɗi chap i Yohanna yu kǝɗu, chat parakandǝ Yesu. 38 Yesu ɗǝpakan kǝrsǝn, nakan tandǝ para anchi, chǝhangkan tanda wa, "Mǝ natwun kata?"

Ndang kan nda wa, "Rabbi" (Saktaˈan wa thlǝ "Chaˈanan kaɗi"), "Necho ayi tǝ chokta?"

39 Nggǝmankǝ Yesu tanda wa, "Ɓama nowun nata." Ɗǝk kǝmsichaˈan naa mǝɗi natǝn tǝ chokta, chokkan ndǝ ha tǝ anchi fartaˈan. Nduk tǝ wanshengnan foɗɗa tǝ yarti farta.

40 Artǝ hur kǝmsichiɗi chap sǝkchǝ ndikti Yohanna paɗ parakandǝ Yesu yu, nech kǝ Andrawus wanman Siman Biturus. 41 Nggakkǝ Andrawus kaa wanmanan Siman, ndangkan wa, "Mbǝssamǝn Masiha" (Ndaˈan nech kǝ Kǝristi). Tǝ mee i Ibraniyawecha "Mashiha" tǝ Helenanci paɗ (Kǝristi). Ndaˈan nech kǝ thla paˈandǝ fee fiɗeta ndu Kǝristi. 42 Ɗǝkan tǝ Siman kǝmɗi Yesu.

Ɗǝpankǝ Yesu, ndangkan na, "Chǝnech kǝ Siman waˈi Yohanna. Nech fee ˈya wech wa Kefas." Ndu Biturus, thla naa saktaˈan wa "Ɗekwena".

43 Əssanɗan Yesu ɗǝfkan wanɗǝkaɗatsi kǝ ɗǝ kǝ Galili. Mbǝsankan Filibus, ndangkan wa, "Paro nenchi."

44 Filibus nefi Betsaida, mǝrǝɓɗi ɓaandǝ Andrawus tǝ Biturus. 45 Filibus ɗǝkan mbǝs Nataniyel. Ndangkan wa, "Mbǝsa ǝn nafɗa thla yara Musa kǝ ɗaran hur kusiˈ, tǝ fǝ mbanchǝ paɗ yarinda kǝ kafˈyan.Thlǝman wa Yesu thlǝ Nazarata waˈi Yusufu."

46 Nataniyel chǝhakan mee tǝ ndat wa, "Na ka ǝn ɓat kesh ǝ Nazarat wa?"

Ndang kǝ Filibus wa, "Tama, kǝ ɗin nata."

47 Kǝ nakandǝ saˈta, nak Yesu Nataniyel ɓat kǝmɗiyan, ndangkan wa, "Nama thlǝ Israˈilawat tǝ kit fiyan, lektǝs hur ˈyan wa."

48 Nataniyel chǝhan kan Yesu wa, "Sǝncho nenchi wa kǝni?"

Nggǝman kǝ Yesu ndangkan wa, "Ninchi wechi kan ɗǝftǝ shukwata, kǝn Filibus ˈyawechi."

49 Nggǝman kǝ Nataniyel Yesu wa, "Thlǝ Chaˈanan kaɗi, chǝnech kǝ Waˈi Farta, chǝ paɗ nech kǝ kwitiri nafchi Israˈilawecha."

50 Ndangkǝ Yesu Nataniyel wa, "Kǝthlǝm ǝ mbuˈuchi wa ninchi wech kan ɗǝftǝ shukwata, fǝrtu kitsǝ hacha wa? No naa paktǝ ichiɗi pǝɗanchi fee ha ya tǝ maanda." 51 Yesu ndangkan wa, "Kittaˈan nati mbuˈowun nda, nowun naa hulafǝrta in ha, fǝ thlǝnchi Farta tǝrtǝ kafǝrta tǝ ɓat kaha kǝmɗinchi. Nggǝta Waˈi Nefa tǝ nggǝrandǝ in kafǝrta tǝ ɓat kaha kǝmɗi nati."