1 Kǝrsǝ ndaˈan ɗǝf kǝ Bilatus kǝ thlǝfan fee Yesu. 2 Fǝ yaancha tahǝskandǝ lǝɓokra tǝ tahcha pan kandǝ kǝ inda. Mǝkan kandǝ kapata yi kuturakta yi ˈyam kush huɓta. 3 Paɗ ɓakandǝ kǝmɗiyan nakandǝ ndat wa, "Kǝ mbar shishingndiyo, kwitiri Yahudawecha" nakandǝ mbǝmbala ndǝ fa ǝ chǝmaanda tǝ harchiyanda.

4 Kǝɗu Bilatus nggǝr kan chet kesh, ndang kan Yahudawechaˈan wa, "Nama, ni chendǝ yowun kesh kǝ sǝnwun wa mbǝsa wi tǝ ǝn fa wa." 5 Chek Yesu kesh, tǝ lǝɓokǝr taha tǝ kapa kuturakta yi ˈyam kush huɓtǝ fiyan. Ndang kǝ Bilatus tanda wa, "Anya, nafan ya."

6 Paktǝ pangǝncha, tǝ fǝ pǝk mii kǝtǝn wiri Fartǝ har, kǝ nakandǝ anchi hwakwanda, "Kukwaman. Kukwaman."

Kǝɗu ndak Bilatus wa, "pǝɗam taˈanchi kun tǝ indiyowun kǝ kukwawun. Kǝthlǝm nggǝta mbǝsa wi tǝ ǝn fa wa."

7 Paktechi Yahudawechaˈan kweˈ kandǝ ha tǝ ndat wa, "Kusiˈyamǝnsi, thla pinchǝ wa nwaat kǝ ɓǝlan fee. Kǝthlǝm tǝrchan indiyan wa Waˈi Fartǝ nakan."

8 Kǝ sǝkkǝ Bilatus ndiktiˈini chekan lekǝkan kaan. 9 Nggǝrangkan in kǝ wur kuturakta chihan kan Yesu wa, "Thlaˈ tǝ ǝ ai ɓatu?"

Paɗ nggǝrawu Yesu sǝ wa. 10 Kǝɗu ndang kǝ Bilatus wa, "Mǝ chicha nawaktu nggǝmandǝ chiha meˈinchi? Shinwen wa alkǝtinchi si kǝ kali wech ha, ndu kǝ kukuchǝ fee wa?"

11 Nggǝrang kǝ Yesu sǝ wa, "Manga Farta fǝruchǝ alkǝt ini wa mǝ nggǝ alkǝtˈyosi kǝ indinchi wa chika ngguɗyeh. Kǝthlǝm ndaˈan thla fǝrchǝ nenchi kǝ harˈyo mǝthlan mbǝruchi ha tǝ ɓǝɓifata." 12 Thlaˈtǝ fartiˈini, Bilatus kakan mbanda kǝthlǝm kǝ kaltǝ Yesu ha. Kǝɗu Yahudawechaˈan nggǝr kandǝ thlaˈandǝ ɓǝrata, nakandǝ ndat wa, "Maa kelin nafɗi ha ya, ngga shiketǝ Kaisar nako wa. Chika wun nggǝranchǝ indiyan kaɗ kǝɗ kwitira, Atǝkreti Kaisar nakan."

13 Kǝ sǝkkǝ Bilatus shenuˈti ini, chen kan Yesu kesh, chat chokkan ha kǝ mǝt chok tǝ chak mee, thla nech mǝɗi nakandǝ fee ha tǝ ɗakwancha. (Saktaˈan tǝ mii Aramiyawata wa, Gabbata.) 14 Fartaˈan, fartǝ tahǝs fa kǝ mbǝnfa tathla. Chich fee inini keˈkeˈ kǝɗ ǝ hur farta.

Bilatus ndang kan Yahudawecha wa, "Kwitiryowun ya."

15 Nakan ndǝ hwata kaan, "Pǝɗam tǝ anchi. Pǝɗam tǝ anchi. Kukwaman."

Chihan kǝ Bilatus tanda wa, "Yah wun si kǝ kukwani kwitirˈyowun wa?"

