1 Kǝ chek Yesu kesh hur kǝtǝn shitaˈan mǝthlan ɗar wiˈta, chat pǝnankǝ kǝmsichiyan tǝnchi Wiri Fartaˈan. 2 Chǝhan kan mee tanda ndakan wa, "Niwun tǝnchiɗi nat ya wa? Kittaˈan nati mbuˈowun nda, Naa fee tutokandǝ ha. Ɗekwensǝ chǝk arta thla na fee maltǝ ɗar yowun wa."

3 Yesu ɗas ɗar Tinringǝn Ɗǝfchǝ Zaitun, ɓak kǝmsichiyan mbǝsndi ichǝt nanda chǝhankanda wa, "Mbuˈaˈanndǝn kwat na ichiɗa sǝɓta? Paɗaa mǝ nech kǝ wanɗǝsǝn ɓatˈyo kaɗi tǝ paɗ ndukwati yuwa heshi?" 4 Nggǝmankǝ Yesu tandǝsi ndakan wa, "Kaɗam har, mǝ thlǝm yowun wunchi wa. 5 Kǝthlǝm na nafchǝ terchan ɓat ǝ hur thlǝmna, nandǝ ndat wa, ‘Nggaˈan nech kǝ Kǝristi,’ kǝ thlǝm ndǝ nafchǝ terchan. 6 Nowun sǝk ndiktǝ yaancha tǝ kusheˈtǝ yaancha. Mǝ lekuwun wa, kǝthlǝm nwaat kǝɗu kǝ sǝɓa, paɗ ɓawu ndukwaɗan kwaɗǝn wa. 7 Na hahǝ thlaˈandǝ hahǝ fa, kuturakta kǝ thlaˈanchi yowun kuturaktǝ fa. Paɗ na fee chǝt mita tǝ yiraˈti hahǝ fa ǝ michi samǝn samǝn. 8 Paɗ nat ichiɗa tǝrkwathl kan nggwarkwana kwaɗǝn, kǝɗ ǝnɗi naa tǝrkwathl kan hatǝ nggǝtti nunefa. 9 "Kǝrsaɗan nandǝ fǝrwunchi kǝ ɓahowun chǝ fee, tǝ paɗ kǝ ɓǝlowunchǝ nda. Naa fee karwunchǝ ǝ heshiɗiya nat kǝthlǝm thlǝmna. 10 Ə fartǝˈini terchan fee nech chǝt wansarta hur fǝr kit. Kǝ fǝrndǝ raˈan mi, tǝ paɗ kǝ karndǝ raˈan. 11 Fǝ shenuˈtǝ yahti Farta fee nech kǝ fǝ lekcha terchan nech thlaˈta, kǝ sakandǝ nafchǝ terchan. 12 Kǝthlǝm tertǝ ɓǝɓifata, thlǝrɗaktǝɗi thlǝ chǝt nafchǝ kǝmɗi raˈan nan mbit kaɗi. 13 Paɗ nat thla kǝrǝschǝ kǝ ndukaɗan, nan hǝraˈta. 14 Paɗ na fee ɓas kusheˈtǝ kwastǝ ndikta yi sǝkta yi kutarakti hulafǝrta ǝ hur heshi nat. Kǝchok kǝ wanɗǝsǝnan kǝmɗi kwathl nafchi heshi nat, kǝn ndukwaɗan ɓata.

