1 Pung walwurta far tǝrkwalth kan mǝn lǝmo kǝ peˈ kǝ mǝt shimma. Maryamu thlaˈtǝ Magdala ɗǝkan kǝ mii kwiyan. Nakan papalaɗan, ǝ pati kaɗi ǝ mii kwiyan. 2 Kǝɗu rakakan kaɗi kǝ mbǝs Siman Biturus tǝ arti kǝmsiɗi thla thlǝ mbǝndǝ Yesu faɗan. Ndang kan tanda wa, "Tǝran fee thlǝwira hur kwi mǝrtaˈan, paɗ sǝn wa ǝn ndu ɗǝfchandǝ anchi kǝ kai wa."

3 Kan Biturus tǝ kǝmsiɗi nggak ɗǝta kǝ mǝt kwiyan. 4 Waˈ nda nggak kandǝ rakat kǝ mi kwiyan, kǝɗu kǝmsiˈan mbǝrantǝ Biturus ha tǝ rakata, lakan kǝ mii kwiyan mǝ Biturus. 5 Ɓirkan ha paɗ ɗǝpakan kǝ hur kwiyan, nakan kapa thlohtaˈan shet minni, paɗ yim wa kǝ huran kwi mǝrtaˈan wa. 6 Kǝn Siman Biturus saˈta ǝ kǝrsaˈan, thlar wa ha wa chat yimkan kǝ hur kwiyan. Nakan kapa thlohtaˈan shet minni, 7 tǝ kukwaɗi kǝnandǝ fee chǝmaandi Yesu si yu. Taˈ kǝɗu ngga tǝ Kapa thlohtaˈan wa, nechan kǝ fataˈan mǝt arta. 8 Kǝɗu arti kǝmsiɗi, lech saˈtǝ kǝ mii kwiyan yu, paɗ yimkansi. Nakan, paɗ fǝrkan kitsi. 9 (Kǝthlǝm kǝ wanshengǝn ɗiya wathlawa tandǝ kwaɗǝn wa, ǝ hur yara ndikti Fartaˈan wa, Yesu nan thlaˈta hur mǝmatecha wa.) 10 Kǝɗu kimsichaˈan nggǝran kandǝ in kaɗ keuri.

11 Nakanya Maryamu ǝ thlar kan ha heshi, kwi mǝrtaˈan nakan tǝta. Kǝ nakkan tǝɗan, ɓirkan ha kǝ ɗǝp kǝ hur kwiyan. 12 Kǝɗu nakan fǝ thlǝnchi Farta hulafǝrta chap tǝ kapech fǝ heɗǝɗa. Chok ndǝ ha mǝɗi ɗǝftǝ fee mǝrtǝ fati Yesu, thla arta tǝ indiyan, thla arta tǝ kan sarchiyan.

13 Chihan kanda, "Nunefa, mǝ chicha natu tǝta?" Nggǝman kan tanda ndakan wa.

"Tǝrandǝ thlǝwirinchi kesh," ndatǝn, "Paɗ sǝn wi mǝɗi ɗǝf tǝ ndǝ anchi wa." 14 Kǝ mbuˈkan kǝɗu, tǝɓǝrkan ha nakan Yesu kit, paɗ sǝnwa wa Yesu wa.

15 Chihan kǝ Yesu me wa, "Nunefa mǝchicha natu tǝta? Wun paɗ natu kata?"

Ndan chan ha wa mǝthlan nech kǝ thlǝ chit tar hǝngga wanɗǝftaˈan. Kǝɗu ndakan wa, "Kapa nefa, ma chǝ tǝrancha mbuˈitǝn mǝɗi ɗǝftu anchi, kǝthlǝm kǝ tǝrani."

16 Ndang kǝ Yesu, "Maryamu."

Tǝɓǝrkan ha mbuˈkan tǝ kapa ɓǝrata tǝ mii Arimiyawata, "Rabboni" (Thla naa saktaˈan wa thlǝ chaˈanan kaɗi).

