1 Kǝ nak Yesu ǝ nggom nafchǝ terchan kǝmɗiyan, tǝrkan kǝ ɓǝra tingringnda chokkan ha. Kǝmsichiyan paɗ ɓakandǝ kǝ thlǝmaɗan.

2 Nggakkan chaˈandǝ tandǝ har tǝ ndat wa,

3 "Fǝ mbǝs ichǝ har, fee sinchǝ wa wulan fat tanda hur Shemeta.

Kǝthlǝm kutǝrakti hulafǝrta yinanda.

4 Fǝ mbǝs ichǝ har, fee nech tǝ sǝɓtǝ wanɗǝkaɗata,

kǝthlǝm naa Farta mbiɗaandǝ wanɗǝkaɗechˈyanda.

5 Fǝ mbǝs ichǝ har, kǝmɗi fee thlǝ thlaˈawakchǝ inda,

kǝthlǝm naa Farta fǝranda ǝnɗi ɗǝftǝn miyan.

6 Fǝ mbǝs ichǝ har, kǝmɗi fee thlǝ yahtǝ wanɗǝkaɗechˈyanda, ndaˈan nech kǝ thlǝnandǝ ǝnɗi yahtǝ Farta.

Kǝthlǝm nandǝ choktǝ kǝ nafchǝɗi naa fee nggallandata.

7 Fǝ mbǝs ichǝ har, fee thlǝ haɗandǝ nafchǝ fa,

kǝthlǝm nandǝ haɗandǝ Farta fa.

8 Fǝ mbǝs ichǝ har, fee nech chiɗ chiɗ tǝ wanɗǝkaɗata,

kǝthlǝm nandǝ naa Farta.

9 Fǝ mbǝs ichǝ har, kǝmɗi fee thlǝ mbǝnanchi pǝthlǝr nafchǝ kaɗi,

kǝthlǝm nech Farta ˈya tanda wa wanchiyan.

10 Fǝ mbǝs ichǝ har, kǝmɗi fee naa fee ɓahandata kǝthlǝm chǝt ǝnɗi yah tǝ Farta.

Kutǝrakti hulafǝrta nan choktǝ kǝ yinanda.

11 "Kun fǝ mbǝs ichǝ har, maa nafchǝ ˈyarawunchi, kǝ fǝrowunchǝ ndǝ ɓahta, tandǝ mbuˈ sǝɓtǝ icha kǝ inwun tǝ lekta, kǝthlǝm nggǝta. 12 Mbǝnam fata tǝ chiɗ chiɗ tǝ wanɗǝkaɗata kaˈan, kǝthlǝm nowun mbǝs kǝnawan kaˈan hulafǝrta. Kǝthlǝm kǝɗu paɗ ɓahandǝ ndǝ fee fǝ shenuˈtǝ tǝ yahti Farta fee lech nat ha mǝ kun.

13 "Kun nech kǝ fisha ǝ hur heshi. Tǝkǝɗu ma ǝ tǝr mbǝndi fish kaɗi, tǝ kǝn naa fee nggǝrandǝ mbinan kaɗi? Chokchan kǝ kohaɗan peˈwu fee chǝt ǝnsǝ wa. Tǝn fee thlǝrandǝ kaɗ ndak kǝn fee ɗǝsanda.

14 "Kun nech kǝ ɗaˈkǝta ǝ hur heshi. Nat mǝrǝɓɗi tǝndǝ fee ɗar tingringnda wuɓ wa ha wa. 15 Njawu fee tikesha kǝ chipan fee tǝ ɗuliya wa. Naa fee ɗǝftǝ kǝ yikaa, kǝthlǝm kǝ fǝrantǝ ɗaˈkǝt nat nafchiɗi ǝ wuran. 16 Kǝɗu paɗ, malaman kǝ nǝ nafcha ɗaˈkǝtɗi nech hwirˈyowun. Kǝthlǝm maa ǝ nii ndǝ kwastǝ tarchiɗi thlǝnandǝwun, nandǝ fǝran maandǝ Chinwun thla nech hulafǝrta."

