1 Kǝrsǝ wan mǝnchaˈan top kǝɗa, fartǝɗi nggǝr tǝ Yesu yim ndǝ kǝ wan mǝrɓi Kafarnahum, sǝk kǝ nafchǝ wa ɓi kaɗ kyeuri. 2 Kǝthlǝm ndaˈan, nggom kǝ nafchǝ terchan, takwu mǝssǝ wa, chǝka ǝ mikǝtǝnan, paɗ ɓassan kǝ Yesu kwastǝ ndiktǝ tandǝs minni. 3 Tandǝ minni, tǝrkǝ nafchi foɗɗa nefa thla saa fatˈyan kaɗi, ɓakandǝ taˈanchi kǝmɗi Yesu. 4 Mbǝs wandǝ mbanda kǝ saˈndǝ kǝmɗi Yesu wa, kǝthlǝm terti nafcha. Terkandǝ kǝ ɗar kǝtǝn ɗi naa Yesu huran tǝ nafan, chuhwankandǝ ɗar kǝtǝnan keˈke tǝmɗi naa Yesu, kǝ nandǝ fǝr nafɗi saa fatˈyan kaɗ yu kaha tǝ mǝt hunatˈyan kǝ pangngǝn Yesu. 5 Kǝ nak Yesu fǝr kit ˈyanda, ndang kan nafɗa safatˈyan kaɗ wa, "Waˈinchi, kaluchǝ fee ɓǝɓifechˈyo ha."

6 Fartiˈini fowun fǝ chaˈandǝ kusiˈ chǝsi ɗas ɗas, nakandǝ kaɗandǝ ha hur wanɗǝkaɗechˈyanda. 7 "Mǝ chicha naa nafɗa mbuˈtǝ kǝɗuyu? Tǝr tǝ indiyan kǝɗ Farta. Wun naa alkǝt kal ɓǝɓifechˈyan sǝ ha kǝɗu maangga Farta ndak wa?"

8 Chat kǝɗuyu Yesu shin ǝ hur Shemetˈyan ǝnɗi nat ndǝ sakta hur wandǝkaɗech ˈyanda, chat ndang kan tanda wa, "Mǝ chicha natwun kaɗa ichiɗiya hur wanɗǝkaɗechˈyowun? 9 Yen nech paˈpa, kǝ ndang fee thla saa fatˈyan kaɗ wa, ‘Kaluchife ɓǝɓifechˈyo ha wa’, ndu ndat wa ‘Thlaˈu, tǝru wenichiyo, wiˈu wa’? 10 Kǝthlǝm yahchisi kǝ sǝnwun wa nggǝta, Waˈi Nefa, alkǝtˈyansi hur heshiɗiya kǝ kaltǝ ɓǝɓifech ha." Ndangkan thla saa fatˈyan kaɗyu wa, 11 "Nduchi wa, thlaˈu, tǝru wenichiyo kǝ pǝɗen kaɗi."

12 Thlaˈkǝ nafɗi saa fatˈyan kaɗ chat kǝɗuyu tǝrkan wenichiyan, chekan kesh pangngǝn nanda nakandǝ ɗǝpaanda. Nat nda sakandak inda, manan kandǝ Farta, nakandǝ ndat wa, "Tamwaˈan naa weˈtǝ ǝnɗa wa."

13 Nggǝr kǝ Yesu chet kesh kǝ mii kufa. Tertǝ nggomnda ɓakandǝ kǝmɗiyan, paɗ nggak kan chaˈandat har. 14 Nakan mbǝrtǝ ha mii kufiˈan, nakan Lawi waˈi Alfiyus ɗas kǝtǝn thlǝt chamnda. Ndang kan wa, "Paro nenchi," Thlaˈkǝ Lawi, paɗ parakan ndi.

