1 Nggǝrkǝ Yesu mbaˈanda wuɓtǝ ndikta tǝ ndat wa, 2 "Na fee kaɗandǝ kuturakti hulafǝrta kǝɗ kuturɗi tahsanchi kǝn reti waˈyan ha. 3 Thlǝn kǝ kuturɗi mafech ˈyan kǝmɗi fee thlǝnandǝ fee tandǝ kǝ ɓanda kǝ mǝt kǝn reɗan, paɗ karkandǝ ɓata. 4 Ngǝrkan thlǝn fowun mafechˈyan. Ndang kan tanda wa, mbaˈaman nafchiɗi thlǝna ndi tanda ndat wa, "Tahsani ɗǝsǝmndǝ ha, thlithli fee paktǝ thlecha fee kǝrtǝ fee tandǝ ndiˈchan. Tahsan fee chika mǝ ha nat. Ɓam kǝ mǝt mbǝnfa reɗan." 5 Paɗ ɗǝpawandǝs wa, pǝɗakandǝ kumichinanda. Yowun pǝɗi kahngiˈyan, yowun pǝɗi kǝ tar lumokǝtˈyan, 6 Takichaˈan paɗ kǝsan kandǝ mafechˈyan, fǝrankandǝ panchi tanda, ɓǝlankandǝ fowun. 7 Sǝɓ kǝ hwiri kuturan kaɗ kaan. Thlǝn kan fǝ yaan chiyan kǝ ɓǝlandǝ fee ɓǝlanchǝ mafechˈyan, kǝ ˈyandǝ mǝrɓiˈyandǝ kaɗ nat. 8 Ndangkan takǝɗ mafechaˈan wa, tǝɓan fee tahǝsfa kǝ kǝn reɗan, paɗ fee thlǝnandǝ fee tanda kǝ ɓanda, kǝmwandǝs kǝ ɓanda wa. 9 Kǝthlǝm ndaˈan, param paktǝ mbancha kǝ ndawun nat fee mbǝsandǝwun kǝ ɓandǝ kǝ mǝt kǝn reɗan. 10 Pǝɗak mafechiˈini kǝ mbanchaˈan, nggomankandǝ nat thla mbǝstǝnda, fee nech tǝ kaa kǝta tǝ fee nawaktǝ kafat fiyanda. Ndiiɗ kǝ kǝtǝn kǝn reɗan kaɗ kǝ ramcha. 11 "Paɗaa kǝ yimkǝ kuturan kǝ kǝtǝnan kǝthlǝm kǝ na ramchǝɗi, nakan yowun nefa pawa kapa kǝn reɗan wa. 12 Ndangkan wa, ‘Shiketǝna, chich fee wa kǝni yimndu kǝmɗa ngga tǝ pa kapa kǝn reta wa?’ Paɗ nafan sakan kǝ indǝ ǝnɗi natǝn mbuˈta, nggaskan kǝmma. 13 Ndang kǝ kuturan mafechˈyan wa, "Kǝnaman harchiyan tǝ sarchiyan, kǝ mǝk wun ndi kǝ hur wuthlǝ kaan, mǝɗi na fee tǝta tǝ kang wan thlancha. 14 Nggǝlankǝ Yesu ndiktaˈan ha tǝ ndat wa, "Terchan ˈya fee paɗ fee tatǝ fee ngguɗyeh."

15 Ɗǝk Farisiyawecha tahsandǝ mbanɗi ha nat ndǝ kǝsandǝ Yesu si hur ndiktiyan. 16 Thlǝnkandǝ fowun kǝmsichi yanda tǝ fee thlǝ kǝnanchi kirshi Heridus. Ndang kandǝ Yesu wa, "Thlǝ chaˈanan kaɗi, sǝn ǝn wa thlǝ mbuˈcho kit, paɗ thlǝ chaˈancho ndikti Farta kaɗ ɗar kit. Puwu ǝn tǝ sakti chǝka wun wa, paɗ kǝthlǝm nafchi nat arta mǝɗˈyo. 17 Mbuˈaˈǝnndǝn mǝ nech kǝ kaɗatˈyo. Nggǝman kusiˈ ˈyamǝn kǝ ti ǝn chamnda kǝmɗi Kaisar wa, ndu kǝ ti ǝn wa wa?" 18 Paɗ tapi sǝn Yesu sǝɓtǝ kaɗatˈyanda. Ndang kan tanda wa, kun fǝ wenikicha, fǝ thlǝm nafcha, kǝthlǝm mǝ natwun kaɗita? 19 Pǝnami tǝn wanɗǝɓithlɗi thlǝ titǝwun chamnansi, ɓangkandǝ ndenari. 20 Ndang kǝ Yesu tanda wa, "Mirshishingndi wuni, tǝ thlǝm wuni nech ɗar wanɗǝɓǝthl ɗa?" 21 Ndang kanda wa, "Mirshishingnda tǝ thlǝm Kaisar nech ɗaran." Ndang kǝ Yesu tanda wa, "Fǝraman Kaisar ǝnɗi nǝch kǝyi Kaisar, fǝraman Farta ǝnɗi nǝch kǝyi Farta." 22 Kǝ sǝk kandǝ kǝɗuyu, saka ndak inda, malkandǝ anchi ha, pǝɗakanda kumichinanda.

