1 Kǝ tǝɓangkǝ Yesu chaˈandǝ kaɗ kǝ ɗar ichiˈini, malkan hahi Galili ha pǝɗakan kǝ thle mǝti Yahudiya kǝ heshi kufi Urdun. 2 Tertǝ nggomǝn nafcha parakandǝ ndi, paɗ minni kǝnan kan fee kaɗ nech haˈchan hurnanda.

3 Fowun Farisiyawecha ɓakandǝ kǝmɗi Yesu kǝthlǝm kǝ kǝsandǝ tǝ ǝnfa tǝmɗi ndiktiyan. Chǝhan kanda ndat wa, "Nggǝmaˈanchǝ kusiˈ i Musa su wa, keˈkeˈ si kǝ kal nef nuwan ha kǝ ɗar chǝka yen ǝnɗi chǝtǝn thla mbǝnawakchi nef fa wa?" 4 Nggǝrangkǝ Yesu tandǝs wa, "Chan ngga waknowun hur ndikti Farta wa. Thla ndech wa, ǝ tǝrkwathl kanan Farta tǝnchan tandǝ hishnefa, tǝ nunefa." 5 Ndak Farta paɗ wa, ‘Kǝthlǝm ndaˈan nefa nan mal chinan ha tǝ manan. Kǝ chok ndǝ tǝ nuwan, chapndǝ paɗ kǝ chok ndǝ kǝ fat arta.’ 6 Kǝthlǝm ndaˈan peˈwandǝ chap wa, paɗ fat arta. Tǝkǝɗu nat ǝnɗi wumandǝ Farta, mǝ chakan nef ha wa."

7 Fasirisawechaˈan chǝhankanda. Tǝ ndat wa, "Maa kǝɗu, kǝthlǝm mǝ hacha ɗǝftǝ Musa nggaˈansi, kǝ yaran nef ɗelwer tǝ chak ret nuwansi, paɗ kǝ rǝktǝ ndi?"

8 Ndangkǝ Yesu tanda wa, "Kǝthlǝm kwaˈkwa tǝ wanɗǝkaɗechˈyowun ndaˈan chicha malowunndǝ Musa kǝ kalwun nǝssiyowun ha. Paɗ ngga nechan kǝɗu ǝ tǝrkwathl kan tǝn heshi wa. 9 Nggǝt mbuˈowunda, nat thla kalchǝ nuwan ha, maangga ɗar fǝlaukǝta wa, paɗ kahkan nunef samǝn, chǝt fǝlaukǝta."

10 Ndangkǝ kǝmsichiyan wa, "Maa kǝ ɗar fǝlaukǝt ndak naa nef mbahǝn kal nuwan ha, awi kwech chan choktǝ nggǝ nunef su wa."

11 Nggǝrankǝ Yesu tandǝs wa, "Ngga chǝka wun nech nggǝmandǝ chaˈaɗowun yawa. Maangga fee fǝrandǝ Farta alkǝt chok ndǝlakǝta wa. 12 Fowun kulabcha kǝthlǝm nggǝtchǝ fee tandǝ kǝɗu. Fowun nafchǝ chanchǝ tandǝ kaɗ kǝɗu. Fowun paɗ fen chanchǝ indiyandǝ kaɗ kǝ kulabcha kǝthlǝm tar kuturakti hulafǝrta. Nat thla nech mbahǝn thlǝt chaˈaɗiya, kǝ thla."

13 Kǝrisaɗan ɓankǝ fee Yesu wanwancha, kǝthlǝm kǝ ɗǝfan tǝ her tandǝ kǝ inda, kǝ ɗǝfan tǝ mbǝsˈin tandǝ kǝ in. Tǝ paɗ kǝ shiyandech kǝ in. Paɗ yanankǝ kǝmsichiyan nafchiɗi ɓet tǝ wanwanchaˈan. 14 Paɗ ndangkǝ Yesu tanda wa, "Malaman wancha kǝ ɓandǝ kǝmɗinchi, kǝ ˈyatawun tanda wa. Kǝthlǝm kuturakti hulafǝrta nechan kǝ yi nafchǝ kǝɗ wanwanchiɗiya." 15 Kǝ ɗǝfan kǝ Yesu wanchiɗiya mbǝs ǝn har kǝ in, pǝɗakan kumichaˈan.