15 "Kǝthlǝm ndaˈan, maa niwun ǝna tǝkǝmndǝ thla thlǝ ɓech tǝ tǝktǝkaɗi, thla mbuˈtǝ thlǝ shenuˈtǝ tǝ yahti Farta Daniyel, mǝthlan kit Mǝɗi Nech Chiɗ chiɗ. Malan thla nech channgga nda, kǝ wathlanchi ha. 16 Tǝkǝɗu, fee nech hur hahi Yahudiya kǝ rakandǝ kǝ hur nggwalcha. 17 Thla nech ɗar kǝnnda mǝ tǝrkah wa tǝn ɓat tǝr ǝn hur wirˈyan wa. 18 Thla nech hǝnggǝ paɗ mǝ nggǝranchi in wa tǝn ɓat tǝr ǝna chip ta wa. 19 Ai i nǝssiɗi na wanchi hwirˈyanda, tǝ fee na wanwaˈyaarchandǝsi ǝ hur wanmǝnchaˈan. 20 Shiyaman Farta kǝ ɓǝ rakaɗiya ndǝri mbita ndu far yipta wa (Asabar). 21 Ə wanshengǝnˈini na ngwarkwana natsi kaan. Weˈtǝ thla tamwaktǝ fee chǝta thlaˈtǝ tǝrkwathl kan heshi se nakanya. Nǝ fee tamchǝ weˈtǝ ndaˈan paɗ wa. 22 Mangga kǝthlǝm kǝt ǝnɗi takandǝ fee wanmǝnchaˈan ha wa, mǝ nggǝ nefsǝ nech hǝraˈta wa. Paɗ kǝthlǝm kǝt tachaˈan na fee takandǝ wanmǝnchaˈan ha. 23 Ə wanshengǝnˈini, chǝka ndowunchǝ yowun wa, ‘Nama, ǝ Kǝristi ya.’ ndu, ‘Mǝthlan yu,’ mǝ fǝrwun kit suwa. 24 Kǝthlǝm Kǝristi i lekcha tǝ fǝ shenuˈtǝ tǝ yahti Farta kǝ fǝ lekcha nandǝ naa chet kesh. Kǝ chǝndǝ paktǝ wanɗǝsǝncha tǝ ǝna saka incha kǝthlǝm kǝ sakandǝ nafchiɗi tatǝ Farta, ma nan chǝta. 25 Nama, tapi mbuˈowunchi leɗ. 26 Kǝthlǝm ndaˈan maa ǝ ndowunchi nda wa, ‘Mǝthlan ǝ hur chanjeyu,’ mǝ chowun kesh wa. Maa ǝ ndi ndǝ paɗ wa, ‘Mǝthlan hur wan kǝnnda,’ mǝ fǝrwun kit su wa. 27 Kǝthlǝm kǝɗ ǝnɗi thlǝ thlaˈtǝ withlwiˈta mǝt che farta na fee nata kǝ mǝt hǝmǝn farta, kǝɗu na ɓati nggǝta Waˈi Nef nata. 28 Mǝɗi na mǝrtǝ ǝna, minni thlǝ nggomndǝ kutukcha.

29 "Kǝrsǝ ngawarnggwariˈ tǝ ɓahtiˈini,

"‘Chat naa watfartǝ chǝt kaɗ kǝ wuthla,

ndǝr paɗ nech fǝr ɗaˈkǝta wa.

Wanndǝrichǝ paɗ nandǝ hǝhatat kaha ǝ hulafǝrta,

paɗ na fee yiraˈandǝ alkǝchi hulafǝrta.’"

30 Ə wanshengngǝnˈini wansǝndi nggǝta Waˈi Nefa nan pǝn fatˈyan ǝ hulafǝrta. Kwathl heshi nat paɗ nandǝ tǝta. Maa nindǝ nggǝta Waˈi Nefa ɓata hur husaba tǝ alkǝta tǝ manda kaa kaan. 31 Paɗ nan thlǝn fǝ thlǝnchiyan kǝ peendǝ mboˈumndǝ kaan. Fen paɗ kǝ nggomandǝ tachaˈan chǝk ǝ ayi ǝ hur heshi, thlaˈtǝ ǝ ndukwa heshiɗiya kǝ ndukwa heshi thla.

32 "Chaˈam ǝna yowuna fi ɗǝftǝ shukwata, ma niwun njarchiyan mǝthlan nggǝrtǝ ha, mǝthlan chithl yuwa saˈcha, kǝ sǝn wun suwa fektǝ nduk ha. 33 Kǝɗu paɗ, ma niwun ichiɗi nat mbuˈowundiya, kǝ sǝn wun suwa mǝthlan nduk ha, mǝthlan mikǝnnda. 34 Kittaˈan nati mbuˈowunda, nafchi yuwa heshiɗiya nandǝ timwa, se ma ndiiɗ ichiɗi ha ya nat. 35 Hulafǝrtǝ tǝ heshi nandǝ timnda, paɗ ndiktinchi nech timwa."

