Marcos 6

Kar fee Yesu ǝ Nazarat

1 Malkǝ Yesu minni ha, pǝɗakan kǝ hahiɗi maandǝn. Pǝɗak kǝmsichiyan ɓukwaˈ tǝ ndi. 2 Kǝ saˈkǝ fartǝ yipti Yahudawecha, yim kan kǝ hur kǝtǝn nggomnda, ngakkan chaˈandǝ kaɗi, tertǝ nafchiɗi sǝkchi ndi saka ndak inda.

Nakandǝ chihandǝ raˈan wa, "Mbǝschi nafɗa ichiɗiya ayi? Weˈtǝ ɗathl mii fǝrandǝ fee thlǝ mbahǝndǝn chit weˈtǝ ǝnna sakaˈinɗiya?"

3 "Ngga thlǝ kukwa ichiɗi nawa? Ngga wanɗi nggǝttǝ Maryamu niyawa? Ngga wanman ndǝ Yakubu, tǝ Yusufu, Yahuda tǝ Siman wa? Ngga fenchaˈan kǝ nǝssa tandǝ mǝɗiya tǝ mǝnchǝ wa?" Sǝɓan kandǝ hwir kaɗ tǝ ndi, karkandǝ anchi.

4 Ndang kǝ Yesu tanda wa, "Thlǝ fǝranchi fee maanda thlǝ shenuˈta tǝ yahti Farta chika tǝyeni, mangga mǝɗi maandǝn, hur wanmanchaˈan, tǝ wirˈyanda, thlǝ chǝwaktǝ fee wa."

5 Mbahǝn wa chit ǝna saka indǝ minni wa. Ɗǝf kan her kǝ ɗar fowun nafchǝ ɗǝmok nech haˈchan ndak, kǝnan kan tandǝ kaɗi. 6 Sakan kǝ inda Yesu, kǝ ɗar kumi fǝr kit ˈyanda.

Thlǝn Yesu kǝmsichiyan kum nggǝrsǝ chap

Wiˈyan Yesu wan mǝrǝɓcha, nakan chaˈandǝ ndikti Farta kaɗi. 7 ˈYakan fee nech kum nggǝrsǝ chap yu, thlǝnkan tandǝ chap chap, fǝrankan tandǝ alkǝta kǝ ɗar ɓǝɓi hwaˈarcha. 8 Paɗ ndang kan tanda wa, "Mǝ kǝswun ǝn har wa kǝthlǝm wiˈtaˈan wa, ndu yaata, ndu yakwata, ndu wandǝɓǝthla, ǝ thlipoˈyowun wa. Fangndǝ ndak natwun kǝstǝ har. 9 Kǝ powun pyehma, mǝ kǝswun kapat har samǝn wa mangga thla fiyowun wa." 10 Nat wurɗi yimnduwunsi tǝrkwathl kanan, chokamsi kǝ fartǝɗi nat wun mal mǝrɓan ha. 11 Nat mǝɗi thlǝwak tǝndǝ wunchi, paɗ karkandǝ sǝk ndiktǝ ˈyowun, maa kun mal mǝrɓan ha, kǝ thlǝfawun tǝnaˈtǝ sarchiyowun kaɗi kǝ chok kǝ ɗǝ sǝnan kǝ ɗar indiyanda ndat wa, nat inɗi kǝssǝ tanda heˈtaˈan yinanda."

12 Thlaˈkanda pǝɗakanda, nakandǝ ɓasandǝ nafchǝsi ndat wa, kǝ mallandǝ chǝt ɓǝɓifata kǝ tǝrndǝ ha. 13 Rǝkan kandǝ hwaˈarchi kesh terchan fi nafcha. Paˈan kandǝ nafchǝ terchan fiɗeta fee nech haˈchan, kǝnan kandǝ tandǝ kaɗi.

Mǝrti Yohanna thlǝ chit baptisma

14 Sǝkkǝ Hiridus kwitira kusheˈtǝ ǝnɗi sǝɓcha, kǝthlǝm wel kusheˈtǝ ǝnɗi chǝt Yesu ha chǝk tǝ yeni. Nak fowun nafchǝ ndat wa, "Yohanna thlǝ chǝt baptisma niya thlaˈcha ǝ hur mǝmatecha, ndaˈan mbǝs tǝn alkǝt chit ichiɗiya yi saka inda."

