1 Kǝ tǝɓan kǝ Yesu mbuˈ ichiɗiya, ɗǝpakan kǝ hulafǝrta paɗ nda kan wa, "Ai Papa, seˈ Fartaˈan. Manaandǝn Waˈyo, kǝthlǝm Wanan kǝ maanuchi." 2 Kǝɗ nakan wa fǝreen alkǝta kǝ ɗar pong nafcha nat hur heshiɗiya. Kǝ fǝrtǝ shishingnda kǝ poriˈ kǝmɗi nat thla fǝrandu. 3 Thleya nech kǝ shishingnda thla kǝ poriˈ kǝ sǝndǝ wechi, cha Farta arta kǝ kittaˈan, paɗ tǝ sǝn Yesu Kǝristi thla thlǝndu kǝ hur heshi. 4 Fǝruchi maanda hur heshi kǝthlǝm ǝ ndiiɗani tarɗi ha ndi tu wa nggǝta kǝ chi. 5 Paɗ nakanya, Papa fǝritǝn maanda ǝ pangǝn wa nakanya, weˈtǝ maanɗi nech si yamǝn ndǝ cha tǝ nggǝta kǝn fee chit heshi.

6 "Nggǝta tapi sǝnani thlǝmwu nafcha fee fǝritu tanda thlaˈtǝ ǝ hur heshi. Kǝ choh taˈan, nechandǝ kǝ yuwa paɗ fǝri ko tanda, fen paɗ parindǝ ndiktiyo har." 7 Nakanya sǝn nda wa chikami fǝritu ɓechan mǝɗiyo. 8 Kǝthlǝm fǝrani tanda ndiktiɗi fǝritu, fen paɗ ǝ thlǝnada, paɗ wathlandech wa ɓechi mǝɗiyo, paɗ fǝrndǝ kit wa, chǝ thlinchǝ nenchi. 9 Nggǝta nggǝt shiita kǝthlǝm tanda ngga kǝthlǝm heshi wa, kǝthlǝm fen fǝritu, fen paɗ nech kǝ yuwa. 10 Nat yina yuni, nat yu paɗ yina, nakan fǝrichǝ ndǝ maandǝ hur wanɗǝkaɗech ˈyanda. 11 Nakanya peˈwi ɗǝt kǝ pang tǝ choktǝ hur heshi wa, kǝɗu fen nechandǝ nat hur heshi, nggǝt paɗ, nggǝt ɓata kǝmɗiyo. Ai Papa thlǝ chǝɗchǝɗ kǝta, paro tandǝ har tǝ alkǝt thlǝm wiɗi fǝritu, kǝ chok ndǝ arta kǝɗ ǝnɗi natmǝn nakanya. 12 Nat fartǝɗi nati tǝ tanda, parinchǝ tandǝ har tǝ alkǝt thlǝm wiɗi fǝritu. Pǝkinchi tandǝ har, yowun si chika arta sakecha wa, mangga thla tapech kǝ chok wa nan sakat ya wa, kǝthlǝm kǝ ndiiɗ lawlawe chaˈan ha. 13 Kǝɗu nakanya nggǝt ɓata kǝmɗiyo. Nechi mbuˈ ndiktǝɗiya peˈchi hur heshi, kǝthlǝm mbǝnfatin chi kǝ ndiiɗ ha hur wanɗǝkaɗechˈyanda. 14 Mbuˈani ndiktiyo tanda, heshi paɗ kartǝ tanda, kǝthlǝm fen ngga yi heshi nakanda wa, kǝɗ ǝnɗi nati paɗ ngga yi heshi naki wa. 15 Ngga nechi shiyuta kǝ hereen tandǝ kesh hur heshi wa, kǝɗu kǝ leen tandǝ ha mǝɗi thla nech kǝ ɓǝɓiˈan ya. 16 Fen ngga nechandǝ kǝ yi heshi wa, kǝɗ ǝnɗi nati nggǝta ngga yi heshi wa. 17 Nggǝra ndǝn tandǝ kaɗ kǝ nafchi yo fee nggawak tǝ ɓǝɓifat fiyanda tǝ ndiktiyo thla nech kǝ kit, Ndiktiyo ndaˈan nech kǝ kittaˈan. 18 Kǝɗ ǝnɗi thlǝndu nenchi kǝ hur heshi, kǝɗu paɗ nggǝta thlǝndi tanda kǝ hur heshi. 19 Kǝthlǝm fen fǝrti indinchi kǝ mǝrta, kǝthlǝm fen paɗ kǝ chapan fee tandǝ kaɗi hur kittaˈan.

20 "Ngga kǝthlǝm kǝmshichaˈan ndak nati shiita wa. Nggǝt shiitǝ paɗ kǝ fee nech fǝr kit kǝ nenchi tǝmɗi shenuˈchiyanda. 21 Kǝthlǝm nat nda kǝ chok ndǝ arta, kǝɗ ǝnɗi natu cha. Ai Chinda, natu ǝ hwirinchi, nggǝt paɗ ǝ hwirˈyo, kǝɗu fen paɗ kǝ chok ndǝ hur mǝn. Kǝthlǝm heshi kǝ fǝrtǝ kit, ndat wa chǝ thlinchǝ nenchi. 22 Fǝrani tanda maanɗi fǝritu, kǝthlǝm kǝ chok ndǝ arta kǝɗ ǝnɗi natu tǝ nggǝta arta. 23 Nggǝta ǝ hwirˈyanda, chi paɗ ǝ hwirinchi, kǝthlǝm kǝ chok ndǝ arta kǝ ndiiɗan, kǝɗu kǝ sǝn nafchi heshi wa chǝ thlǝnchi nenchi. Pineen thlǝrɗaktǝ tanda kǝɗ ǝnɗi pǝnitu thlǝrɗakta.

24 "Ai, Papa, yahchisi fee fǝritu, fen paɗ kǝ chok ndǝ tǝ nenchi mǝt arta mǝɗi nati. Kǝ nandǝ maanɗi fǝritu, kǝthlǝm pinichin thlǝrɗakta ǝ fartǝɗi chiwak tǝ fee heshi.

25 "Ai Papa thlǝ kaakǝta, chika nakan wa heshiɗiya, sǝn wa wech wa, kǝɗu nggǝta sǝninchǝ wechi, feya paɗ sǝndǝ wa chǝ thlǝnchi nenchi. 26 Nggǝta sǝnani thlǝm wu tandǝ si. Paɗ ni ɗǝt tǝ anchi kǝ pangnga tǝ sǝnandat si, kǝthlǝm thlǝrɗak tǝɗi chitu kǝ chok ǝ hwir ˈyanda, nggǝt paɗ kǝ choki hwirˈyanda."