1 "Kittaˈan nati mbuˈowunda Farisiyawecha, nat thla yim wakchǝ tǝ mii kǝtǝn chaap chohrecha, kǝɗu tǝrkan tǝ thlarta. Chok chan kǝ yera, thlǝ fasa fat paɗ. 2 Thla yim chǝ tǝ mii kǝnnda, mǝthlan nech kǝ thlǝ para chohrechaˈan. 3 Thlǝ ɗǝpa mii kǝttǝnan har thlǝ inanchansi, chohrechaˈan paɗ thlǝ sǝkchan ndǝ ɓǝratiyan. Thlǝ ˈyechan chohrechaˈan tǝ thlǝm chinnanda, kǝ chendech kesh. 4 Kǝrsǝ nggomaandǝ ya’an kesh nat, hǝmkan kǝ pangnga, chohrechaˈan kǝrsaˈan, kǝthlǝm ǝ sǝndǝ ɓǝratiyan. 5 Nandǝ tam para kǝrsǝ rema wa, nandǝ raka ndǝ har, kǝthlǝm sǝn wandǝ ɓǝratiyan wa." 6 Mbuˈandech Yesu ndiktaˈan tǝ mbǝr ndikta, kǝɗu mbǝsa wa ndǝ saktǝ mbǝr ndiktaˈan wa.

7 Kǝthlǝm ndaˈan, nggǝr kǝ Yesu mbuˈandǝ tanda wa, "Kittaˈan, nati mbuˈowunda, nggǝt nech kǝ mii kǝnda kǝthlǝm chohrecha. 8 Nat fee lech ɓata tǝ ndat wa, fen nech kǝ nggǝta, yaarcha, paɗ fǝ fasa fecha, kǝɗu chohrechaˈan sǝk wandǝ tan nda wa. 9 Nggǝt nech kǝ mii kǝn nda, thla yimchi tǝmɗinchi nan mbǝs hǝraˈta, nandǝ yimndǝsi kǝ chendǝ kesh paɗ kǝ paranda. 10 Thlǝ ɓech yera kǝthlǝm kǝ yarka, kǝ ɓǝlantǝ ǝna, paɗ kǝ sǝɓanchi kaɗi. Nggǝta ɓechi kǝthlǝm kǝ mbǝs ndǝ shishingnda, kǝ mbǝs ndǝ ǝnɗi nat yahtǝ nda.

11 "Nggǝt nech kǝ thlǝ parata thla nech ndiˈchan. Thlǝ parata thla thlǝ yahchǝsi kǝ fǝr tǝ shishingndiyan kǝthlǝm chohrechaˈan. 12 Thla tǝr tǝ fee kǝ thlǝ parata, ngga kit tǝ thlǝ parata wa, chohrechaˈan ngga yaˈan wa. Kǝthlǝm ndaˈan ma nii tǝ wuɗhǝngga ɓata, malkan chohrechaˈan ha rakakan. Wuɗhǝnggiˈan paɗ kǝskan har arta welan kan takichaˈan ha. 13 Thla tǝr tǝ fee kǝ thlǝ paraɗan, rakechan kǝthlǝm tǝ tǝr fee anchi kǝ thlǝ parata, kǝmawu ǝn tǝ chohrechaˈan wa.

14 "Nggǝt nech kǝ thlǝ parata thla nech ndiˈchan. Sǝninchi chohrechin, chohrechinchi paɗ sǝndǝ nenchi. 15 Kǝɗ ǝnɗi sǝn ndǝ Papa nenchi, nggǝt paɗ sǝninchi Chinda. Thlǝ fǝrchi shishingndin chi kǝthlǝm chohrechaˈan. ✝ 16 Fowun chohrechinchǝsi fee nawakchǝ kǝ yi chaap ɗi ya. Fen paɗ nwaat kǝ ɓi tǝ tanda. Nandǝ kan thlǝmat ɓǝratinchi, nandǝ choktǝ kǝ chaap arta, thlǝ parat artǝ paɗ. 17 Kǝthlǝm thleya, ndaˈan thlǝ yahtǝ Chindǝ nenchi, kǝthlǝm thlǝ fǝrchi shishingndinchi kǝ nggǝri tǝrtǝ kaɗ paɗ. 18 Nefsi nech mbahǝn thlǝni shishingndinchi har wa, kǝthlǝm nggǝt tǝ indinchi thlǝ fǝrcha. Alkǝtinchi si kǝ fǝri paɗ kǝ tǝri kaɗi. Thlǝchi alkǝt ini thlaˈtǝ mǝɗi Papa."

19 Kǝthlǝm ndiktǝɗiya thla mbuˈtǝ Yesu, nggǝr kǝ chak tǝ ha yimndǝ kǝ pǝthlǝr Yahudawechaˈan. 20 Terchan hur nanda nda kanda wa, "Ɓǝɓi shemet fiyan tǝrkan kafǝrta. Kǝthlǝm mǝi natwun sǝk anchi?"