15 Fowun ndat wa, "Nafɗiya, Iliya ni thlǝ shenuˈta tǝ yahti Farta." Fowun paɗ ndaka nda wa, "Auwa thlǝ shenuˈta tǝ yahti Farta, kǝɗ arta hur fǝ shenuˈta tǝ yahti Farta yi choh.

16 Kǝ sǝkkǝ Hiridus ndikchiɗiya, ndakan wa, "Thleya Yohanna, thla ɗǝf tisi kǝ thlen fee ɓǝrata, methlan thlaˈa ndǝ fee ǝ mǝmatecha."

17 Kǝthlǝm choh Hiridus tǝ indiyan fǝr chǝ mee kǝ kǝsan fee Yohanna, kǝ kǝnan fee ǝ pursuna. Chich Hiridus kǝɗuyu kǝthlǝm kǝt Hirudiya nu wanmanan Filibus, thla kaha ndǝn, peˈ Filibus ha tǝ shishingnda. 18 Kǝ tang tang thlǝ nech Yohanna ndandǝ Hiridus wa, "Kǝmwasǝ kǝ thlǝ neeni nu wan mu wa."

19 Kǝthlǝm ndaˈan, Hirudiya taˈan, chok tǝ sǝɓtǝ hwira hur wanɗǝkaɗatˈyan tǝ Yohanna. Yahkan si kǝ ɓǝlanchi, paɗ mbǝs wa mbanan wa, 20 kǝthlǝm Hiridus lekantǝ Yohanna kaan. Shin wa nefa thla nech tǝ thlǝrɗakta mǝɗi Farta. Chiɗ chiɗ paɗ, ndaˈan kǝskǝ Hiridus Yohanna har ndiˈchan kǝthlǝm kǝ ɓilan fee wa. Thlǝ tǝrchan kafǝrta nat fartǝ ɗi naa Yohanna ndiktǝ taˈanchi, chika kǝɗu thlǝ yahchan sǝk ndiktiyan.

21 Ə ndukwadan Hirudiya ɓi mbǝs mbanda. Fartǝɗi ndiɗan ndǝ Hiridus hura nggǝttǝyan ha, tahsan kan mbǝnfata ˈyakan paktǝ fǝ tarchiyan, tǝ paktǝ fǝ yaanchi yan, tǝ paktecha ǝ hahi Galili kǝthlǝm kǝ sǝmndǝ ǝna. 22 Kǝ yim kǝ waˈi Hirudiya kǝ nunefa kǝ pangngǝn Hiridus, rǝɓkan pangngǝn Hiridus tǝ ramchiyan. Kwalkandǝ fat fǝ kaan. Ndang kǝ Hiridus wa, "Shiyu nat ǝnɗi yahtu, nii furu ta." 23 Ɗǝfangkan mee tǝ hwunˈnata, "Chika mǝ yahtu, nii furuta. Chika chak tǝ kutǝraktinchi."

24 Chekan kesh chihangkan manan wa, "Mǝ nati shita?"

Ndak manan wa, "Indi Yohanna thlǝ chǝt Baptisma."

25 Chat kǝɗuyu nggǝrankan in kǝmɗi kutǝran tǝ wesheta, ndangkan wa, "Chat chat kǝɗaya, indi Yohanna thlǝ chit Baptisma yahti hur tafata."

26 Kǝ sǝkkǝ kutǝran kǝɗuyu, thlaˈkǝ hur indiyan kaan, paɗ kǝthlǝm ɗǝf miiɗi chǝtǝn tǝ hunnata, tǝ ramchiyan, yahwa kǝ tǝnganchi ɗǝf miiɗi chǝtǝn wa. 27 Kǝthlǝm ndaˈan, chat thlǝnkan artǝ hur fǝ yaanchiyan tǝ ndat wa, kǝ ɓǝ tǝ indi Yohanna thlǝ chǝt Baptisma. Peɗak nafan, thlenkan ɓǝrati Yohanna thla nech ǝ pursuna. 28 Ɓakan taˈanchi hur tafata, fǝran kan wan nuwanan, mǝthlan paɗ ɗangkan manan. 29 Kǝ sǝk kǝ kǝmsichi Yohanna ǝnɗi sǝɓcha, ɗǝkandǝ tǝr koha fati Yohanna taˈan, ɗǝkandǝ thlohanda.

