João 8

Nuɗi kǝssandǝ fee ɗar fǝlaukǝta

1 Kǝɗu Pǝɗak Yesu kafǝr kǝ nggwal Zaitun. 2 Walwurtaˈan nggǝrkǝ Yesu yim ndǝ kǝ Wiri Farta. Nat nafcha ɓakandǝ kǝmɗiyan, chok kan ha nakan chaˈandat har. 3 Fee nech kǝ fǝ Chaˈandǝ kusiˈ i Musa kaɗi tǝ Farisiyawecha ɓakandǝ tǝ nunefa thla kǝssandǝ fee ɗar fǝlaukǝta. Thlaran kandǝ ha hur ɗǝfi tǝ nanda. 4 Ndang kandǝ Yesu wa, "Thlǝ Chaˈanan kaɗi, nuɗiya kǝssanchi fee ɗar fǝlaukǝta. 5 Kusiˈ i Musa mbuˈichan wa kǝ mǝmakaˈǝn fa tǝ ɗakwancha kǝ mǝra. Mǝ natu mbuˈtǝ kǝ ɗaran?" ✝8:5 Lfr 20:10; Msh 22:22-24 6 Chihecha ndǝ mii ɗiya kǝthlǝm kǝ kaɗa nda, kǝ mbǝssandǝ tǝ ǝnfa thla nat ndǝ ɗǝt mǝk wanharan. kǝɗu Yesu kopkan ha nggak kan yarat tǝ wanherˈyan ǝ haha.

7 Kǝ ɗǝkandǝ kǝ pang tǝ chihan miichǝ Yesu, thlaˈ kan kit. Ndang kan tanda wa, "Thla tamwakchǝ chit ɓǝɓifata hurwun kǝ nggak tǝ mǝk anchi tǝ ɗekwena." 8 Nggǝr kǝ Yesu nggut ha, nakan yarat haha. 9 Kǝ sǝk kandǝ kǝɗu, nggak kandǝ chet kesh mǝɗan artǝ arta, nggaktǝ paktǝ nafcha, kǝn fee mal Yesu tǝ nunafan ndak ǝ panggǝn nan. 10 Pan kǝ Yesu ha chihan kan mee tǝ ndat wa, "Nunefa ai tanda? Yowunsi chaku chǝ mee wa?"

11 Ndan kan wa, "Auwa, thlǝ maanda, yowunsǝ wa." Ndak Yesu wa, "Nggǝt paɗ ni chaku mee wa. Wiˈu wiˈtiyo. Thlaˈ tǝ ɓukwiya kǝ nggirin chit ɓǝɓifata wa."