1 "Kuturakti hulafǝrta nechan kǝɗ thlǝwira thla warchi kǝsh walwurtǝ pung kǝthlǝm kǝ kaa nafchiɗi nech chan tera ǝ hǝngga inabi ˈyan. 2 Kǝ tahsan kandǝ ha tǝ fǝ tarchaˈan kǝ ɗar ndǝnari arta ǝ parta, thlǝn kan tandǝ kǝ hǝngga inabi taˈanˈyan. 3 Ə wanshengnan wanhǝhaˈarta yi walwurta, chekan kesh nakan fowun nafchǝ paɗ ǝ mi lǝmo tandǝ chǝt ǝna wa. 4 Ndangkan tandǝ wa, ‘Kun paɗ ɗama kǝ chǝwun ter ǝ hǝnginchi, nii tiyowun ǝnɗi kǝmchǝsi.’ 5 Pǝɗa kandǝ kǝ hǝnggaɗan.

"Nggǝrkan chet kesh hurfartǝ paɗ tǝ wanshengnan mahkan yi yartifarta, nggǝrkan thlǝn nafchǝ kǝ hǝnggiyan kǝɗ ǝnɗi chǝtǝn kǝrsa. 6 Nggǝrkan chet kesh wanshengnan ndǝrman yi farwita, mbǝsan kan fowum kikit. Chǝhan kan tandǝ wa, ‘Kǝthlǝm mǝ natwun kikit mǝɗa kǝ parta kun chǝt ǝna wa?’

7 "Nggǝman kandǝ wa, ‘Kǝthlǝm yowunsi tǝrchǝ nggaˈan kǝ chaˈǝn tera wa.’

"Ndangkan tanda wa, ‘Kun paɗ ɗam cham ter ǝ hǝnggi inabi inchi.’ "

8 Kǝ hǝmkǝ farta, thlǝ hǝngiˈyan ndangkan thla thlǝ parech har tǝ hǝngiˈyan wa, ‘ˈYo fǝ tarchaˈan kǝ tiyeen tandǝ kǝnau terˈyanda. Tǝrtǝ ǝ fee kǝrsa kǝ fee ǝ tǝrkwahtlkanan.’

9 Fǝ tarchiɗi ɓech wanshengnan ndǝrman yi farwitǝyu, tiyankǝ kǝ fee tandǝ ndǝnari artǝ-arta. 10 Ɓak fee tǝrkananyu sakchandǝ wa, nandǝ thlǝt manchan, tandǝ paɗ, tiyankǝ fee tandǝ ndǝnari artǝ-arta chǝk wuni. 11 Thlǝkanda nakandǝ hurumandǝ tǝ thlǝ hǝnggaɗan. 12 Nakandǝ ndat wa, ‘Fee ɓech ǝ kǝrsa, chǝchandǝ ter wanshengndǝ artǝ ndak, tiyaˈanko kǝɗ ǝnɗi tiyandu tanda. Nggaˈantǝɗi parchǝ nggaˈan chǝt tera, hur watfartǝ kaan.’ 13 Nggǝmankan artǝ hurnanda ndangkan wa, "Shiketǝna, ɗathluwi fa wa. Ngga ndikmǝn tǝ wech wa ni tiyutǝ kǝɗ ǝnɗi thlǝ tiyandǝ fee thlǝ ter ǝ parta wa?" 14 Thlu ǝnɗi nech kǝ yuwa kǝ pǝɗen. Nggǝt yahchǝs kǝ tiyani fee ɓech kǝrsa keˈkeˈ kǝɗ ǝnɗi tiyuti. 15 Chaˈwisi kǝ chi ter tǝ kǝnawinchi kǝɗ ǝnɗi yahti wa? Ndu tǝnen sǝraˈ kaa kǝɗɗi pǝndi sok wa? 16 Kǝthlǝm ndaˈan, nggǝt mbuˈowunda, "Fee nech manchan nakanya, naa fee njirandǝ tandǝ kaɗi. Fee nech kǝ njirchaˈan paɗ, naa fee manandǝ tanda."