17 "Kǝ sak wun wa ɓechi kǝthlǝm kǝ welani kusiˈ i Musa kaɗ wa, ndu yarechiɗi fǝ shenuˈtǝ tǝ yahti Farta wa. Ɓawi kǝthlǝm kǝ welani tandǝ kaɗ wa, ɓechi kǝthlǝm kǝ ndiiɗani tandǝ ha. 18 Kittaˈan nati mbuˈowunda, kǝn hulafǝrtǝ tǝ heshi paˈtǝ kaɗi, nggǝ ɗuhwal tǝ wan nggaˈal ndiktǝ kusiˈ si nech wethlǝ kaɗ wa. Nan ndiiɗ ha nat. 19 Kǝthlǝm ndaˈan nat thla chenchǝ artǝ kaɗ hur kusiˈ chǝɗi nech ngguɗyeh ya, paɗ kǝ chaˈantǝ nafchǝ har kǝ chendǝ kaɗ kǝɗ ǝnɗi chǝtǝn. Nech fee ndat tǝ ndǝ wa, thla nech top ǝ kutǝrakti hulafǝrta. Nat thla perech har, chaˈan kan kaɗ paɗ. Nech fee ˈya ndǝ wa thlǝ maanda ǝ kutǝrakti hulafǝrta. 20 Nggǝt ndowun nda, maa ǝ mbǝrawowun Farisiyawecha ha tǝ fǝ chaˈan ɗǝ kusiˈ i Musa kaɗ tǝ kaakǝta wa. Nowun yim kǝ kutǝrakti hulafǝrta wa."

21 "Sǝkwun ndan fee nafchǝ choh wa, ‘Mǝ ɓǝlǝn fata wa. Nat thla ɓǝlchǝ fata, nafee kǝnaanda.’ 22 Nggǝt ndowun nda, thla thlǝ nech sǝɓandǝ hwirkaɗ tǝ sheɗan, nafee chakan mee. Thla erech sheɗan, nafee ɗǝt taˈanchi kǝ mǝt chak mee. Thla paɗ ech sheɗan wa, ‘Chǝ ɓema,’ naa fee mǝkndǝ kǝ wur wata.

23 "Kǝthlǝm ndaˈan, ma chǝ mǝt fǝr pafǝn ˈyo, mǝt thle ɓǝra icha, chat kuɗuk ko wa shetusi tǝ wech hur, 24 malanko fǝr pafǝn taˈan ǝ minni. Ɗǝko kaa mban tahsandǝ kaɗi tǝ shet wa. Kǝno ɓat fǝr pafǝn ˈyo kǝmɗi Farta.

25 "Maa ɗi yowun mǝk wanhar wa, wesheko ka mban tahsanan kaɗ tǝ ndi peˈwun ɗar mbanda, kǝ nowun saˈtǝ kǝ mǝt chak miyan. Maangga kǝɗu wa, nan ɗǝt tǝ wech kǝmɗi thlǝ chak mee. Thlǝ chak miyan paɗ nan ɗǝt tǝ wech kǝmɗi wanfangnda. Wanfangnan paɗ nan pǝk wech kǝ pursuna. 26 Kittaˈan nati mbuˈowunda, chewu fee kesh minni wa. Maangga tǝ tiyin nat ǝnɗi thlutǝ fee wa, kǝnen chet kesh ǝ minni.

27 "Sǝk wun ndi fee wa, ‘Kǝ chin fǝlaukǝtawa.’ 28 Nggǝt mbuˈowunda, chika wun ɗǝpanchǝ nunefa tǝ kaɗa hunandi, chok chan yuwa ǝ huni tǝ ndi ǝ wanɗǝkaɗatˈyan. 29 Maa wenitiyo yi harsǝm thlǝ ɗǝfchǝ wech kǝ chin ɓǝɓifata, huhlanko kaɗi kǝ mikeen kaɗi. Kwechan kǝ kuɓen tanggathla fat arta ǝ fiyo mǝ kǝ mǝk fee nat fatˈyo kǝ hur wur wata. 30 Maa herˈyo yi harsǝm thlǝ ɗǝfchǝ wech kǝ chin ɓiɓǝfata thlen ko kaɗ kǝ mǝkeen kaɗi. Kwechan kǝ kuɓen tanggathla fat arta ǝ fiyo mǝ kǝ mǝk fee nat fatˈyo kǝ hur wur wata.

31 "Ndi fee paɗ wa, ‘Nat thla karchǝ nuwan, nwaat kǝ yaran tǝ ɗerwel si yi chak reta.’ 32 Paɗ nggǝt mbuˈowunda wa, nat thla karchǝ nuwan, mangga kǝ ɗar fǝlaukǝta wa, ɗǝf tǝ anchi kǝ chit fǝlaukǝta. Thla paɗ kahanchi nuɗi kartǝ fee, chok kǝ thlǝ chǝt fǝlaukǝta.

