Marcos 3

Kǝnan Yesu nef thla saa herˈyan kaɗ ǝ Kafarnahum

1 Fartǝ yowun paɗ, Yesu pǝɗakan kǝ wur nggomndi Yahudawecha. Paɗ ǝ minni nefsi thla saa herˈyan kaɗi. 2 Fowun nafchaˈan hur nanda kaa mbanɗi natndǝ mbǝsaandǝ Yesu tǝ ǝnfa, kǝthlǝm ndaˈan nakandǝ fiingan wenita, kǝ nanda maa nan kǝnandǝ nafan kaɗi fartǝ yiptaˈan. 3 Ndangkǝ Yesu thla sa herˈyan kaɗ yu wa, "Thlaˈu, ɓo kesh kǝ thlerin ha pangngǝn chǝka wuni."

4 Kǝn Yesu chǝha ndata, "Mǝ kǝmchisi kǝ chǝ fee fartǝ yipta? Kǝ chǝ fee kaafata a wa, ndu ɓǝɓifata wa? Kǝ hǝraˈan fee shishingnda wa, ndu kǝ ɓǝl fee fata wa?" Paɗ nggas kandǝ kǝmma.

5 Tǝɓǝr kan ha tǝ sǝɓtǝ hwira, nakan haɗ ndǝ hur, kǝthlǝm kwaˈkwa tǝ wandǝkaɗǝchˈyanda. Ndangkan nafan wa, "Panan herˈyo ha." Panan kan ha, chat kǝnkǝ haran kaɗi. 6 Chat, Farisiwechaˈan kǝna kandǝ ǝnɗi sǝɓcha chekandǝ kesh. Nggak kandǝ tahsandǝ ha, tǝ fee thlǝ kǝnanchi fili Hiridus, kǝ ɗar mbanɗi nandǝ ɓǝlandǝ Yesu.

Pari tertǝ nafchǝ Yesu

7 Nggǝrangkǝ Yesu in tǝ kǝmsichiyan kǝ mii kufi Galili. Nafchǝ terchan ɓakandǝ kǝmɗiyan thlaˈtǝ hahi Galili parakandǝ ndi. 8 Tǝ nafchi hahi Yahudiya, tǝ Urshelima, tǝ Idumiya. Tǝ wan mǝrǝɓcha kǝrsǝ kufi Urdun, tǝ Taya, tǝ Sidon, terchan ndǝ nggomcha kǝthlǝm sǝkndǝ ǝnɗi nat thlǝ chǝtǝn.

9 Kǝthlǝm tertǝ nafchiɗi nech minni, ndangkǝ Yesu kǝmsichiyan wa, kǝ tahsandǝ mǝtsi hur kwombawal, kǝthlǝm tertǝ nafchiɗi nech njekǝthl ndi. 10 Chichan kǝɗu kǝthlǝm tapi kǝnantǝ nafchǝ kaɗ terchan, ndaˈan chicha fee tǝ hatǝfech fa tandǝ ɓat nduk tǝ ndi, kǝthlǝm kǝ tǝkandǝ her fa. 11 Ɓǝɓi hwaˈarchǝ paɗ, maa ni ndǝ ndi nakandǝ hǝmndǝ ha ǝ pangngǝnan nakandǝ hwata tǝ ndat wa, "Chǝ nech kǝ Waˈi Farta." 12 Paɗ, tǝɗan kan thlǝmechˈyanda tǝ alkǝta, ndat wa, kǝ mbuˈ ndǝ wa, ndu wun nakan wa.

Taɗ Yesu kǝmsichiyan kum nggǝrsǝ chap

13 Tǝrkǝ Yesu kǝ ɗar nggwella, ˈyakan fee yahtǝn, ɓakandǝ kǝmɗiyan. 14 Taɗ kǝ Yesu kum nggǝrsǝ chap hur nanda, kǝthlǝm kǝ chok ndǝ kǝ fǝ thlǝncha. Kǝ wiˈndǝ rǝmma tǝ ndi, kǝ chaˈandǝ mǝɗˈyan, kǝ thlǝntǝ tandǝ paɗ kǝ mbuˈandǝ nafcha ndikti Farta. 15 Tǝ paɗ fǝrandech alkǝt chendǝ hwaˈarchi kesh fii nafcha. 16 Fee kum nggǝrsǝ chaptaˈan tatǝn ya,

ɗǝfankan Siman wa, Biturus.

