1 Kǝ tǝɓangkǝ Yesu mbuˈan ichiɗiya kǝmsichiɗan kum nggǝrsǝ chap yu. Chat thlaˈkan malkan mǝɗan ha, pǝɗakan nakan chaˈandǝ kaɗi tǝ ɓasǝ ǝ wan mǝrǝbchi Galili.

2 Ə fartǝˈini Yohana thlǝ chǝt baptisma ǝ pursuna. Sǝk kan ichiɗi na Kǝristi chǝta, thlǝnkan fowun hur kǝmsichiyan kǝmɗiyan. 3 Kǝ chǝhanda ndat wa, "Chǝ nech kǝ thla nech ɓata wa, ndu kǝ ɗǝf ǝn kǝfat kǝyowun samǝn wa?"

4 Nggǝmang kǝ Yesu tanda wa, "Nggǝramanˈin kǝ mbuˈawun Yohanna ǝnɗi sǝktǝwun tǝ ǝnɗi natwun. 5 Komincha tandǝ naa mǝta, tǝraɗcha tandǝ wiˈta. Fee kǝnandǝ fǝ hatǝfa tarkwangchǝfa kaɗi. Tipengcha tandǝ sǝk mǝta. Fee thlaˈandǝ mǝmatecha. Paɗ fee ɓasandǝ fǝɓahchǝ kwastǝ ndiktǝsi. 6 Mbǝs ǝn har kǝmɗi nat thla thlǝ aswakchǝ in sǝn nenchi hur wanɗǝkaɗech ˈyanda."

7 Kǝ nak kǝmsichi Yohana pǝɗata, nggak kǝ Yesu ndikta tǝ nggomǝn nafchaˈan kǝ ɗar Yohanna thlǝ chǝt baptisma. Ndakan wa, "Mǝ ɗitwun kǝ nata hur chanjeya? Tǝ ɗǝwun na nafɗi nech kǝɗ mbara pǝpǝmchǝɗi na rǝnna yiraˈandǝyu wa? 8 Maa ngga kǝɗu wa, weˈtǝ nafmǝ chet wun kesh kǝ ɗiwun nata? Tǝrchowun wa nowun na thla mǝkchǝ kapechǝɗi na wanɗǝɓithl fǝ manchan wa? Auwa, fee thlǝ mǝkchǝ weˈtǝ kapechiˈini, thlǝ nechandǝ wurchi kuturcha. 9 Mǝ hacha chetwun kesh kǝ ɗuwun nata? Thlǝ shenuˈtǝ tǝ yahti Farta wa? Aa, nggǝt mbuˈowunda, mbǝrantǝ thlǝ shenuˈtǝ yahti Farta ha. 10 Thleya ndaˈan yarandǝ fee ha kǝ ɓǝrataˈan ndat wa,

"‘Ni thlǝn thlǝ thlǝndinchi kǝ thlǝ kǝ pangnga.

Thla nech tahsaandǝ mbandiyo kaɗi, kǝ nen ɓata.’

11 Kittaˈan nati mbuˈowunda, tamwu fee nggǝt yowun ǝ hur heshiɗiya thla saˈanchǝ Yohana thlǝ chǝt baptisma wa. Nat tǝ kǝɗu, thla nech ngguɗyeh tǝ maanda kuturakti hulafǝrta, mbǝrantǝ Yohana ha tǝ maanda. 12 Ə thlǝhaɗi nggaktǝ Yohanna thlǝ chǝt baptisma ɓasa kǝ nakanya, kuturakti hulafǝrta mǝthlan saa ɓahta. Fee nech fǝr ɓahtaˈan paɗ fen yahchǝs kǝ thlǝnandǝ kuturakti hulafǝrtaˈan tǝ alkǝta. 13 Kǝthlǝm chaˈati Musa tǝ fǝ shenuˈchǝ yahti Farta nat, ndikndǝ kǝ ɗar kutǝraktaˈan kǝn Yohanna ɓata. 14 Paɗ manowun nggǝmandǝ tǝ thlǝn yanda, Yohanna mǝthlan nech kǝ Iliya thla nda fee wa nan nggǝr ɓata. 15 Nat thla nech sǝk ǝnɗi nati mbuˈta, kǝ sǝka.

16 "Paɗ tǝ mii nati kaɗa ndǝ nafchi yuwa heshi ɗiya? Nii kaɗandǝ tanda tǝ wanwanchǝɗi nech chokta ǝ thlǝmo nakandǝ ˈya shikechǝ tarakchiyanda. Nakandǝ ndat wa.