17 Kǝ nak Yesu pǝɗat kafǝr kǝ Urshalima, ǝ mbanda kaɓ kan kǝmsichiɗan kum nggǝrsǝ chapyu kǝ kǝlaar. Ndangkan tanda wa, 18 "Sǝkama, nggǝmǝn kafǝr kǝ Urshalima. Mǝɗi naa fee fǝr nggǝta Waˈi Nefa kǝ hari paktǝ pangngǝncha tǝ fǝ chaˈandǝ kusiˈ i Musa kaɗi. Nandǝ chakan mee yi mǝrta. 19 Kǝ fǝrndǝ ndi kǝ hari fee nawakchǝ kǝ Yahudawecha, fen paɗ nandǝ chen mee ha, kǝ thlǝfanda, kǝ kukwandǝ ha paɗ. Far mahkanda paɗ naa Farta thlaˈandǝ tǝ shishingnda."

20 Kǝrsanɗan ɓak man wanchi Zabadi tǝ wanchiyan kǝmɗi Yesu, kopkan ha pangngǝnan shiyankan kǝ chanchi ǝna yowun. 21 Chǝhankan tǝ ndat wa, "Mǝ yahtu?" Ndangkan wa, "Kǝ ɗifin wanchiɗinchi chap ya kǝ chokndǝ, arta ǝ harsǝmˈyo, arti thla paɗ ǝ kakuˈyo, ǝ hur kuturaktiyo." 22 Paɗ ndangkǝ Yesu wanchaˈan wa, "Sǝnwowun ǝnɗi natwun shitawa, nowun mbǝlaˈ sat ǝ hur tǝɓ ɓahtǝɗi nati sata wa?"

Nggǝman kanda wa, "Naˈan mbahanda."

23 Ndangkǝ Yesu tanda wa, "Nowun mbǝlaˈ sat tǝ tǝɓ ɓahtinchi, paɗ choktǝ ǝ harsǝm inchi, ndu kaku inchi, ngga nggǝt nech tǝ alkǝt fǝrta wa. Mǝtchokchiˈini yi fee tahsandǝ Papa ha kǝthlǝm tanda." 24 Kǝ sǝkkǝ takǝɗ kǝmsichiɗi kum yu shitiyanda, sǝɓkǝ hurchaandǝ kaɗ kaan kǝ ɗar fee chap yu. 25 Paɗ ˈyak Yesu tandǝ nat kǝ thlǝmanɗan, ndangkan tanda wa, "Sǝnwun wa kutǝrchǝ fee nawakchǝ kǝ Yahudawecha thlǝ ɓahanchandǝ nafchiyanda. Paktǝchiyandǝ paɗ thlǝ pǝnchandǝ alkǝt kǝ ɗar nanda. 26 Kǝmwasǝ kǝn kǝɗu pǝthlǝrwun wa. Kǝthlǝm ndaˈan nat thla yahchǝ kǝn manchan pǝthlǝrwun, nwaat kǝ chok kǝ thlǝ chan ter takichaˈan. 27 Thla paɗ yahchǝ kǝ chǝt kuturaktǝ indiyowun, nwaat kǝn kǝ thlǝ terˈyowun. 28 Kǝɗu paɗ nggǝta Waˈi Nefa ngga ɓechi kǝthlǝm kǝ manichǝ fee wa, ɓechi kǝthlǝm kǝ manani nafcha. Kǝ fǝri shishingndinchi paɗ, kǝthlǝm hǝraˈandǝ nafchǝ terchan."

29 Kǝ nak Yesu tǝ kǝmsichiyan mal mǝrɓi Yeriko ha, parak tertǝ nggomǝn nafchǝ ndi. 30 Chat fowun komminchǝ chap, chokndǝ haa kǝlaar mbanda. Kǝ sǝkkandǝ Yesu mbǝrtǝ ha, thlaˈankandǝ ɓǝrata. Ndakanda wa, "Thlǝmaanda, Waˈi Dauda, kǝ haɗuchǝˈǝnfa" 31 Yanankǝ nggomǝn nafchaˈan tandǝ ha, ndangkandǝ tanda wa, kǝ nggasndǝ ɓaˈ. Paɗ nak kominchaˈan nggǝr thlaˈandǝ ɓǝratǝ kaan ndat wa, "Chinda, Waˈi Dauda, kǝ haɗuchǝˈǝnfa." 32 Thlarkǝ Yesu ha, ˈyakan tanda ndangkan tanda wa, "Mǝ yahtǝwun kǝ chowunchi?" 33 Ndankanda wa, "Thlǝ manda, kǝ mbǝs ǝn naa mǝta." 34 Haɗan kandǝ fa, tǝkankan her wenichiyandǝ fa. Chat kǝɗuyu mbǝs kandǝ naa mǝta paɗ parakandǝ ndi.