36 "Paɗ kǝɗar fartaˈan ndu wanshengnan yowun sǝ sǝncha wa. Ndu fǝ thlǝnchi Farta ǝ hulafǝrta, ndu Wanan, se Chinan ndak. 37 Kǝɗ thla chǝt fee ǝ thlǝhati Nuhu, nech ɓati Waˈi nef nat kǝɗu paɗ. 38 Kǝthlǝm ǝ thlǝheˈini kǝn kappa erˈini. Fee sǝmnda, fee sata, hǝssa tǝrtǝ kan, fee fǝr nǝssǝ kan paɗ, kǝ fartǝɗi yimndǝ Nuhu kǝ hur shirkin tǝ ˈyaman. 39 Sǝnwandǝ ǝnɗi nech sǝɓta wa, ɓak kappa ˈyamɗi nggǝlanda, ɓǝlandǝ tandǝ nat. Kǝɗu paɗ na nggǝr ɓati Waˈi nef nata. 40 Ə wanshengngǝnˈini, naa nafchǝ nat ǝ hǝngga, naa fee tǝrandǝ arta, kǝ mal fee artǝ si. 41 Naa nǝssǝ naa haˈtǝ ɗar ɗakwan fǝndǝ rat, naa fee tǝr arta, kǝ mal fee artǝ si. 42 Kǝthlǝm ndaˈan chokam tǝ tahǝsfa, kǝthlǝm sǝnwowun fartǝɗi naa Chindǝ ɓat kaɗ wa. 43 Paɗ kǝ wathlowunchǝ ǝnɗa ha, mam wa tǝ sǝn thlǝwir wanshengngǝnɗi na yerǝ ɓat wita, mǝ ngech saˈena wa. Paɗ nee malanchi kǝ yim fee kweuriyan wa. 44 Kǝthlǝm ndaˈan nwaat kun paɗ kǝ chok wun tǝ tahǝsfa, kǝthlǝm ǝ wanshengngǝnɗi sakwaktǝ wun, naa Waˈi Nef ɓat kaɗi.

45 "Wun nech kǝ mafaɗiya thlǝ thlǝnandǝ ǝn kaɗ keˈkeˈ, thlǝ hur inda, thla naa thlǝwirˈyan ɗǝf anchis kǝ ɗǝɓ har tǝ maafechiɗi nech wirˈyan. Kǝ fǝranchi tandǝ ɗǝsǝmndiyandǝ ǝ wanshengngǝnchǝɗi kǝmchǝsi? 46 Thlǝ mbǝs ǝn har kǝmɗi mafanɗi, maa ǝ ɓi thlǝwirˈyan ɓat mbǝsandǝ mǝthlan chǝt ǝnɗi ndanɗǝ fee wa kǝn chǝta. 47 Kittaˈan nati mbuˈowunnda, nan ɗǝf mafaɗiya kǝ ɗǝɓ har tǝ ichiɗi nessiyan nat. 48 Paɗ maa mafaɗan kǝ sǝɓtǝ nefa, ndangkan indiyan paɗ wa, ‘Thlǝwirinchi nee ɓi kaɗ leɗ wa.’ 49 Kǝ nggaktǝ thlǝfandǝ shikechǝ terˈyan, mǝthlan sǝmnda, mǝthlan sata tǝ fǝ saa mbaalcha. 50 Nech thlǝwiri mafeˈini ɓat ǝ fartǝɗi sakwaktǝn, paɗ ǝ wanshengngǝnɗi sǝnwaktǝn. 51 Naa thlǝ wuranˈyan thlifanda farchǝ kaha, ǝnɗi nech kǝs fǝ wenikicha fee thlǝ thlǝmchǝ nafcha, mǝthlan maa ndaˈan nech kǝsndi. Ə minni naa nafchǝ tǝta tǝ kan wanthlancha.