Paktǝ panggǝnchaˈan nggǝman kanda wa, "Nggaˈan ǝ kwitir ˈyaˈan sǝ wa Kaisar ndak."

16 Kǝɗu Bilatus Fǝran kan Yesu tanda kǝ kukwanda.

17 Kǝɗu fǝ yaancha pǝɗa kandǝ tǝ Yesu, tǝr tǝ palangndiyan, kǝmɗi thlǝ ˈya fee wa, "Mǝt alˈinda," tǝ Yahudawata paɗ wa "Golgota." 18 Ə minni kukwan kanda, paɗ kukwan kandǝ nafchǝ chap, thla tǝ harsǝm thla tǝ kaku paɗ Yesu hur ɗǝfitǝ nanda.

19 Bilatus paɗ yarakan ǝna sǝnandǝ nafchǝsi kǝ ɗar palangndi Yesu tǝ ndat wa, "Yesu thlǝ Nazarata, kwitiri Yahudawecha."

20 Yahudawechi paɗ terchan changganchǝ yare ini, kǝthlǝm mǝɗi kukwandǝ fee Yesu taˈan nechan nduk tǝ mǝrɓan. Yerechaˈan fee tǝ Aramiyawata, tǝ Romawata paɗ tǝ Helenawata. 21 Paktǝ panggǝnchaˈan i Yahudawecha ɗǝkandǝ kǝmɗi Bilatus. Ndang kanda wa, "Kǝ yeren wa ‘Kwitiri Yahudawecha’ wa, kǝɗu yaro wa, ‘Ndech nafɗiya wa, nggǝt Kwitiri Yahudawecha.’ "

22 Nggǝman kǝ Bilatus tanda wa, "Ənɗi yarati, tǝ yari kǝɗuyu."

23 Kǝrsǝ kukwanɗi kukwandǝ fǝ yaˈanchǝ Yesu, harkandǝ kapechˈyan chakan kandǝ ha kwalaran foɗɗa, chik yen thlǝ yaanda tǝr kan kwalaran arta. Tǝ paɗ wan hur kapa kapatˈyan, thla nawaktǝ yoˈum ndǝ fiyan, kukwa kapata thlaˈtǝ kafǝr kaha.

24 Ndang kandǝ raˈan wa kǝ thlahamǝn kapaɗi haya wa, "Tarakam ǝnɗi tǝrtu kǝ yuwa kǝ ɗaran, kǝ namǝn thla nech sǝmnda." Thleya sǝɓchan kǝthlǝm kǝ ndiiɗan fee kusiˈtǝ ɗi ndech wa.

"Chakandǝ kapechin chi ha hur ɗǝftǝ nanda,

paɗ tarakkandǝ ǝnɗi tǝrtu kǝ yuwa kǝ ɗar wan hur kapatinchi."

Kǝɗu chit fǝ yaanchan hacha.

25 Fe thlarchǝ ha nduk tǝ palangnan i Yesu, ndǝ manan tǝ wanman manan, tǝ Maryamu nu Kiliyobas, tǝ paɗ Maryamu thlaˈtǝ Magdala. 26 Kǝ nak Yesu manan tǝ kǝmsiɗi thlǝ yahtǝn kit nduk. Kǝɗu ndan kan manan wa, "Yaa ǝ waˈyo ya." 27 Kǝna ndandǝ kǝmsiˈan ˈyan paɗ wa, "Ə mu ya." Thlaˈtǝ fartiˈini Kǝmsiˈan ɗǝkan tǝ man Yesu keuriyan.

