1 Yesu nakan ɗǝt kǝ pang tǝ ndikta tǝ kǝmsichiyan. Nda kan wa, "Nggǝtta mbuˈowunchi nat ichiɗiya kǝthlǝm kǝ ɓǝ ǝn tukuthl kǝ malawun fǝrkit kǝ nenchi wa." 2 Nandǝ rǝkkowundǝ kesh hur kǝtǝn nggomnda. Kittaˈan nati mbuˈowunda Fartaˈan ɓata thla naa chika wun ɓǝlowun cha kaɗat wa tǝn teraandǝ Farta. 3 Na ndǝ chit weˈtǝ ichiɗiya kǝthlǝm tam wandǝ sǝn Chinda ndu nggǝta wa. 4 Mbuˈonchi ichiɗiya, kǝthlǝm ma sheˈ Fartaˈan ˈyanda, kǝ kǝɗuk wun wa taminchǝ mbuˈowunda. Mbuˈowun wi ichiɗiya ǝ tǝrkwathl kanan wa, kǝthlǝm peˈchi tǝ wunchi. 5 Kǝthlǝm ndaˈan nakanya tǝ ni nggǝrandǝ in kǝmɗi Papa thla thlǝnchi nenchi, kǝɗu paɗ yowunsi chihichǝ hur wun wa, cho kayi wa? 6 Kǝthlǝm nakanya ǝ mbuˈowunchi ichiɗiya, ndiiɗ kǝ wanɗǝkaɗechˈyowun kaɗi tǝ sǝɓtǝ hwira. 7 Nat kǝɗu, tǝ mbuˈowunchi kittaˈan. Nan kwechowun ndǝ fa kǝ pǝɗi, kǝthlǝm manga tǝ pǝɗi wa Nefa thla nech Ndǝksowunda nech ɓǝ kǝmɗiyowun wa. Kǝɗu ma ǝ pǝɗinchi, ni thlǝnowun ndi. 8 Paɗ fartǝɗi ɓatǝn, nan pǝnandǝ nafchi heshi, ǝ kitˈyandǝs wa kǝɗar ɓǝɓifata, tǝ nat ha kǝɗ ǝnɗi yahtǝ Farta tǝ, paɗ kǝɗar chak mee. 9 Kǝɗar ɓǝɓifata, kǝthlǝm fǝr wandǝ kit kǝ nenchi wa, 10 kǝɗar kaakǝt paɗ, kǝthlǝm tǝni pǝɗat kǝmɗi Papa, paɗ peˈwowun nggǝr naa nenchi wa. 11 Kǝɗar chak mee, kǝthlǝm thlen fee chak mee i thla ha nech chit kuturaktǝ kǝ in heshiɗiya.

12 Ndang kǝ Yesu kǝmsichiˈyan wa, "Peˈ takǝt ichisi terchan thla nati mbuˈowunda, nowun mbahǝn kǝs har nakanya wa. 13 Kǝthlǝm fartǝɗi ɓa mǝthlan, Shemeta yi kittaˈan, ma ǝ ɓi nan parat tǝ wunchi nat hur kit. Kǝthlǝm nech ndik tǝ alkǝt indiyan wa. Nan ndikti kǝ ɗar ǝnɗi sǝktǝn. Paɗ nan mbuˈowun ǝnɗi nech sǝɓta kǝ panga. 14 Nan maanita, kǝthlǝm nechan tǝrtǝ hur yina kǝ mbuˈowunchi. 15 Nat ǝnɗi nechsi Papa, yinni. Ndaˈan chicha nda ti wa nechan tǝrtǝ hur ǝnɗi nech kǝ yina kǝ mbuˈowunchi."

16 Ndang kǝ Yesu kǝmsichiyan wa, "Kǝrsǝ wanshengnan top kǝɗa peˈ wowun naa nenchi wa. Kǝrsǝ wanshengnan top kǝɗa paɗ nowun nggǝr naa nenchi paɗ."

17 Kǝthlǝm ndaˈan, fowun hur kǝmsichiyan ndang kandǝ raˈan wa, "Mǝ natǝn sakta tǝ ndat wa, ‘Kǝrsǝ wan shengnan top kǝɗa nowun naa nenchi wa.’ Ndakan paɗ wa, ‘Kǝrsǝ wanshengnan top kǝɗa paɗ nowun nggǝr naa nenchi.’ Tǝ ndat paɗ wa, ‘Kǝthlǝm tǝni ɗǝt kǝmɗi Chinda?’ " 18 Ndakan nda wa, "Mǝ nech kǝ wanshengnan top kǝɗa natǝn ndiktǝ ɗaran? Nggǝmǝn sǝn wa mǝn ǝnɗi natǝn ndiktǝ kǝ ɗaran wa."