17 "‘Pewunchǝˈǝn shilatǝsi,

karkowun rǝɓta.

Inkaˈǝn ˈyamǝs tǝt mǝrta,

karkowun tǝta.’

18 "Kǝthlǝm kǝ ɓak Yohanna, sǝmwa ɗǝsǝmǝnɗi thlǝ sǝmndǝ nafcha wa, ndu kǝ satǝ ˈyam inabi, ndaka nda wa, ‘hwaˈarchansi.’ 19 Kǝ ɓaki nggǝta Waˈi Nefa nggǝt sǝmnda nggǝt sata, ndaka nda wa, ‘Thlǝ sheura, tǝ thlǝ saa mballa. Shiketǝ fǝ thlǝt chamincha tǝ fowun fen paɗ fǝ ɓǝɓifecha.’ Paɗaa, tarchiɗi thlǝ chǝt nefa ndaˈan thlǝ pǝnchǝ wa, wun nech kǝ thlǝ sǝn ǝna."

20 Nggakkan ˈyanandǝ nafchi mǝrǝɓchaˈan ha, mǝɗi chǝtǝn tarchiyan yi ǝna sakaˈincha, kǝthlǝm nafchaˈan tǝrwandǝ ha wa. 21 "Aiˈyo, nafchi Korasinu. Aiˈyo, nafchi Betsaida. Kǝthlǝm ma ǝna tar sakaˈincha chit fee ǝ mǝrǝɓchi yowun, chǝt fee ǝ Taya tǝ Sidon, mǝ tǝr ndǝ ha nduk wa. Kǝ pandǝ sǝɓtǝ kapecha, tǝ paɗ kǝ pǝt ndǝ ficha kǝ fechˈyanda, kǝthlǝm kǝ pǝntǝ tǝrtǝyandǝ ha. 22 Paɗ nggǝt mbuˈowunda, ǝ fartǝ chakmee na fee shishandǝ nafchi Taya si tǝ nafchi Sidom mǝ kun. 23 Kun nafchi mǝrǝɓ Kafarnahum, choˈowun chan fa wa na fee ɗǝt tǝ wunchi kǝ hulafǝrta wa? Auwa, ngga kǝɗu wa, tǝn fee cham wunchi kǝ hur wata. Maa ǝna tar sakaˈinchiɗi chǝt fee ǝ pǝthlǝr wun, mamwa fen chǝt fee ǝ Sodom, mǝ mǝthlansi kǝ ɓukwiya. 24 Paɗ nggǝt mbuˈowunda, fartǝ chak mee na fee shishandǝ nafchi Sodom si mǝ kun."

25 Ə wanshengngǝn chǝˈini nda Yesu wa, "Chuchi usoko, Chinda, chaɗi nech kǝ Chinda yi hulafǝrta tǝ heshi. Kǝthlǝm wuɓeen ichǝɗa kǝmɗi fǝ mbǝrˈicha tǝ fǝ hurˈincha. Paɗ pǝnanko wanwancha. 26 Kǝɗu yu Chinda, kǝthlǝm chin keˈkeˈ kǝɗ ǝnɗi yahtusi.

27 "Papa fǝritǝ chikami nat. Yowunsi sinchǝ Wanan wa Chinan ndak, paɗ yowunsi sinchi Chinan wa Wanan ndak. Tǝ paɗ fee tatǝ Wanan pǝnangkan tandǝ Chinan.

28 "Ɓam kǝmɗinchi, kun tǝɗi hatech ha nat, kun paɗ ɓahtǝ ha tǝ sǝfcha fee nech lǝklǝk ǝ indiyowun. Ni fǝrowun yiptǝ paɗ. 29 Fǝram inchiyowun kǝ nowun para ǝnɗi yahti, kǝɗ ǝnɗi thlǝ fǝrtǝ thlahuɗat ɓǝratiyan kǝ palangngan fee ɗǝftǝ palangnan kǝ ɓǝryu. Kǝ chaˈowun paɗ mǝɗinchi, kǝthlǝm nggǝt maan indǝs finchi wa. Tǝ paɗ thlǝ chǝt tar hunandǝ wanɗǝkaɗat ha. Paɗ nowun mbǝs yipta wanɗǝkaɗech ˈyowun. 30 Kǝthlǝm wanɗǝ palangndinchi paˈpa. Sǝftǝɗi nati ɗǝf wunchi kǝ tǝrwun paɗ, lǝklǝk wa chǝk ngguɗyeh."