1 Ɓak fowun Farisayawecha tǝ Sadukiyawecha kǝthlǝm kǝ kaɗandǝ Yesu tǝ chihan mee wa, kǝ pǝnan tǝ tandǝ ǝna saka inda. Thla nech pǝndǝ wa, mǝthlan ɓechan hulafǝrta. 2 Nggǝmankan tanda wa, "Maa ǝ hǝm farta, thlǝ dechowun wa, ‘Nǝ ˈyer nǝs wa ndu kapa rǝnnaa, kǝthlǝm hulafǝrtaˈan nga.’ 3 Paɗ walwurta, ‘Maa hulafǝrta nga, paɗ husamba sǝ kaan, thlǝ ndechowun wa, nafee chǝt ˈyera.’ Thlǝ mbahǝnchowun sǝndǝ wa naa fee chǝt ˈyera, ndu nǝ fee cha wa, paɗ mbahǝnwowun sǝn mǝna wanɗǝsǝn yuwa heshiɗiya pǝnda wa. 4 Kun ɓǝɓi nafcha, fǝlaucha, yi yuwa heshiɗiya. Kun kata kǝ pǝnowun chǝ fee ǝna saka inda ǝ hulafǝrta, paɗ nǝ fee pǝnowunchǝ wa. Maangga yi Yunana thlǝ shenuˈtǝ tǝ yahti Farta ndak wa." Chat malkǝ Yesu tandǝ ha pǝɗakan kumichaˈan.

5 Kǝ tallankǝ kǝmsichiyan kǝ heshi hawurtǝ thla, mbǝtankan tandǝ tǝrwandǝ ɓilsheta wa. 6 Ndangkǝ Yesu tanda wa, "Mbǝramsi, kǝnowun mbǝrtǝs tǝ yisti i Farisiyawecha tǝ Sadukiyawecha." 7 Nggak kandǝ ndiktǝ pǝthlǝr nanda tǝ ndat wa, "Mbuˈchan kǝɗu, kǝthlǝm ǝnɗi ɓawaktǝmǝn tǝ ɓilsheta." 8 Paɗ Yesu sǝntǝ mǝ nat ndǝ ndiktǝ kǝ ɗaran. Chihangkan tanda wa, "Nggun tǝɗi naa fǝr kit ˈyowun ngudyeh, kǝthlǝm mǝ natwun ndiktǝ pǝthlǝrwun kǝ ɗar ndat wa ɓilshet ˈyowun sǝ wa? 9 Paˈ kǝ nakanya wathlowun wa ha wa? Kuɗuk wak nowun ɓilsheɗi ɗǝrman (5) sǝmandǝn ǝn nafchǝ aru ɗǝrman (5,000) yu wa? Inaftǝ kurmi nggomanduwun fishirchaˈan? 10 Kuɗuk wak nowun ɓilsheɗi muɗ (7) sǝmandǝn ǝn nafchi aru foɗɗa (4,000) yu wa? Inaftǝ kurmi nggomanduwun fishirchaˈan? 11 Mǝ chich mbahǝn waktǝwun sǝnda wa ngga nechi ndiktǝ tǝ wunchi kǝ ɗar ɓilsheta wa? Paɗ ndat wa kǝ mbǝrwunsi tǝ yisti i Farisiyawecha, tǝ Sadukiyawecha." 12 Chat sǝnkanda wa ngga kǝ ɗar yisti tǝ ɗi thlǝ chǝt fee tersi ǝ hur ɓilshet natǝn ndikta kǝ ɗaran wa. Paɗ kǝ chaˈandi Farisiyawech kaɗ, tǝ Sadukiyawecha.