19 Yesu paɗ shin wa yah ndǝsi kǝ chihandǝ mee. Kǝɗu ndang kan tanda wa, "Kǝɗu tǝnowun chihandǝ raˈan kǝ ɗar ǝnɗi nati mbuˈti wa? Ndat wa, ‘Kǝrsǝ wanshengnan top kǝɗa peˈ wowun naa nenchi wa, kǝrsǝ wanshengnan top nowun nggǝr naa nenchi wa?’ 20 Kittaˈan nggǝt mbuˈowunda, nowun tǝta tǝ fǝfǝrta, chika tǝ kǝɗu nafchi heshi nan chit mbǝnfata. Nowun sǝɓandǝ hwir kaɗi, chika tǝ kǝɗu sǝɓtǝ hwirˈyowun nan nggǝrandǝ ˈin kǝ mbǝnfata. 21 Maa nunef chikǝta kan nggǝtta thlǝ ɓahchan ha, kǝthlǝm tǝ saˈ fartǝ nggǝttǝyansi. Kǝɗu maa tapi ɓi wanwaˈyaaran kaha, peˈ wa kuɗukta tǝ ɓahtǝɗi satǝn wa, kǝthlǝm mbǝnfa wanwaˈyaarɗi ɓech kǝ hur heshi. 22 Kǝɗu paɗ nat wun. Nakanya kun tǝ sǝɓtǝ hwira, kǝɗu ni nggǝr naa wunchi, kun paɗ naa wanɗǝkaɗech ˈyowun tǝrtǝ ha, nefsi nech thlǝ nowun mbǝnfat ˈyowun har wa. 23 Ə fartǝ ini, nowun chǝhi mee kǝ ɗar ǝna wa. Kittaˈan nati mbuˈowunda, chika mi shiya ndǝ wun Chinda hur thlǝm naa, nan fǝrowunda. 24 Chika kǝ nakan ya shi wowun ǝn tǝ thlǝm naa wa. Shiyama nowun mbǝsta, kǝthlǝm mbǝnfat ˈyowun kǝ chok ndiiɗan.

25 "Nat feya mbuˈowunchi tǝ sakchaˈan. Fartaˈan ɓata thla nawakti nggǝr mbuˈwunda tǝ saktaˈan, kǝɗu tǝ ni mbuˈowunda kǝ ɗar Chinda ɗarat. 26 Ə Fartaˈan nowun shita tǝ thlǝmna. Nggi ndowunchǝ tǝ ndat wa, ni shiyan tǝ Chinda kǝ indiyowun wa. 27 Kǝthlǝm Chinda tǝ indiyan thlǝ pǝnowunchan thlǝrɗakta, kǝthlǝm pǝnichǝwun thlǝrɗakta, paɗ fǝrwun kit wa ɓechi mǝɗi Farta. 28 Aa, ɓechi mǝɗi Papa, yimki kǝ hur heshi, paɗ nakanya tǝni mal heshiɗi haya kǝ nggǝrani in kǝmɗi Papa."

29 Kǝɗu ndak kǝmsichiyan wa, "Nakanya thlǝ ndikcho ɗarat, ngga tǝ sakchaˈan wa. 30 Sǝn ǝn nakanya wa shinin chika mii. Ngga maa chǝhuchǝ yowun wa. Thleya ɗǝfchǝ nggaˈan kǝ fǝr ǝn kit wa ɓecho mǝɗi Farta." 31 Chihan kǝ Yesu tanda wa, "Fǝrwun kit nakanya wa? 32 Kǝthlǝm Fartaˈan ɓata, kǝɗaya tapi ǝ ɓi, thla naa fee welowundǝ ha, chika wuni kǝ nggǝranchi in keuriyanda, kǝ malwun nenchi ichinna. Chika tǝ kǝɗu, ngga nechi nat inchin naa wa, kǝthlǝm Papa nan nat thlǝman naa. 33 Mbuˈowunchi ichiɗiya nat kǝthlǝm kǝ mbǝs wun kǝɓi kaɗi mǝɗinchi. Hur heshi nowun sa ɓahtǝha kǝ kaɗowun chinda tǝ sǝɓtǝ hwira, kǝɗu mbǝnam fata, kǝthlǝm thlǝthlichi pang kǝ in ǝ heshi."