15 Nak Yesu sǝm ɗǝsǝmnda wiri Lawi, terchan fǝ thlǝt chamincha tǝ fowun fen paɗ fǝ ɓǝɓifecha tandǝ sǝm ɗǝsǝmnda tǝ ndi tǝ kǝmsichiyan. Kǝthlǝm weˈtǝ nafchǝ terchan parech ndi. 16 Fǝ chaˈandǝ Kusiˈ i Musa kaɗi, fee nech kǝ Farisiyawecha, nakandǝ ndi sǝm ɗǝsemndǝ tǝ fǝ ɓǝɓifecha paɗ tǝ fowun fǝ thlǝt chamincha. Chǝhan kandǝ kǝmsichiyan wa, "Kǝthlǝm mǝ natǝn sem ǝna tǝ fǝ thlǝt chamincha, tǝ fee paɗ nech kǝ fǝ ɓǝɓifecha?"

17 Kǝ sǝk kǝ Yesu kǝɗu, ndangkan tanda wa, "Fee nech has has kǝmawu ǝn tanda tǝ thlǝ fǝr wanɓǝɓa wa, fee nech haɗchan ndak. Ɓawi kǝthlǝm fee nech kǝ kaa nafcha wa, ɓechi kǝthlǝm fǝ ɓǝɓifecha."

18 Kǝmsichi Yohanna thlǝ chǝt baptisma tǝ kǝmsichi Farisiyawecha thlǝ kǝrcha ndǝ kuchimnda. Ɓak fowun nafcha chǝhan mee Yesu, "Kǝthlǝm mǝ thlǝ kǝrwaktǝ kǝmsichiyo kuchimnda, kǝɗ thla thlǝ kǝrtǝ kǝmsichi Yohanna thlǝ chǝt Baptisma, tǝ kǝmsichi Farisiyawecha?"

19 Nggǝrangkǝ Yesu tandǝs wa, "Shikechi chima pera nandǝ kǝr kuchimnda ma chima periˈan tǝ tanda wa? Maa tana, peˈ chǝma periˈan tǝ tanda nggandǝ kǝr kuchimnda wa. 20 Wanshengnan ɓata, thla naa fee tǝrandǝ chima peraˈan, fartǝ ini natndǝ kǝr kuchimnda.

21 "Nefsi nech mbumandǝ ɗohtǝ kapata tǝ yuwaɗan wa. Machi kǝɗu naa yuwaɗan taˈan thlahandǝ ɗohtaˈan kaɗi, naa thlah taˈan mbǝrandǝ thla ha tang tang. 22 Nefsi nech thlǝr yuwa ˈyam yangga kǝ hur ɗohtǝ kuruɓtǝ fiya wa. Kǝthlǝm maa chikǝɗu, ˈyam yanggiˈan, nan fohandǝ kuruɓtǝ fiyan kaɗi. Nat ˈyam yanggiˈyan tǝ kuruɓtǝ fiyan nandǝ sǝɓ tǝ kaɗi. Tǝ kǝɗu thlǝ thlǝrchi fee yuwa ˈyam yangga kǝ hur yuwa kuruɓtǝ fiya."

23 Fartǝ thleya yi yipta, nak Yesu wiˈta para kan tǝ hur hǝngga pǝkata tǝ kǝmsichiyan. Nak kǝmsichiyan ɓerǝt sanggǝmǝn pǝkaɗan har ɗar wiˈta nakandǝ kangnda. 24 Ndangkǝ Farisiwechaˈan Yesu wa, "Noo, kǝthlǝm mǝ naa kǝmsichiyo chǝt tera fartǝ yipta?"

25 Nggǝrang kǝ Yesu tandǝs wa, "Changgawowun ǝnɗi chǝt Dauda wa, fartǝ ini naa mitǝfiyan tǝ takǝt shikechǝ wiˈtǝyan wa? 26 Yimkan kǝ Wiri Farta, fartǝɗi naa Abiyatha, kǝ kappa thla thlǝ fǝranchi Farta icha. Tǝrkan johuma, thla ɗǝftǝ fee ha, thla kǝmwakchisi chǝka wuni kǝ kangnga, yi fee thlǝ fǝranchi Farta icha ndak. Kangkan tǝ shikechǝ wiˈtǝyan."

27 Ndangkǝ Yesu Farisawechaˈan wa, "Tahǝschǝ fee fartǝ yipta kǝthlǝm nafcha, tahǝswu fee nafcha kǝthlǝm fartǝ yipta wa. 28 Kǝthlǝm ndaˈan ngǝt Waˈi Nefa nech kǝ Chinda paɗ tǝ yi fartǝ yipta."