1 Kǝn mbǝnfa tathlǝ saˈta. Sǝn Yesu wa saˈ wanshengnan ˈyan thla natǝn mal heshiɗi ha ya kǝ nggǝranchiˈin kǝmɗi Chinda. Kǝthlǝm thlǝrɗaktiyan kafi nafcha hur heshiɗiya, pǝnantǝ thlǝrɗaktǝ nafchiyan nggǝ sǝrtaˈansǝ wa.

2 Fartǝɗi naa Yesu sǝm ɗǝsǝmnda tǝ kǝmsichiyan far wita, tapi yim hweˈrǝ kǝ huri Yahuda Iskariyoti wa ˈi Siman kǝ hiyantǝ Yesu kaɗi. 3 Yesu paɗ shin wa Chinda ɗǝftǝ chika mǝ nat kǝ herˈyan, shin paɗ wa ɓechan thlǝma Farta, paɗ kǝmɗiyan natǝn nggǝrandǝ in. 4 Thlaˈkǝ Yesu mǝt sǝm ɗǝsǝmnan, ɗǝfkan ɗǝchiptiyan ha, tǝrkan chimbit paˈ fata kǝnkan kǝ filˈyan. 5 Thlǝrkan ˈyem kǝ hur wan tiɓa, nggakkan chapandǝ sar chi kǝmsichiyan, nakan pǝtandǝ kaɗ tǝ chimbit paˈ fatˈyan, thla kǝndǝn kǝ filˈyan. 6 Kǝ ɓak Yesu kǝ in Siman Biturus, ndankǝ Biturus wa, "Ai Chinmǝn, chinech chapandǝ sarchinchi wa?"

7 Nggǝrankǝ Yesu wa, "Shin wen ǝnɗi nati naa chutǝ nakanya wa, kǝrsaˈan nan wathluta wa."

8 Ndankǝ Biturus wa, "Auwa, nggo tam chapanchǝ sarchinchi wa."

Nggǝmankǝ Yesu wa, "Mangga tǝ chapani sarchiyowa, ngga yin nako wa."

9 Ndankǝ Siman Biturus wa, "Chinmǝn, ngga sarchinchi ndak natu chapanda wa, no chapandǝ ta harchinchi tǝ indinchi paɗ."

10 Ndak Yesu wa, "Ma tapi fan nefa, tǝn chǝɗchǝɗ kǝɗu yu. Nggech yah fandǝ paɗ wa tǝn chapandǝ sarchiyan ndak. Kǝthlǝm nechowun chǝɗchǝɗ, chika nakan wa, ngga nat wun wa." 11 Kǝthlǝm sǝn Yesu thla nech hiyandǝ kaɗi, ndaˈan nda tǝn wa, "Ngga nat wun nech chǝɗchǝɗ wa."

12 Kǝrsǝ tǝɓandǝ chapandǝ sarchaˈan ˈyanda, mǝkkan kapatˈyan, nggǝrankan in kǝ mǝt choktiyan. Chihan kan tanda wa, "Ə wathlowunchi ǝnɗi chowun ndi ɓukwiya wa? 13 Thlǝ ndechowun wa Thlǝ Chaˈandǝ kaɗ naki, tǝ Chinmǝn paɗ. Mbuˈwun keˈkeˈ, kǝthlǝm kǝɗu nati. 14 Ma nggǝta ɗi nech kǝ Chinda, tǝ Thlǝ Chaˈanan kaɗi, chapani sarchiyowun, kun paɗaa kǝmchansi kǝ chapawun yi raˈan kaɗi. 15 Tǝ fǝrowunchi saktaˈan kǝthlǝm kǝ chiwun kǝɗ ǝnɗi chowundi. 16 Kittaˈan nati mbuˈowunda, mafata mbǝrawa thlǝ wirˈyan ha wa, thla thlǝ ndǝ fee mbǝra wa thla thlǝnchi anchi ha wa.✝ 17 Nakannya kǝ sǝnkowun ichiɗiya, nowun chokta tǝ mbǝnfata, ma thlǝnawun tanda wa.

18 "Ngga kǝ indiyowun nat nati ndikta wa. Sǝninchi fee taati. Tǝ kǝɗu nwaat kǝ ndiiɗan fee ǝnɗi mbuˈtǝ fee hur ndikti Farta tǝ ndat wa, ‘Thla sǝmchǝ kulkuli inchi, ǝ thla i chi fa.’ 19 Tǝni mbuˈowun thleya nakanya kǝna sǝɓta, kǝthlǝm kǝ fǝrwun kit ma ǝ sǝɓ ǝnaɗan paɗ kǝ fǝrwun kit kǝ nenchi. 20 Kittaˈan nati mbuˈowun nda, nat thla thlich thla thlǝndi tǝ wanɗǝkaɗat arta, nggǝt ni thlǝtǝn yu. Thla thlich nenchi paɗ tǝ wanɗǝkaɗat arta, ǝ thlǝt thla thlǝnchi nenchi."