17 Ndang kǝ Yesu wa, "Kǝ kishin nenchi harwa, kǝthlǝm pǝɗawi kafǝrta kǝmɗi Chinda kwaɗǝn wa. Ɗu kǝmɗi wanmanchina kǝ ndeen tanda wa, ‘Nggǝt pǝɗat kafǝrta kǝmɗi Papa, tǝ yiwun, kǝmɗi Fartinchi tǝ yiwun.’ "

18 Maryamu thlaˈtǝ Magdala ɗǝkan kǝmɗi kǝmsichaˈan, mbuˈankan kusheˈtaˈan tanda: "Ninchi Thlǝwira." Mǝthlan mbuˈanchi ichiɗiya.

19 Ə farwita tǝrkwathl kan mǝn lǝmo, kǝmsichiyan mǝt arta, mii kǝtinchaˈan ǝ nggǝthla kǝthlǝm lekandǝ paktechi Yahudawecha. Ɓak Yesu kǝ thlar tǝ ha hur ɗǝfi tǝnanda ndakan tanda wa, "Kǝɓi kaɗi kǝmɗiyowun." 20 Kǝrsǝ ndeˈini, pǝnan kan tandǝ harchiyan tǝ kileriyan. Kǝmsichaˈan ˈyan mbǝndǝ fat kaan kǝ nakan ndǝ Thlǝwira.

21 Nggǝr kǝ Yesu ndat wa, "Kǝɓi kaɗi kǝmɗiyowun. Kǝɗ ǝnɗi thlǝndǝ Papa nenchi, kǝɗuyu paɗ nggǝt thlǝn wunchi." 22 Kǝ ndakan kǝɗu, shipan kan yiptǝ tandǝ kafa, ndakan wa, "Thlam Shemeta thla chǝɗchǝɗ. 23 Ma kalawun yowun ɓǝɓifechˈyan ha, ɓǝɓifechˈyanda kalan fee tandǝ ha. Ma kalawowun tandǝ hawa, chok chan wa kalawu fee tandǝ ha wa."

24 Nakan Toma artǝ hur kum nggǝrsǝ chap thla thlǝ ˈya fee wa wanmoɗecha, mǝthlansi tǝ kǝmsichi Yesu fartǝɗi ɓatǝn wa. 25 Kǝthlǝm ndaˈan takǝt kǝmsichiɗi mbuˈankandǝ wa, "Niˈǝn Thlǝwira."

Mbuˈan kan tanda wa, "Mangga tǝ ni kwar kusa chiɗi ǝ harchiyan wa, paɗ kǝ pi wan herinchisi kǝ kwar kusichaˈan wa. Paɗ kǝ pi herinchi kǝ kileriyan wa, nggi fǝr kit sǝ wa."

26 Kǝrsǝ mǝnɗǝ foɗfoɗa kǝmsichaˈanyan paɗ tandǝ ǝ hur wiri, paɗ Toma mǝthlan tǝ tanda. Chika nakan mii kǝtinchaˈan ǝ nggǝthla ɓak Yesu kǝ thlartǝ ha ǝ hur ɗǝfitǝnanda ndakan wa, "Kǝɓi kaɗi kǝmɗiyowun." 27 Ndang kan Toma wa, "Po wanherˈyo kǝmɗiya. No harchinchi. Panan herˈyo ha po kǝ kilerinchi. Malan kumi fǝrkit kǝ kǝ firin kit."

28 Ndang kǝ Toma wa, "Thlǝwirinchi tǝ Fartinchi."

29 Mbuˈan kǝ Yesu wa, "Kǝthlǝm ǝ niin nenchi, firin kit; Mbǝs ǝn har kǝmɗi fee nawakcha paɗ fǝrndǝ kit."

30 Thlǝnan Yesu ǝna saka inchǝ terchan ǝ pangngǝn kǝmsichiyan, thla yarawak tǝ fee ha hur ɗelwertǝɗiya. 31 Kǝɗu feya yaranchǝ fee ha kǝthlǝm kǝ fǝrwun kit, tǝ ndat wa Yesu mǝthlan Kǝristi, Waˈi Farta. Tǝ paɗ ma fǝr wun kit, nowun mbǝs shishinggnda hur thlǝman.