16 Fee minni ɓak yowun nefa kǝmɗi Yesu. Chǝhankan tǝ ndat wa, "Thlǝ chaˈanan kaɗi, kaa ichi mǝ nati chǝta kǝthlǝm kǝ mbǝsi shishingndǝ kǝ kwekǝchi?"

17 Nggǝrang kǝ Yesu sǝ wa, "Kǝthlǝm mǝ chǝhitu mee kǝ ɗar kaa icha? Farta ndak nech ndiˈchan. Maa yehǝn kǝ mbishin shishingndǝ kǝ kweˈkǝchi, paro ǝnɗi mbuˈtǝ kusiˈchi Musa."

18 Ndangkan Yesu wa, "Yen kusiˈ tina hurnanda?"

Nggǝrang kǝ Yesu su wa, "‘Mǝ ɓillin fata wa. Mǝ chin fǝlaukǝta wa. Mǝ yerkǝn wa. Mǝ mbuˈin lektǝ kǝ in ǝnɗi chǝwaktǝ shetwa wa.’ 19 ‘Kǝ fǝreen mandǝ chu tǝ mu. Paɗ kǝ yehǝn nafchiɗi natwun choktǝ nduk nduk kǝɗ ǝnɗi thlǝ yahtu indiyo.’" 20 Ndangkǝ kǝmsiˈan wa, "Nat ichiɗa thlǝ parinchihar. Mǝ takicha?"

21 Nggǝrangkǝ Yesu su wa, "Maa yehǝn kǝnen ke ndiiɗan, ɗu, kǝ hǝyeen ǝnɗi nessiyo kaɗ nat kǝ fǝreen fǝ ɓahchǝ wanɗǝɓithlan. Tǝkǝɗu no mbǝs kǝnawa ǝ hulafǝrta. Kǝno ɓat parennenchi." 22 Kǝ sǝkkǝ kǝmsiˈan kǝɗuyu, pǝɗakan kesh tǝ sǝɓtǝ hwira, kǝthlǝm kǝnauˈyansi kaan. 23 Chat ndangkǝ Yesu kǝmsichiyan wa, "Kittaˈan nati mbuˈowunnda, nan nat ˈyangˈyang thlǝ kǝnawa kǝ yim kǝ kuturakti hulafǝrta. 24 Nggǝt nggǝr mbuˈowunda. Nan nat paˈpa fi ngelupa kǝ yim tǝ kwi lipira mǝni thlǝ kǝnawa kǝ yim kǝ kuturakti hulafǝrta."

25 Kǝ sǝkkǝ kǝmsichiyan kǝɗu, sakandak indǝ kaan ndaka nda wa, "Maa kǝɗuyu, wun hacha nech hǝraˈta?"

26 Paɗ ɗi mbangkǝ Yesu tanda ndangkan tanda wa, "Ənɗa ˈyangˈyang mǝɗi nefa, paɗ mǝɗi Farta chikamǝ ˈyangˈyang wa."

27 Nggǝmankǝ Biturus wa, "Mal ǝn chikamǝ ha kǝ paraˈan wechi. Mǝ nat ǝn mbǝstǝ hacha?"

28 Ndangkǝ Yesu tanda wa, "Kittaˈan nati mbuˈowunda, ǝ yuwa heshiɗi nech ɓata. Fartǝɗi na nggǝta Waˈi Nef choktǝ kǝ ɗar mǝtchoktiyan yi maanda ǝ kuturaktinchi. Kun tǝɗi parech nenchi, nowun choktǝ kǝ ɗar mitchok kuturaktǝ kum nggǝrsi chap. Kǝ chuwun kuturaktǝ kwalaar wurchǝ kum nggǝrsǝ chap i nafchi Israˈilawecha. 29 Nat thla malchǝ wurchǝ ha, ndu wanmanchaˈan kǝ hǝssa, ndu wanmanchaˈan kǝ nǝssa, ndu chǝnda, ndu manda, ndu wancha, ndu hǝnggicha kǝthlǝm maanandǝ thlǝm naa. Nan mbǝstǝ kǝ pǝɗanchǝ kǝɗu ha kum chǝt kum (100), paɗ kǝ mbǝstǝ shishingndǝ kǝ kwekǝchi. 30 Paɗ nat fee nech manchan nakanya, naa fee njirandǝ tandǝ kaɗi. Fee nech kǝ njirchaˈan nakanya, naa fee manandǝ tanda."