1 Yowun nefsi naa thlǝman wa Liˈazarus thla haɗcha ǝ Betani, wan mirɓi ndǝ Maryamu tǝ wanmanan Marta. 2 Maryamu tǝɗiya paɗ, mǝthlan paˈanchi Yesu fiɗeɗi nech mbinchan paˈankan kaɗ paɗ tǝ waas indiyan. Liˈazarus tǝɗi nech haɗchan, mǝthlan nech kǝ wanmanan.✝ 3 Kǝthlǝm ndaˈan, wanmanchaˈan kǝ nǝssa thlǝnan kandǝ Yesu, tǝ ndat wa, "Chinmǝn, thla thlǝ yahtu haɗchan nakanya."

4 Kǝ sǝkkǝ Yesu ndakan wa, "Hatǝfaɗa nggech saˈ kǝ mǝrta wa. Chichan kǝɗu, kǝthlǝm kǝ maanan fee Farta, tǝ minni paɗ kǝ maanan fee Waˈi Farta." 5 Kǝthlǝm yah Yesu Marta tǝ wanmanan, Liˈazarus. 6 Tǝ kǝɗu kǝ sǝkkan kusheˈtaˈan wa Liˈazarus haɗchan, nggǝrkan chekandǝ mǝndǝ chap kwandǝn ǝ mǝɗi natǝn.

7 Kǝrsǝ ndaˈan, ndang kan kǝmsichiyan wa, "Nggǝraman in kǝ Yahudiya."

8 Kǝmsichiyan ndanka ndawa, "Thlǝ Chaˈanan kaɗi, wan minchiɗiya yahtǝ Yahudawecha kǝ mǝmakuchi ndǝ fa. Yah kosiya kǝ nggǝreen in kǝ minni paɗ wa?"

9 Nggǝmankǝ Yesu tanda wa, "Ngga wanshengnan kum nggǝrsǝ chap ǝ parta wa? Nat thla wiˈchǝ hur Farta nggech che wan sarta wa, kǝthlǝm ɗaˈkǝti heshi kǝ wenantǝ mǝt kaɗi. 10 Kǝɗu nat thla nech wiˈtǝ wiita, thlǝ chechan wan sarta kǝthlǝm ǝnsǝ nech fǝran ɗaˈkǝta wa."

11 Kǝrsǝ shenuˈchǝɗi mbuˈtǝn ya, ndang kan tanda wa, "Shiketǝmǝn Liˈazarus ǝ saˈtǝ ˈyena, nggǝt paɗ chi thlaˈanda hur ˈyen ˈyan."

12 Ndang kǝ kǝmsichiyan wa, "Chinmǝn, ma ˈyen saˈtǝn, nan thlaˈta." 13 Yesu thlǝ nechan mbuˈanda ndikta kǝ ɗar mǝrti Liˈazaru, kǝɗu nak kǝmsichaˈan kaɗat wa tǝn mbuˈanda ndik saˈ ˈyena ndak.

14 Kǝn Yesu mbuˈandat ɗarat wa, "Ə mǝr Liˈazarus. 15 Kǝthlǝm ndaˈan nggǝt mbǝnfata paɗ nggǝt sǝ minni wa, paɗ natwun nowun mbǝs mbanda kǝ fǝrwun kit kǝ nenchi. Tama kǝ ɗǝmǝn mbǝs anchi."

16 Keɗu Toma thla thlǝ ˈyafee wa Moɗata ndang kan fenchaˈan kǝmsicha wa, "Nggǝmǝn paɗ tama, kǝ ɗǝmǝn mǝrtǝ tǝ anchi."

17 Kǝ saˈkǝ Yesu kǝ minni, sǝkkan wa mǝr Liˈazaru thlohan fee sheˈ mǝndǝ foɗɗa hur kwiya. 18 Betani nechan nduk tǝ Urshelima, saˈwa kilomita mahkan wa. 19 Terchan Yahudawechiɗi ɗi ɓech kǝmɗi Marta tǝ Maryamu kǝ chandǝ sǝsi tǝ mǝrti wanmana nda.

20 Kǝ sǝkkǝ Marta wa Yesu ɓata, ɗǝkan mbǝs anchi hur mbanda kǝ chantǝ marapa. Kǝɗu Maryamu nakan chokta hur wira.

21 Ndang kǝ Marta Yesu wa, "Chinmǝn, mamwa chǝsi mǝ mǝrwu wanmana wa. 22 Chika nakanya ǝ sǝninchi ma shiyeni Farta nan fǝru nat ǝnɗi shiyandu."

