1 Walwurtaˈan paktǝ pangngǝncha, tǝ paktecha, tǝ fǝ chaˈandǝ kusiˈ i Musa kaɗi, nat tǝ takǝɗ fǝchak miicha, sakan kandǝ ha. Kǝnan kandǝ Yesu, pǝɗakandǝ tǝ ndi kǝmɗi Bilatus.

2 Chǝhankǝ Bilatus, Yesu mee wa, "Chǝ nech kǝ kwitiri Yahudawecha wa?"

Nggǝman kan wa, "Aa, kǝɗ ǝnɗi mbuˈtu."

3 Paktǝ pangngǝn chaˈan nakandǝ ˈyan sǝɓtǝ ichi kaf samǝn samǝn terchan. 4 Nggǝrkǝ Bilatus chǝhan mee, "No fǝran nggǝm nan tanda wa? Ndǝpa ndǝn tandǝ ˈya sǝɓtǝ ichi terchan kafˈyo"

5 Paɗaa Yesu in wa mee wa, kǝthlǝm ndaˈan sakan kǝ indǝ Bilatus.

6 Ənɗi nech kǝ raˈati Bilatus far homba tathla, thlǝ kalchan nef ha arta hur pursuna thla shitǝ nafcha. 7 Nefsi thlǝman wa Barabas. Arta hur fee cham ndǝ fee kǝ pursuna kǝthlǝm thlaˈ mbata. Fartiɗi thlaˈandǝ ndǝ mbaɗan ɓǝl fee nefa. 8 Nggomnan mbǝha kandǝ nduk, nggak kandǝ shiyanda, kǝ kallandech pursuna ha, kǝɗ ǝnɗi sǝndǝn ha tǝ chǝta.

9 Nggǝman kǝ Bilatus ndang kan tanda wa, "Yah wunsi kǝ kalowunchi kwitiri Yahudawech ha wa?" 10 Kǝthlǝm ǝ shin Bilatus wa sǝraˈtǝ ɗǝfchi paktǝ panggǝncha kǝ fǝrndǝ Yesu kǝmɗiyan. 11 Paktǝ pangngǝnchaˈan chǝ kan kandǝ nafcha kǝ nda nda wa kǝ kal fee Barabas ha mǝni Yesu.

12 Chat Bilatus chǝhangkan tanda wa, "Mǝnati chandǝ thla ˈyat wun wa kwitiri Yahudawecha?"

13 Thlaˈankandǝ ɓǝrata tǝ ndat wa, "Kukwa maandǝn."

14 Ndak Bilatus wa, "Kǝthlǝm mii? Ɓǝɓifa mǝ chǝtǝn?"

Hwakandǝ kafǝrta, ndaka nda wa, "Kukwa maandǝn".

15 Yah kǝ Bilatus si kǝ hunantǝ wanɗǝkaɗati nggomnan ha, kalan kan tandǝ Barabas ha. Kǝrsǝ thlǝfandǝ Yesu tǝ kwirɓa, fǝrankan tanda kǝ kukwa nda.

16 Fǝ yaanchaˈan pǝɗa kandǝ tǝ Yesu kǝ wiri kwitira, (thla nech kǝ wur kutǝrakta). Nggoman kandǝ takǝɗ fǝ yaanchaˈan nat kǝ ɓanda. 17 Pang kandǝ kapat nga weˈtǝ thla thlǝ pa kuturcha, faɗ kandǝ tahcha kǝɗ lǝɓokǝr kuturakta, pankandǝ kǝ inda. 18 Chat nggak kandǝ ndan ǝna, ndat wa, "Kǝ mbar shishingndiyo kapa kwitiri Yahudawecha." 19 Nakan ndǝ ruroˈandǝf ǝ inda tǝ fangnda, nakan ndǝ chǝhan yahtǝ kafa. Kop kandǝ ha kǝɗ nandǝ fǝran mananda. 20 Kǝ tǝɓang kandǝ njir anchi, kǝtan kandǝ kapaɗi ha ngaa paa ndǝ ndǝ yu, mǝkan kandǝ kapech ˈyan kafa. Ɗǝkandǝ taˈanchi kesh kǝthlǝm kǝ kukwa nda.

21 Nakandǝ chet kesh hur mǝrɓan, nak nef ɓat mbǝrtǝ ha kǝ hur mǝrɓan, thlǝ man wa Siman, chin Alekzanda tǝ Rufus. Nefi hahi Sayarin ɗǝfka ndǝ anchi nwaat kǝ tǝrtǝ palang ndi Yesu. 22 Ɗǝkandǝ tǝ Yesu kǝ mǝɗi thlǝ ˈyafewa Golgota, (ndaˈan nech kǝ mǝɗi nech kǝɗ tǝɓ alˈincha.) 23 Minni fǝrang kandǝ ˈyam inabi thla kurtandǝ fee ha tǝ mur, paɗaa karkan sata. 24 Kukwan kandǝ ha. Tarak kandǝ ɓǝra kapech ˈyan kǝthlǝm kǝ nanda chǝka wun yen kapenǝ natǝn mbǝsta, chakan kandǝ kapech ˈyan ha pǝthlǝr nanda.