Sǝman Yesu ǝn nafchǝ aruˈ ɗǝrman

30 Kǝrsi wanmǝnchaˈan, kǝmsichiɗi thlǝndǝ Yesu kum nggǝrsi chap choh yu. Ɓakandǝ kaɗ kǝmɗi yan, mbuˈankandǝ ǝnɗi nat chǝt nda, tǝ ǝnɗi chaˈandǝndǝ nafchǝ har. 31 Kǝthlǝm nafchǝ terchan nakan ɗǝt tǝ ɓat kaɗi, mbǝs wandǝ mbanda kǝ sǝmndǝ ǝna wa, ndang kǝ Yesu tanda wa, "Ɓama tamǝ kǝmɗi nawaktǝ nafchi si, kǝthlǝm kǝ yipmǝn minni." 32 Yim kǝ Yesu tǝ kǝmsichiyan kǝ hur kwombawal, pǝɗakandǝ kǝmɗi nawaktǝ nafchissi, fen ndak.

33 Ni nafchǝ tandǝ terchan fartǝɗi nat ndǝ mal mǝɗan ha, paɗ sǝn fee tanda. Rakka kanda tǝ sarcha thlaˈtǝ wan mǝrǝbchi samǝn samǝn, paɗ saˈkandǝ mǝ tanda. 34 Kǝ tǝrkǝ Yesu kah hur kwombawal taˈan, nakan nafchi terchan. Paɗ haɗan kǝ nafchiɗi fa, kǝthlǝm nechandǝ kǝɗ chohrechǝ ɗi nawak tǝ thlǝ parat si. Chat nggak kan chaˈanda ichi har samǝn samǝn. 35 Nduk tǝ hǝmɗi Farta, ɓak kǝmsichiyan kǝmɗiyan, ndangkanda wa, "Mǝɗiya wurchis wa. Paɗaa fartǝ hǝm nda. 36 Nda ndǝn nafchǝɗiya wa, kǝ ɗǝ ndǝ kǝ mǝrǝɓcha tǝ wan mǝrǝɓ chiɗi mǝɗiya. Kǝ hiyandǝ indi yandǝ ɗǝsǝmndǝsi."

37 Nggǝran kǝ Yesu tandǝs wa, "Kun fǝraman tandǝ ɗǝsǝmnda, kǝ sǝmnda." Nggǝrankǝ kǝmsichaˈan ˈyansu wa, "Yahcho sǝ kǝ ɗǝ ǝn hi ɗǝsǝmǝnɗa yi ndǝnari kum chǝt kum chap kǝ fǝran ǝn tandǝ kǝ sǝmnda wa?"

38 Tǝ kǝɗu chǝhan kǝ Yesu tanda wa, "Ɓilshet kurmi nessiyowun? Ɗam ɗǝpamandǝn." Ɗǝpang kanda, ndang kan nda wa, "Ɓilshet ɗǝrman tǝ yirfǝ chap."

39 Ndang kǝ Yesu kǝmsichiyan wa, kǝ chokandǝ nafchǝ ha tukut tukut, kǝ ɗar hwalita. 40 Chokkǝ nafchaˈan ha michi samǝn samǝn, fowun nechan ndǝ kum chǝt kum arta, fowun kum chǝt ɗǝrman . 41 Tǝrkǝ Yesu ɓilsheɗi ɗǝrman tǝ yirefɗi chap yu, thlaˈankan indiyan kafǝrta, changkan Farta usoko. Chichenkan ɓilsheɗan ha, fǝrangkan kǝmsichiyan, kǝ chakkaandǝ nafcha. Yirǝfɗi chap yu paɗ, chakankan ha kǝthlǝm nafchaˈan nat. 42 Nat nda sǝm kanda, paɗ nggalkanda. 43 Kǝmsichiyan paɗ ngomman kandǝ takǝt chiche ɓilsheɗi, tǝ yirǝf ɗi. Ndiɗantǝ inafta kum nggǝrsǝ chap. 44 Tertǝ nafchiɗi sǝmchi ɗǝsǝmǝn ini, hǝssǝ aruˈ ɗǝrman.