23 Ndang kǝ Yesu wa, "Wanmu nan thlaˈta."

24 Ndang kǝ Marta wa, "Sǝninchi wa, nan thlaˈta fartǝ thlaˈti mǝmatecha ǝ ndukwati heshi."

25 Ndang kǝ Yesu wa, "Nggǝt nech kǝ thlaˈti mǝmatecha, paɗ nggǝt nech kǝ shishingnda. Nat thla fǝrchi kit kǝ nenchi, chika mǝrchan nan nggǝr nat ha. 26 Nat thla nech tǝ shishingndǝ, paɗ fǝrkan kit kǝ nenchi, nggech mǝrwa kǝ kwekǝchi. Fǝrin kit kǝ ndaˈan wa?"

27 Ndan kǝ Marta wa, "Aa, ai Chinmǝn, fǝrinchi kit tǝ ndat wa chi nech kǝ Kǝristi, Waˈi Farta thla nda fee wa, nan ɓat kǝ hur heshi ɗiya."

28 Kǝ mbuˈkǝ Marta kǝɗu, ɗǝkkan kaɗ kǝ ˈya wanmanan Maryamu, ndakan wa, "Thlǝ Chaˈanan kaɗi mǝɗiya mǝthlan ˈya wechi." 29 Kǝ sǝkkan kǝɗu, Maryamu thlaˈkan tǝ weshetfa kǝmɗi Yesu. 30 Yesu paɗaa, tapa wa ǝ yim kǝ hur mǝrɓan wa, mǝthlan mǝɗi choh ɗǝt Marta mbǝs anchiyu. 31 Yahudawechiɗi nech choktǝ tǝ Maryamu hur wuran, tandǝ ndan sǝssi. Kǝ nakandǝ anchi thleˈ tǝ weshet fa che kandǝ kesh, parakandǝ anchi kaɗatˈyanda wa tǝn kǝmɗi thloha ndǝ fee wanmanan, kǝ ɗǝ tǝt minni.

32 Kǝ saˈkǝ Maryamu kǝmɗi naa Yesu, nakan anchi, pǝɗakan kǝ koptǝ ha panggǝn nan ndangkana, "Chinmǝn, mamwa chisi mǝ mǝrwu wanmana wa."

33 Kǝ nak Yesu anchi tǝta, paɗ tǝ Yahudawechiɗi ɓat nda nat tǝ anchi fen paɗ tandǝ tǝta, mǝrkǝ fatˈyan kaɗi thlaˈkǝ hur indiyan kaan. 34 Ndakan wa, "Ɗǝf chowun anchi kǝ kayi?"

Ndang kan ndawa, "Chinmǝn, ɓo no."

35 Tǝk Yesu tǝ ˈyamǝta. 36 Kǝthlǝm ndaˈan Yahudawechiɗi nech minni nda kanda wa, "Ɗǝpama yahtǝ anchi kaˈan."

37 Kǝɗu fowun hur nanda ndang kandǝ raˈan wa, "mbahǝn tǝ inandǝ weniti komǝndǝ ha. mǝ chit mbahǝn waktǝn ǝna thla nech njan nafɗa mǝrta?"

38 Haɗan kan ta ndǝf kaˈan, ɗǝkan kǝ mǝt kwi mǝrtaˈan. Kwiyan pehchi fee fi ɗekwenan, tǝ ɗekwen paɗ nggǝlandǝ fee si. 39 Ndak Yesu wa, "Pata man ɗakwanan kaɗi." Marta wanman mǝrtaˈan ndang kan Yesu wa, "Chinmǝn nakanya nan nat saˈchan, thlohanchi fee tǝ mǝndi foɗɗa."

40 Ndang kǝ Yesu wa, "Ngga tapi mbuˈuchi wa ma ǝ fǝrin kit no naa maandi Farta wa?"

41 Patan kandǝ ɗakwanan kaɗi. Thlaˈan kǝ Yesu indǝ kǝ hulafǝrta ndakan wa, "Ai Chinda, chuchi usoko tǝ ki thlǝmata. 42 Chik yen parta sǝninchi wa thlǝ sǝkcho nenchi, tǝ kǝɗu mbuˈchi kǝɗu yu wa kǝthlǝm fee nech mǝɗiya kǝ fǝr ndǝ kit wa chi thlinchi nenchi."