23 Ə fartǝ thlaa, ɓak fowun Sadukiyawecha kǝmɗi Yesu. Sadukiyawechaˈan thlǝ ndechanda wa, thlaˈti mǝmatechis wa. Chǝhan kandǝ mee, 24 ndakanda wa, "Thlǝ chaˈanan kaɗi, ndech Musa wa, ma mǝr nǝfa wanchan suwa. Nwaat wanmanan kǝ sǝm tǝ yati nuwan kǝthlǝm kǝ nggǝtanchi wanmanan wanchisi. 25 Fowun hǝssǝ si muɗ kǝ wanmanchi raˈan hur ǝn. Walla wanan kahtǝ nunefa, mǝrkan nggǝtwa wa, malangkan wanmanan nuwan ha. 26 Keɗu sǝɓtǝn tǝ chapataˈan, tǝ mahkanan, paɗ saˈankan muɗataˈan, nggǝt wandǝ wancha wa. 27 Kǝrsǝ nandǝ nat mǝrkǝ nuɗi. 28 Nakanya ǝ thlaˈti mǝmatecha, nechan nat kǝ nu wun hur nanda? Nakan nat ndǝ muɗ rindǝ ndi." 29 Paɗaa nggǝrankǝ Yesu tandǝs wa, "Sakiwun kaan, sǝnwowun yara ndikti Farta wa, sǝnwowun alkǝti Farta paɗ wa. 30 Kǝthlǝm ǝ thlaˈti mǝmatecha, kahwu fee kanwa, fǝr wufee kan wa. Kǝthlǝm ndaˈan nafchaˈan nechandǝ choktǝ ǝ hulafǝrta keˈke kǝɗ fǝ thlǝnchi Farta. 31 Kǝ ɗar thlaˈti mǝmatecha, awi, tamwowun channggandǝ ǝnɗi mbuˈowunndǝ Farta wa? 32 Ndech Farta wa, ‘Nggǝt nech kǝ Farta yi Ibrahim, tǝ Farta yi Ishaku, tǝ Farta yi Yakubu,’ mǝthlan ngga Farta yi mǝmatǝcha wa." Mǝthlan Farta yi nafchiɗa fee nech tǝ shishingngǝncha. 33 Kǝ sǝkkǝ nggommǝn nafchiɗi nech minni kǝɗuyu, sakandak indǝ tǝ chaˈaɗanyan.

34 Kǝ sǝkkǝ Farisiyawecha wa, Sadukiyawecha ǝnsi natndǝ nggǝr mbahan mbuˈandǝ Yesu paɗ wa, chat nggomkǝ Farisawechaˈan ha. 35 Artǝ hur nanda thla sǝnchi kusiˈ i Musa kaan, chǝhan kan mee kǝthlǝm kǝ kaɗanchi. Ndat wa 36 "Thlǝ chaˈanan kaɗi, yen kusiˈ tin nech manchan hur kusiˈ cha nat?" 37 Nggǝmankǝ Yesu wa, "‘Yahu Chu Fartiyo tǝ wanɗikaɗatˈyo nat, tǝ shishingndiyo nat, tǝ hur indiyo nat.’ 38 Thleya nech kǝ kapa kusiˈ nat, paɗ thla nech kǝ tǝrkannan. 39 Chapataˈan nechan kǝɗ thla tǝrkanan paɗ, yahu nef kǝɗ cha, kǝɗ ǝnɗi yahtu indiyo. 40 Nat ǝnɗi mbuˈtǝ kusiˈ i Musa tǝ ǝnɗi mbuˈtǝ fǝ shenuˈcha tǝ yahti Farta yu, thlarchandǝ ha kǝ ɗar kusiˈ chiˈini chap yu."

41 Kǝ nggomkǝ fowun Farisiyawechǝ ha kǝ mǝt arta, chǝhan kǝ Yesu mee tanda, 42 Ndat wa, "Mǝ nech kǝ kaɗatˈyowun kǝ ɗar Kǝristi? Waˈi wun nakan?" Ndang kanda wa, "Waˈi Dauda nakan." 43 Ndangkǝ Yesu tanda wa, "Chich in kǝni, Dauda tǝmɗi alkǝti shemeta ˈyatǝn ndǝ wa Chinda? Ndak Dauda wa,

44 "‘Chinda ndangkan Chinnawa.

"‘Choku ha har harsǝm inchi,

se ma ɗǝfinchi atǝkrechuwa

kǝ kan sarchiyo?’"

45 "Ma na Dauda ˈya anchi wa Chinda, chich in kǝni na Kǝristi kǝ waˈyan?" 46 Nefsǝ mbahanchǝ fǝran nggǝmnan Yesu wa, thlaˈtǝ fartǝˈini nefsǝ mbǝschǝ alkǝt nggǝr chǝhan mee paɗ wa.