17 Yakub waˈi Zabadi, tǝ Yohanna wanman Yakub, ɗǝfankan tanda wa Buwarnarjis, ndaˈan nech kǝ wanchi yaan era.

18 tǝ Andrawus,

tǝ Filibus,

tǝ Bartalamawus,

tǝ Matta,

tǝ Toma,

tǝ Yakub wa ˈi Halfa,

tǝ Taddawus,

tǝ Siman, thlǝ Kanˈanata,

19 tǝ Yahuda Iskariyoti, thla hiyanchǝ kaɗi.

Yesu tǝ kutur hwaˈarcha, Mbaalzabul

20 Kǝrsǝ ndaˈan, yim kǝ Yesu kǝ yowun wira, paɗ nggom kǝ nafchǝ terchan, kǝthlǝm tertǝ nafcha mǝthlan tǝ kǝmsichiyan mbǝswandǝ kǝ sǝmndǝ ǝna wa. 21 Kǝ sǝk kǝ wanmanchaˈan ichiɗi sǝbcha, ɗǝkandǝ wa nandǝ kǝsanda, kǝthlǝm fee ndat wa, "Tirkafǝrta."

22 Fǝ chaˈndǝ kusiˈ i Musa kaɗi fee ɓech Urshelima, nda kanda wa, "Mbaalzabul nech fiyan, paɗaa, tǝ alkǝti kutur hwaˈarcha thlǝ kǝtandǝn hwaˈarchi kesh."

23 Tǝ kǝɗu ˈyak Yesu nafchaˈan kǝmɗiyan, mbuˈan kan tanda saktaˈan ɗar chaˈata, ndat wa, "Nech Hweˈra mbahǝn kǝtan ndǝ hweˈrǝ kesh wa kǝni?" 24 Maa ǝ chak kuturaktǝ ha kwalaran chap, nech kuturaktaˈan mbahǝn thlartǝ ha wa kǝni? 25 Paɗaa, maa chak wir ha kwalaran chap, nech wuran mbahǝn thlartǝ ha wa kǝni? 26 Tǝ kǝɗu, maa thlaˈan Hweˈrǝ indiyan fa kǝ chak ha chap, alkǝtˈyansi kǝ thlar ha wa, ɓi hǝmdiyan ha. 27 "Nefsi chaˈchǝs kǝ yim kǝ wiri nefa, thla nech kwaˈkwa kǝ haranchi ichiyan wa. Maangga tǝ kǝnantǝ nef ini ha kwaɗǝn wa, kǝnan mbahǝn harandǝ ichiɗi nech hur wuran wa.

28 "Kittaˈan nati mbuˈowunda, naa fee kalandǝ nafchǝ ɓǝɓifaɗi ha chǝt ndǝ nat, tǝ njir Farta hur heshiɗiya. 29 Paɗaa, nat thla ndikchǝ njir fata kǝ Shemeti Farta, nggǝ fee tam kalanchi ha wa, kǝ kweˈkǝchi." ✝3:29 Luk 12:10 30 Ndikchǝ Yesu kǝɗuyu, kǝthlǝm ndi nafchaˈan wa, "Ɓǝɓi hwaˈarchǝ fiyan."

Man Yesu tǝ wanmanchaˈan

31 Tandǝ minni, ɓak man Yesu, tǝ wanmanchaˈan saˈkanda, thlarkandǝ ha heshi. Thlǝn kandǝ wa kǝ ˈyan fee tandǝ Yesu. 32 Nafchǝ terchan taurandǝ ha ɗǝɗas sǝk chaˈatˈyan, ndangkanda wa, "Wanmanchuwa tǝ mu tandǝ kaa wech heshi."

33 Nggǝrangkan tandǝs wa, "Wun nech kǝ yaa, paɗ micha nech kǝ wanmanchina?" 34 Tǝɓǝr kǝ Yesu ha, ɗǝpang kan nafchiɗi nech thlǝmaɗan, ndakana, "Ə yaa ya, tǝ wanmanchin ya. 35 Kǝthlǝm nat thla nech thlǝnandǝ ǝnɗi yah tǝ Farta, mǝthlan nech kǝ wanmana, kǝ hǝsnefa, tǝ nunefa, tǝ yaa."