21 Kǝrsǝ mbuˈ ichiɗiya, thlaˈ hur indi Yesu kaˈan hur wanɗǝkaɗatˈyan. Mbuˈkan ɗarat wa, "Kittaˈan nati mbuˈowunda, artǝ hurwun nan hiyitǝ kaɗi."

22 Ɗǝpankǝ kǝmsichiyan raˈan, kǝthlǝm sǝn wandǝ wun naa Yesu ndikti kǝ ɗaran wa. 23 Artǝ hur kǝmsichiyan, thla thlǝ pǝnandǝ Yesu thlǝrɗaktǝ kaˈan, mǝthlan ɗas nduk tǝ Yesu. 24 Ndang kǝ Siman Biturus tǝ hera wa kǝ chihantǝ Yesu kǝ ɗar wun natǝn ndiktaˈan.

25 Chat kǝmsiˈan mbǝha kan nduk, tǝngǝs kan ha kafi Yesu chihan kan tǝ ndat wa, "Ai Chinmǝn, wun nakan?"

26 Nggǝman kǝ Yesu tǝ ndat wa, "Mǝthlan nech kǝ thla nati fǝran fishirtǝ kulkuli tǝɗi ma yiɓinchi kǝ hur tiɓa." Kǝ tǝrkǝ Yesu kulkulitaˈan yiɓkan kǝ hur tiɓa, chat tǝrkan fǝrankan Yahuda waˈi Siman Iskariyoti. 27 Kǝ thlǝkan kulkulitaˈan chat yim kǝ hweˈrǝ kǝ hurˈyan. Ndang kǝ Yesu wa, "Ənɗi natu chita, chu leɗ leɗ." 28 Yowun si chika arta hur fee nech sǝm ɗǝsǝmnan tǝ Yesu, sǝnchi ndu michicha mbuˈandǝn kǝɗu wa. 29 Kǝthlǝm Yahuda thlǝ kǝschǝ wanɗǝɓǝthlchi ˈyanda har. Fowun hur nanda nakandǝ kaɗata wa, mbuˈan Yesu wa kǝ ɗǝ hi ɗǝsǝmnda thla yahtǝn nda kǝthlǝm mbǝnfaɗan. Ndu kǝ fǝrantǝ fǝ ɓahcha wanɗǝɓǝthlan. 30 Kǝ thlǝkan fishirtǝ kulkulitaˈan, chat chekan kesh. Tapi chi farwita.

31 Kǝ chek Yahuda kesh, ndak Yesu wa, "Nakannya naa fee manaandǝ Wa ˈi Nefa, kǝɗu paɗ naa nafchi manaandǝ Farta tǝmɗi wanan. 32 Ma ǝ maanan fee Farta tǝmɗiyan, naa Farta fǝran Wanan maanda tǝmɗi indiyan, paɗ nan fǝran maanda chat kǝɗuyu.

33 "Wanchinchi fee nech ngguɗyǝh, takchan wanshengnan ngguɗyǝh kǝɗa nati nat tǝ wunchi. Nowun kaa nenchi, kǝɗ thla mbuˈandǝ Yahudawecha wa, ‘Mǝɗi nati ɗǝta nowun mbahǝn ɗa wa,’ kǝɗu paɗ nati mbuˈowundǝ nakanya.

34 "Yuwa kusiˈ nati fǝrowunda, ndat wa pǝnaman thlǝrɗaktǝ raˈan. Kǝɗ thla pǝnowun ndi thlǝrɗakta, kǝɗu paɗ kun kǝ pǝnawun thlǝrɗaktǝ raˈan. 35 Tǝ minni naa chika wun sǝnda wa kun kǝmsichinchi, ma pǝnawun thlǝrɗaktǝ raˈan."

36 Siman Biturus chihangkan Yesu wa, "Chinmǝn necho ɗǝt kǝ kayi?" Nggǝman kǝ Yesu wa, "Mǝɗi nati ɗǝta nggo mbahǝn ɗǝ nakannya wa, tǝ kǝɗu kǝrsaˈan no mbahǝnda."

37 Ndang kǝ Biturus wa, "Chinmǝn, kǝthlǝm mǝ nawakti mbahǝn parawechi nakannya? Ni fǝr shishing ndinchi kǝthlǝm cha."

38 Nggǝman kǝ Yesu wa, "No fǝr shishing ndiyo kǝthlǝm nggǝta wa? Kittaˈan nati mbuˈuta, kǝn chakkartǝ kwartǝ ɓukwiya, no asˈin nenchi harkaiˈyo mahkan."