25 Saˈkǝ wanshengnan wanherha arta yi walwurta, kukwan kanda. 26 Yara kandǝ ǝnɗi ndat nda wa ǝ chi, ɗǝf kandǝ ha ɗar palangnan tǝ ndat wa, "Kwitiri Yahudawecha." 27 Fowun fǝ fasa fechǝs chap kukwan ndǝ fee ha ɓǝra palangngǝncha nduk tǝ palangndi Yesu, arta tǝ harsǝm ˈyan arta tǝ paɗ tǝ kaku ˈyan. 28 [Tǝ kǝɗu, ǝnɗi yara ndǝ fee ha hur Laulawati Farta choh ndiiɗ ha. Thla ndech wa, "Shengngan fee hur fǝ ɓǝɓifecha."] 29 Nafchiɗi nech mbǝrtǝha nakandǝ kǝkrandǝ inda tǝ mbuˈ ɓǝɓi ndikta, tǝ ndat wa, "Awi. Chaɗi ndech wa no tokandǝ Wiri Farta ha, kǝ tǝneen hur mǝndǝ mahkan. 30 Hǝraˈandǝn indiyo, kǝ tirin ka ha ɗar palangngǝnɗa."

31 Kǝɗu paɗ paktǝ pangngǝnchaˈan, tǝ fǝ chaˈa ndǝ kussiˈ i Musa kaɗi, nakan ndǝ njir ndǝ. Naka ndǝ nda ndǝ raˈan tǝ ndat wa, "Hǝranˈantǝ fowuna, paɗ wulan tǝ thlǝt indiyan. 32 Kǝristi tǝɗiya, kwitiri Israˈilawecha, kǝ tǝr ka ha ɓǝra palangngǝn ɗiya kǝ namǝn, maˈ namǝn fǝr kit." Fǝ fasa fechǝɗi kukwandǝ fee tǝ mǝthlan, paɗ nakandǝ ˈyara ndi.

33 Hur Farta, wulkǝ mǝt nat hahiˈan, kǝ wan shengnan mahkan yi farwita. 34 Ə wan shengnan mahkan, thlaˈan kǝ Yesu ɓǝrata tǝ alkǝta ndakana, "Eloi, Eloi, lama sabachthani?" Ndat wa, "Fartinchi, Fartinchi, kǝthlǝm mii kiitu kirshifa?"

35 Fowun nafcha fee thlarchi ha nduk ǝ mǝɗan sǝk kandǝ kǝɗu, ndaka nda wa, "Sǝkama, mǝthlan ˈya thlǝ shenuˈtǝ tǝ yahti Farta, Iliya."

36 Rakak yowun hur nanda, tǝtnan kan wanɗǝ chapta tǝ ˈyam inabi thla ɓangɓang, pakan kǝ fangnda fǝrang kanYesu kǝthlǝm kǝ sa. Ndak nafan wa, "Thlaram ha kǝ namǝn ndu naa Iliya ɓat kǝ tǝrandǝ kaha ɓǝra palangnan."

37 Hwak Yesu tǝ alkǝta, kǝt kan yipta yi ndukwaɗan, chat mǝrkan.

38 Kapaɗi lanchǝ mǝɗi ha nech Chiɗ Chiɗ ǝ Wiri Farta mbǝthl kan ha kwalaran chap thlaˈtǝ ɗaran kǝ kanan. 39 Kapa thlǝ yaanan thla nech kit nduk tǝ Yesu, kǝ nakan weˈtǝ mǝrti Yesu, nda kana, "Kittaˈan, nafɗa Waˈi Farta."

40 Fowun nǝssǝ paɗ tandǝ nat mǝt langnga. Hur nanda Maryamu thlaˈtǝ Magdaliya, tǝ Maryamu man Yakubu, thla nech ngguɗyeh mǝ Yusufu, tǝ Salomi paɗ. 41 Parech nǝssiɗa ndi thlaˈtǝ Galili nakan ndǝ kǝsandǝsi. Fowun nǝssǝs paɗ terchan fee ɓat ndǝ thlaˈtǝ Urshelima, tandǝ minni.

42 Fartǝ ini tǝ farwitǝ fa, fartiɗi thlǝ tahǝstǝ Yahudawech fa kǝthlǝm fartǝ yipta. 43 Yowun nefa thlǝman wa Yusufu ɓechan ǝ Arimatiya. Thla thlǝ fǝrandǝ fee manda hur paktecha, mǝthlan ɗǝfkǝfatsi kǝ ɓati kuturakti Farta. Ɗǝkan tǝ hish kǝta, kǝmɗi Bilatus kǝ shiya kǝ fǝran fee mǝrtǝ Yesu. 44 Sakan kǝ indǝ Bilatus, kǝ sǝk kan wa tapi mǝr Yesu. Chat thlǝn kan kǝ ˈyan fee kapa fǝ yaanchaˈan, chǝhangkan mee ndu tapi mǝri. 45 Kǝ wathlan kan ha ǝ mee i kapa thlǝ yaanan wa ǝ mǝr Yesu, nggǝman kan wa kǝ fǝran fee Yusufu mǝrtǝ Yesu. 46 Hikǝ Yusufu kapa thloh mǝrta, tǝrankan fati Yesu kaha, fǝtankan tǝ kapa thloh mǝrtaˈan. Ɗǝf kan ndi kǝ hur kwa thla chuh tǝ fee fii ɗǝkwena. Patang kan papalaɗan, nggǝlankan mii kwiyan si. 47 Maryamu thlaˈtǝ Magdaliya, tǝ Maryamu man Yusufu, naka ndǝ naa mǝɗi huna ndǝ fee fati Yesu ha.