28 Kǝ sǝn kǝ Yesu wa tǝɓan fee chika mi. Ndakan wa, "Kwichimndǝ finchi, mbuˈchan kǝɗu kǝthlǝm ǝnɗi mbuˈtǝ fee ǝ hur Lawlawati Farta, kǝ chok ndiiɗan." 29 Kǝɗu kapa tiɓsi thla nech minni, thla ndiiɗa ndǝ fee tǝ ˈyam yangga ɓangɓang. Kǝnkandǝ wanɗǝ chapta kǝ ɓǝra fanggǝn mbeuta, kǝnandǝ yiɓta kǝ hur ˈyam yanggiˈan thla nech ɓangɓang, thlaˈan kandǝ kǝ mee ˈyan. 30 Kǝ thlǝk Yesu ˈyam yanggiˈan thla nǝch ɓangɓang, ndakan wa, "Ə tǝɓi." Chat, ngguɗan kan indiyan ha, kalkan shishingndiyan ha.

31 Nakan kǝ fartǝ tahǝs fa, ǝssaɗan nechan kǝ kapa fartǝ yipta. Kǝthlǝm Paktechi Yahudawecha yah wandǝ kǝ mal fee mǝrta ǝ ɗar palangnda fartǝ yiptaˈan. Shiyan kandǝ Bilatus kǝ chichendǝ sarchiyandǝ kaɗi, kǝ harandǝ mǝmatechaˈan kaha kǝ pǝɗ fee tǝ tanda. 32 Fǝ yaanchaˈan ɓakandǝ chichendǝ sarchi thla kaɗ tǝkwalth kanan, tǝ yi thla artǝ paɗ thla kukwandǝ ndǝ tanda tǝ Yesu. 33 Kǝ ɓakandǝ kǝthlǝma Yesu mbǝsan kandǝ tapi ǝ miri, chichewandǝ sarchiyan kaɗ wa. 34 Kǝɗu thlǝ Yaan thla arta thlahǝr kan ndi tǝ shukta, chat kǝɗu yu nak fera tǝ ˈyema pish tǝ kesh. 35 Thla necha mǝthlan fǝrchǝ sǝndǝsi, sǝndǝyansi kǝ kit. Shin wa tǝn mbuˈ kittaˈan, paɗ fǝrtǝ kitsi kǝthlǝm kǝt kun paɗ maˈnowun fǝr kitsi. 36 Ichiɗiya sǝɓchanda kǝthlǝm kǝ ndiiɗan fee ǝnɗi yara ndǝ fee hur laulawati Farta. Yerech fee tǝ ndat wa, "Elˈyansǝ artǝ naa fee chendǝ kaɗ wa." 37 Mbuˈ fee ǝ mǝt yowun paɗ wa, "Nandǝ ndǝpandǝ thla thlaharandǝ nda tǝ shukta."

38 Kǝrsǝ ndaan, Yusufu thlǝ Arimatiya shiyan kan Bilatus fati Yesu. Yusufu paɗ mǝthlan kimsha i Yesu, tǝ wuɓtǝ fa kǝthlǝm mǝthlan lekandǝ paktechi Yahudawecha. Tǝ yahti Bilatus ɓakan tǝr mǝrtǝ faɗan pǝɗakan tǝ anchi. 39 Nikodimus thla choh ɗich kǝmɗi Yesu ǝ wita, mǝthlan ɗǝfchǝ anchi. Nikodimus ɓakan tǝ fiɗeta thla thlǝ paˈandǝ fee mǝrta. Fiɗeɗan chich fee tǝ tǝɓtǝ fiɗe mur tǝ wanɗǝftǝ alˈul, thla saˈ tǝ lǝklǝk kǝt ˈyan kǝɗ kilo kumchit mahkan nggǝrsǝ foɗɗa. 40 Tǝrkandǝ fati Yesu waˈ faɗan kandǝ tǝ kapa thlohta thla yiɓtǝnda kǝ hur fiɗeta, kǝɗ ǝnɗi naa tar raˈati Yahudawecha kǝ ɗar thloh mǝrta. 41 Ə mǝɗi kukwandǝ fee Yesu, hǝnggi wanɗǝftǝs minni, ǝ mǝɗan yuwa kwi mǝrtǝsi si thla tamwaktǝ fee thloh nefsǝ kǝ huran. 42 Kǝthlǝm kǝt fartǝ tahǝs fa i Yahudawecha, paɗ kǝthlǝm kwimǝrtaˈan nduk ha, thlohan chandǝ Yesu minni.