43 Kǝ ndakan kǝɗu, thlaˈan kan ɓǝrata tǝ alkǝtfa nda kan wa, "Liˈazarus, ɓo kesh." 44 Keɗu nafɗa mǝrchiyu ɓakan kesh, harchiyan tǝ sarchiyan kǝnan fee tǝ kukwata, chimandiyan paɗ kǝnan fee tǝ kapa thlohta.

Ndankǝ Yesu tanda wa, "Kwasamǝn ha, kǝ kalwun nde ha, kǝ pǝɗa."

45 Terchan hur Yahudawechǝɗi ɓat ndǝ nat tǝ Maryamu, kǝ nandǝ ǝnɗi chit Yesu, fǝr kandǝ kit kǝ anchi. 46 Fowun hur nandǝ ɗǝkandǝ kǝmɗi Farisiyawecha, mbuˈan kandǝ tanda ǝnɗi chit Yesu. 47 Kǝthlǝm ndaˈan, paktǝ panggǝncha tǝ Farisiyawecha nggoman kandǝ takǝt paktechaˈan. Chihan kandǝ raˈan wa, "Nechamǝn chit wa kǝni? Nafɗiya mǝthlan chit ǝna saka indǝ kaˈan. 48 Ma malamǝn kǝn ɗǝt kǝ pang kǝɗaya, nat nafcha nandǝ fǝr kit kǝ anchi. Ma kǝɗu naa Romawecha ɓata kǝ thlǝnandǝ wur nggomndiyamǝn tǝ hahiyamǝn."

49 Artǝ hur nandǝ naa thlǝman wa Kayafa thla nech kǝ kapa pangnda ǝ thlǝ haɗan, ndangkan tanda wa, "Kunaa sǝnwowun ǝna wa. 50 Sǝnwowun tǝ ndat wa, kweˈchan nef arta kǝ mǝra kǝthlǝm nafcha, minni hahiˈan nat kǝ sǝɓ ndǝ kaɗ wa." 51 Ndiktiɗi ndiktǝ Kayafa ngga yi indiyan wa, nechan kǝ kapa pangnda thlǝhaɗan, tǝ mbuˈtǝ ǝnɗi nech sǝɓtǝ ǝ pangnga. Tǝ ndat wa, naa Yesu mǝrta kǝthlǝm nafchi Yahudawecha. 52 Ngga wa kǝthlǝm Yahudawechǝ ndak wa, kǝthlǝm kǝ nggoman tǝ wanchi Farta fee welchǝ ha nat, kǝ chokndǝ arta.

53 Kǝthlǝm ndaˈan, thlaˈtǝ Fartaˈan thlen kandǝ ha wa, nandǝ ɓǝlandǝ Yesu. 54 Kǝthlǝm ndaˈan nggǝrwu Yesu wiˈtǝ hur Yahudawecha ǝ papal wa. Malkan mǝɗan ha, ɗǝkan kǝ hahiɗi nech nduk tǝ chenjeya, yim kan kǝ hahiɗi naa thlǝman wa Ifrayimu. Chokkan ha tǝ kǝmsichiyan minni.

55 Kǝ saˈkǝ fartǝ mbǝnfa Tathli Yahudawecha nduk. Nafchi terchan wan mǝrǝɓchaˈan ɗǝkan ndǝ kǝ Urshelima, kǝthlǝm kǝ chapandǝ inchiyandǝ kaɗi kǝɗ ǝnɗi nda kusiˈ taˈan kǝn mbǝnfaɗan saˈta. 56 Nakan ndǝ kaa Yesu, thlar kandǝ ha hur wur nggomnan nakandǝ chihandǝ raˈan tǝ ndat wa, "Ɗǝpanchowun wa kǝni, nan ɓat kǝ mbǝnfaɗiya wa?" 57 Kǝthlǝm paktǝ pangngǝn cha tǝ Farisiyawecha fǝrndǝ kusiˈ tǝ ndat wa, nat thla sǝnchi mǝɗi naa Yesu, kǝ mbuˈandechi. Kǝthlǝm kǝ ɗǝndǝ kǝsa nda.