33 "Tapi sǝk wun ǝnɗi mbuˈandǝ Farta nafchi choh. Ndakan wa, ‘Kǝ en thlǝm Farta kǝɗu wa, paɗ chamandǝn Chinda ǝnɗi ɗǝftǝwun miyan.’ 34 Nakanya nggǝt mbuˈowun nda wa, kǝ ransowun wa chǝk ngguɗyeh. Kǝ ransowun tǝ hulafǝrta wa, kǝthlǝm ndaˈan nech kǝ mǝt chokti Farta. 35 Mǝ ransowun tǝ heshi wa, kǝthlǝm ndaˈan nech kǝ mǝt sǝt sarchiyan. Mǝ ransowun paɗ tǝ Urshelima wa, kǝthlǝm ndaˈan nech kǝ kapa mǝrǝɓan i kapa kwitira. 36 Mǝ rensen tǝ indiyo paɗ wa, kǝthlǝm no mbahǝn chantǝ wesho kaɗ chǝk arta kǝn kuɗkuɗ, ndu heɗɗǝɗa wa. 37 Ənɗi kǝmchǝs kǝ mbuˈ nefa, ndaˈan nech kǝ, ‘Əa’ ndu ‘Auwa.’ Ənɗi mbǝranchi ha kǝɗu, thlaˈchan yu mǝɗi hweˈra, ɓǝɓiˈan.

38 "Sǝk wun ǝ mbuˈ fee hur Laulawati Farta choh ndat wa, ‘Nafɗi huhlanchi weniti sheɗan kaɗi, mǝthlan paɗ kǝ kǝtan fee yaˈan kaɗ kǝ kwaran. Nafɗi kǝtanchi thleni sheɗan kaɗi, mǝthlan paɗ kǝ kǝtan fee yaˈan kaɗ kǝ kwaran.’ 39 Nggǝt mbuˈowunda tǝ ndat wa, thla yahchǝ chu ɓǝɓifat fa, malangko tǝ ǝna chitˈyan. Maa ǝ mbali yowun wech ǝ mbertǝyo yi harsǝm, tǝɓranko mbertǝ thla fǝ paɗ. 40 Ma mǝk yowun wan har wa tǝ kaɗat wa tǝn thlǝnandǝ kapatˈyo, malangko chika ǝna chiptiyo. 41 Maa thlǝ yandǝsi kweˈyuchǝ wiˈtǝkaf kǝɗ mel arta, ɗu kǝ wiˈwun mel chap. 42 Maa ǝ shiyuchi yowun ǝna, fǝrandǝn. Thla paɗ ɓech ka kumata mǝɗyo, mǝ njenǝ wa.

43 "Sǝk wun ndi fee choh wa, ‘Kǝ yehin wanmu, kǝ kerin atǝkretu wa.’ 44 Tǝkǝɗu nggǝt ndowundǝ wa, kǝ yehin atǝkrechǝwun, kǝ shiwun kǝ ɗar fee nech ɓahowunda. 45 Tǝkǝɗu nat wun chokta kǝ wanchi Chinwun thla nech hulafǝrta. Thla thlǝ ɗǝfchǝ watfartiyan kǝ wenantǝ mǝt kaɗ kǝ ɗar fǝ kaa kǝta tǝ fǝ ɓǝɓifecha. Thlǝ ɗǝfchan er kǝ ɓa kǝ ɗar nat fǝ kafecha, tǝ fǝ kumi kafat paɗ. 46 Maa thlǝ yahchowun fee thlǝ yahchǝ wunchǝ ndak, nechowun mbǝs ǝn har wa kǝni? Awi ngga kǝɗu chika fǝ thlǝt chamincha thlǝ chǝtndǝ paɗ wa, fen tǝɗi nech kǝ fǝ ɓǝɓifech hacha? 47 Maa wanmanchǝwun ndak thlǝ ndandǝwun ǝna, mǝ thlǝ chǝt wun thla mbǝranchi yi takǝɗ nafchǝ ha? Awi chika fee nawakchǝ kǝ Yahudawecha, ngga kǝɗu thlǝ chǝtndǝ paɗ wa? 48 Kǝthlǝm ndaˈan kǝ nɗiiɗ wun kaɗi, kǝɗ ǝnɗi naa Chinwun thla nech hulafǝrta kǝ ndiiɗan.