21 Fowun paɗ nda kan nda wa, "Auwa, ndiktǝɗiya ngga yi thla naa ɓǝɓi shemet parat tǝ anchi wa. Awi naa ɓǝɓi shemet mbahǝn ǝnandǝ weniti komndǝ ha wa?"

22 Hur wifta, Fartaˈan fee mbǝnfa inandǝ wiri Fartǝ ha ǝ Urshelima. 23 Paɗ nechan ǝ hur wifta, nak Yesu wiˈtǝ kan kuwurti Sulemanu hur wiri Farta.

24 Keɗu tawran kǝ Yahudawechaˈan, ndan kanda wa, "Kǝ kwati natu mal nggaˈan hur sakainda? Ma chi nech kǝ Kǝristi mbuˈa ǝn ndǝn ɗarat."

25 Nggǝman kǝ Yesu tanda wa, "Tapi mbuˈowunchi fǝr wowun kitsǝ wa. Tarchiɗi thlǝ nati chita tǝ thlǝm Papa, fen thlǝ sǝnanchǝ nafchǝsi ndu wun naki. 26 Kǝɗu fǝrwowun kit wa, kǝthlǝm ngga nechowun hur chohrechinchi wa. 27 Chohrechǝ ɗinchiya thlǝ sǝkchandǝ ɓǝratǝnchi, sǝninchi tanda, thlǝ nechandǝ para nenchi paɗ. 28 Thlǝ fǝranchi shishingndǝ tanda kǝ kwekichi, ngga wa tǝ nandǝ tǝktǝ kaɗ wa kǝ poriˈ, thlǝ thlǝnandat hur harinchiwa. 29 Papa tǝɗi fǝri chi tanda pǝɗantǝ chika wun ha tǝ maanda, nefsi nech mbahǝn thlǝnandat ǝ hur heri Chinda wa. 30 Nggǝt tǝ Chinda nechaˈan arta."

31 Nggǝrkǝ Yahudawechaˈan har ɗakwancha tǝ nandǝ mǝmaka ndǝ fa. 32 Nggǝman kǝ Yesu tanda, ndakan wa, "Chowunchi icha thla nech ndiˈchan terchan paɗ mǝɗi Papa, ǝ ɗar yen hur nanda natwun mǝmaki tǝ fa?"

33 Nggǝman kǝ Yahudawechaˈan wa, "Ngga wa kǝthlǝm tarɗi chitu thla nech ndiˈchan nat ǝn mǝmaku tǝ fa wa, kǝɗu kǝthlǝm ndiktǝ njir Farta. Kǝthlǝm chǝ wan pong nefa, kǝɗu nako nggǝrandǝ indiyo kaɗ keˈkeˈ tǝ Farta."✝

34 Nggǝman kǝ Yesu tandǝ tǝ ndat wa, "Nechan kǝ yaraɗan hur Kussiˈyowun tǝ ndat wa, ‘Ndinchi wa kun farcha wa’? ✝ 35 Sǝn ǝn wa Yara Ndikti Farta nechan kǝ kit kǝ kwekǝɗan nggǝr wa ha wa. Paɗ Farta ˈyakan nafchi ini wa farcha, kǝ nafchiɗi fee fǝrandǝ fee ndiktiyan. 36 Nggǝta thla tatǝ Farta thlǝnkan nenchi kǝ hur heshi. Kan tǝ kǝni natwun ndat wa nggǝt njir Farta kǝthlǝm ndinchi wa, ‘Nggǝta Waˈi Farta’? 37 Manga teri Papa nati chita wa, kǝ fǝrwun kit kǝ nenchi wa. 38 Ma ndaˈan nati chita, chika fǝrwowun kit kǝ nanchi wa, kǝɗu fǝram kit kǝ tarchaˈan. Kǝthlǝm kǝ sǝnwun, paɗ kǝ wathlowunchi tǝ ndat wa, Chinda ǝ hwirinchi, nggǝt paɗ hwirˈyan."

39 Nggǝr kan ndǝ kweˈtǝ ha kǝ kǝsandǝ Yesu, kǝɗu hǝraˈkan her yanda.

40 Nggǝr ke Yesu nggǝran ndǝ in kǝ kǝrsǝ Kufi Urdun, mǝɗa nggak tǝ Yohanna chit baptisma tǝrkwathl kanan, chok kan minni. ✝ 41 Ɓak nafchi terchan kǝmɗiyan. Ndakandǝ wa, "Tamwu Yohanna chit ǝna saka inda wa, kǝɗu nat ǝnɗi mbuˈtǝn kǝ ɗar nafɗiya kittaˈan." 42 Ə minni nafchi terchan fǝrkandǝ kit kǝ Yesu.