13 Kǝ ɓak Yesu nduk tǝ thle mǝti Kasariya yi Filipi, chǝhankan kǝmsichiyan ndakan wa, "Thlǝ ndech nafcha wa, wun nech kǝ nggǝta Waˈi Nefa?" 14 Nggǝrang kandǝs wa, "Fowun ndechanda wa cha Yohana thlǝ chǝt baptisma. Fowun ndechanda wa cha Iliya. Fowun paɗ ndakanda wa cha Irmiya ndu paɗ artǝ hur fǝ shenuˈchǝ tǝ yahti Farta." 15 Chǝhankan tanda wa, "Kun paɗ kǝni? Thlǝ ndechowun wa wun naki?" 16 Nggǝmankǝ Siman Biturus su wa, "Chǝnech kǝ Kǝristi, Waˈi Farta thlǝ shishingnda." 17 Nggǝman kǝ Yesu wa, "Thlǝ mbǝs ǝnhar nako, Siman waˈi Yunusa, kǝthlǝm ngga nef punuchǝ ǝnɗa wa, paɗ Papa thla hulafǝrta, mǝthlan punuchǝ ǝnɗa. 18 Nggǝt ndu ta wa chǝ nech kǝ Biturus (Thla naa saktaˈan wa fera), ǝ ɗar farɗa paɗ nati tin nafchinchi, fǝ fǝr kit cha. Tǝ paɗ alkǝti mǝrtǝs nech mbǝrandǝ alkǝtˈyan ha wa. 19 Nii furu ǝnna in mikǝtǝnchi yimndǝ kǝ kuturakti hulafǝrta. Nat ǝnɗi kartu fǝ hur heshi, kǝɗu paɗ naa fee kartǝ hulafǝrta. Paɗ nat ǝnɗi nggǝmndu fa hur heshi, kǝɗu paɗ naa fee nggǝmɗǝf hulafǝrta." 20 Chat tǝɗan kan thlǝmati kǝmsichiyan kaan, kǝ mbuˈandǝ chikan wun wa mǝthlan nech kǝ Kǝristi wa.

21 Thlaˈtǝ fartǝ inni, nggakkǝ Yesu sǝnandǝ kǝmsichiyansi ndat wa, nwaat kǝ ɗi kǝ Urshelima. Paɗ kǝ saa ɓahtǝ kaan ǝ hari paktechi Yahudawecha, tǝ paktǝ pangngǝncha, tǝ fǝ chaˈandǝ kusiˈ i Musa kaɗi. Kǝ ɓilanfee, mahkaan partǝ paɗ, kǝ thlaˈan fee tǝ shishingnda. 22 Kaɓ kǝ Biturus ndǝ kǝ kǝlaar. Nggakkan ˈyanandǝ ha, ndakan wa, "Kǝ malantǝ ndiktǝ kǝɗu. Farta kǝ mbǝhanchi kaɗi. Chinda, ǝnɗa nech sǝɓtǝ tǝ wech wa, chǝk ngguɗyeh." 23 Tǝɓǝr kǝ Yesu ha ndangkan Biturus wa, "Mbǝho langnga tǝ nenchi, hweˈra, chǝ ɗakwan chǝt wansartǝ kǝmɗinchi. Kǝthlǝm kewen ǝnɗi nech kǝyi Farta wa, paɗ yi nafcha."

24 Chat ndangkǝ Yesu kǝmsichiyan wa, "Nat thla yahchǝs kǝ para nenchi. Nwaat kǝ kartǝ indiyan, kǝ tǝrtǝ palandiyan (Ndaˈan nech kǝ, kǝ nggǝm fa, kǝ saa ɓahta, kǝ mǝra kǝthlǝm nggǝta). Kǝnan para nenchi. 25 Nat thla yahchǝ kǝ hǝraˈantǝ shishingndiyan nan kuɓata. Paɗ nat thla kuɓech shishingndiyan kǝthlǝm nggǝta nan mbǝs shishingndǝ kǝ kweˈkǝchi. 26 Mǝ nech nat kǝ mbǝs ǝnhar kǝmɗi nefa maa mbǝstǝ heshiɗiya nat, paɗ kǝ kuɓatǝ shishingndiyan? Ndu mǝ na nef mbahǝn fǝrta, kǝthlǝm kǝ fǝran fee shishingnda? 27 Kǝthlǝm nggǝta Waˈi Nefa nechi ɓat hur maandi Papa, tǝ fǝ thlǝnchiyan. Kǝ fǝrani chikawun kǝnau terˈyan, keˈke tǝ ǝnɗi chitǝn. 28 Kittaˈan nati mbuˈowunda, fowunsi nech kit kit mǝɗya nggandǝ mǝr wa kwaɗǝn. Se maa niinda nggǝta Waˈi Nefa ɓat kaha hur Kuturaktinchi."