Wiˈ Yesu ɗar ema

45 Chat kǝɗuyu Yesu ndang kan kǝmsichiyan wa kǝ yim ndǝ kǝ hur kombawal kǝ tallandǝ kǝ laandǝ kǝ Betsaida, mǝthlan nakan ndandǝ nafcha wa kǝ ɗǝndǝ kaɗi. 46 Kǝrsǝ mal nafchaˈan ha, pǝɗakan kǝ ɗar ngwella kǝthlǝm kǝ shenuˈ tǝ Farta 47 Chǝk far wita, kombawal taˈan hur ɗǝfi tǝ hawurta. Yesu paɗ mǝthlan ɗar wan tingringnda ichiɗan. 48 Nakan tandǝ ɓahtǝ ha tǝ kombawal tǝɗi, kǝthlǝm yah ndǝssi kǝ hurandǝ kombawal taˈan kǝ pangnga, paɗ nak rǝnniˈan nggǝra ndat kǝrsin. Katamǝta, ɓakan nduk tǝ tanda, mǝthlan wiˈtǝ ɗar ˈyaman. Yehsi kǝ pǝɗandech ha. 49 Kǝ nakandǝ anchi mǝthlan wiˈtǝ ɗar hawurtaˈan, tǝr kanda wa shemeti mǝrta. Hwakanda tǝ alkǝta. 50 Kǝthlǝm nii ndǝ anchi nat nda, paɗ lekǝ kanda.

Chat kǝɗuyu ndikkǝ Yesu tǝ tanda, ndakan wa, "Kǝ thlaˈ hur indiyowun wa, nggǝta kǝ lekǝwun wa." 51 Yimkan kǝ hur kombawal tǝɗi nat ndǝ huran, chat hunak rǝnni ˈyan ha. Sakan kǝ indǝ tandǝ kaan, 52 kǝthlǝm sǝnwandǝ saktǝ sǝman ǝn nafchǝɗi tǝ ɓilsheɗi kwaɗǝn wa. Nakan nggǝl wanɗǝkaɗat ˈyandǝ kaɗi, kǝthlǝm kwaˈkwa tǝ inda.

Kǝnan Yesu hachǝ kaɗi ǝ Janisarat

53 Kǝ chen kandǝ hawurtaˈan, saˈkandǝ kǝ hahi Janisarat, kǝnan kandǝ kombawal taˈan ha mii chichang nda. 54 Kǝ chekan ndǝ kesh hur kombawal taˈan, chat kǝɗuyu nafchiɗi nech minni, nakandǝ Yesu, sǝnkanda wa, mithlan. 55 Nafchiɗi nakandǝ rakata, ɗǝkandǝ ɗǝt kǝ wan mǝrǝɓchiɗi nech hur hahiˈyan. Nakan ndǝ ɓat tǝ fee nech haˈchan ɗar wenichiyanda, nat ǝ mǝɗi sǝktǝ nda wa Yesu minni. 56 Nat mǝɗi sǝktǝ nda wa Yesu minni, ndu kǝ hur wan mǝrǝɓ chaˈan, tǝ pak tǝ mǝrǝɓ cha, ndu mi wurcha, thlǝ nech nafchǝ ɓat tǝ hachaˈan kǝ ɗǝf ndǝ tandǝ ha mǝɗi thlǝ nggomndǝ nafcha kǝ hunandǝ tandǝ ha. Nakandǝ shiyanda, kǝ ngǝmfa, hachaˈan kǝ tǝkandǝ her mii kapatˈyan fa. Nat fee tǝkanchi her mii kapatˈyan fa, kǝndǝ kaɗi.