1 "Mbǝramsi tǝ tar kaakǝt ˈyowun kǝchok kǝyi nat ǝ wenitǝ ndak wa. Kǝthlǝm maa chǝwun kǝɗu, nowun mbǝs kǝnau pafǝn mǝɗi Chinwun thla nech hulafǝrta wa.

2 "Kǝthlǝm ndaˈan, maa no kǝsandǝ fǝ ɓahchǝsi, mǝthl nowun fǝɗandǝ pandǝra kǝthlǝm sǝnandǝ nafchǝs wa kun chicha wa. Kǝɗ ǝnɗi thlǝ chǝt ɓǝɓi nafcha ǝ wur nggomndiyanda tǝ ɗar njartǝ mbanchi pǝthlǝr wurcha, kǝthlǝm kǝ chǝm nafchǝ tanda. Kittaˈan kǝ wathlowunchǝ ha, tapi mbǝsndǝ kǝnau pafǝn ˈyandǝ hacha. 3 Paɗ maano fǝran kǝnau pafǝn fǝ ɓahcha, kǝ yehǝn kǝ sǝn yowun ǝnɗi natu chǝta wa, 4 kǝthlǝm kǝnau pafǝn tǝɗi natu fǝrta kǝ chok ǝ wuptǝ kaɗi. Chinwun tǝɗi nech naa ichiɗi nech wupta, mǝthlan nech furu kǝnawan.

5 "Paɗ maa nowun shita, kǝ chokwun kǝɗ ɓǝɓi nafcha wa. Nafchǝɗi thlǝ yahchǝ shitǝ wur nggomincha tǝ njartǝ mbancha, maˈ nǝ nafchǝ naa tanda. Kittaˈan kǝ wathlowunchǝ ha, tapi mbǝs ndǝ kǝnaun pafǝn ˈyanda. 6 Maa yehǝn shita, yimko kǝ kǝnˈndo, ngǝlanko mii kǝnnda, kǝ shiyin kǝmɗi Chu tǝɗi thlǝ nawaktǝ fee. Chu tǝɗi nech ichiɗi wuɓta mǝthlan nech furu kǝnau pafǝn. 7 Maa kun shita, mǝthl nowun nggǝrandǝ kan wa, kǝɗ fee sǝnwakchǝ Farta wa. Sak tanda na Farta sǝk tanda kǝthlǝm tertǝ shenuˈtiyanda. 8 Kǝ chuwun kǝɗ tanda wa, kǝthlǝm Chinwun sǝntǝ ichiɗi kǝmchǝs kǝ mbǝswun, kǝnowun shiyanda.

9 Ə mbanɗi natwun shitǝ ya.

"‘Chinmǝn, thla hulafǝrta,

kǝ manan fee thlǝmwa,

10 kǝ sǝn nafcha wa chǝnech kǝ kwitira,

kǝ chifee ǝnɗi yahtu hur heshi kǝɗ thla thlǝ chǝt fee hulafǝrta.

11 Kǝ fǝreˈǝnchǝn ɗisǝmǝn yi chik yen parta.

12 Kǝ keleˈǝnchǝn ɓǝɓifechyaˈan ha,

kǝɗ thla thlǝ kalandǝˈǝn fee ha thlǝ chaˈanchǝ ɓǝɓifat fa.

13 Kǝ yehǝn Hweˈra kǝ kaɗaˈanchi tǝ ǝnɗi pǝɗanchi alkitˈyaˈan ha wa,

Paɗ thlu nggaˈan kaɗ har ˈyan.’

14 Kǝthlǝm maa kalawun nafchǝ ɓǝɓiˈ ichiɗi ha chowundǝ nda, Chinwun thla hulafǝrta nan kalowun ɓǝɓi ichiɗi thlǝnandǝwun paɗ. 15 Maa kalawowun nafchǝ ɓǝɓi ichiɗi chowun ndǝ nda wa, Chinwun hulafǝrta paɗ nen kalowunchǝ ɓǝɓi ichiɗi thlǝnandǝ wun kaɗ paɗ wa.

16 "Maa kun kǝrkuchimnda, kǝ sǝɓawun chimandǝ kaɗ kǝɗ ɓǝɓi nafcha wa. Kǝthlǝm thlǝ siɓanchandǝ chimanchǝ kaɗ kǝ pǝnandǝ nafchǝs wa tanda kǝrkuchimnda. Kittaˈan kǝ wathlowunchǝ ha, tapi mbǝs ndǝ kǝnau pafǝn ˈyanda. 17 Paɗ maachǝ kǝrkuchimnda, kǝ chepeen chǝmaɗo kaɗi, kǝ peˈǝn fiɗet kǝ inda, 18 kǝthlǝm kǝ sǝn fee wa chǝ kǝrkuchimnda wa. Chu tǝɗi thlǝ nawaktǝ fee, thla thlǝ nech ichiɗi thlǝ chit fee ǝ wuɓtǝ kaɗi, mǝthlan nech fǝru kǝnau pafǝn.

19 "Kǝ nggommawun kǝnau indiyowunsi ǝ hur heshi wa, mǝɗi naa chaˈkǝɓcha tǝ lenjeta nech sǝɓandi kaɗ wa. Mǝɗi paɗ naa yaarchǝ yimndǝsi kǝ yarkanda wa. 20 Paɗ nggomamaandǝn kǝnau indiyowunsi hulafǝrta, mǝɗi nawaktǝ chaˈkǝɓcha, ndu lenjeta nech sǝɓandi kaɗ wa. Mǝɗi paɗ nawaktǝ fǝ thlar mbanchǝ tokandǝ kaɗ kǝ yarkanda wa. 21 Kǝthlǝm mǝɗi naa kǝnauˈyo, nech wanɗikaɗatˈyo nat minni.

22 "Wenita nechan kǝɗ ɗaˈkǝti fata. Maa wenito hashas, nat fatˈyo nan ndiiɗ kaɗ tǝ ɗaˈkǝta. 23 Paɗ maa wenitiyo hashas wa, nat fatˈyo nan nat hur wuthla. Maa ɗaˈkǝt ɗi nech fiyo chǝ kaɗ kǝ wuthla, nech maandi wuthlan nat wa kǝni?

24 "Nggǝ nefsi nech mbahǝn maanandi fǝ wurchǝ chap wa. Ndu kǝ yahtǝ arta, kǝ kartǝ arta, ndu kǝ maananchi arta, kǝ njirtǝ thla arta. Mbandǝs natu maanandi Farta tǝ wanɗǝɓǝthla wa.

25 "Kǝthlǝm ndaˈan, nggǝt mbuˈowunda, mǝ sakowunchǝ inda tǝ natˈyowun ha kǝ ɓǝra ǝnɗi natwun sǝmnda, ndu ǝnɗi natwun sata wa. Ndu kǝ mbǝs wun ǝnɗi natwun pat kafa wa. Shishingnda pǝɗawa ɗǝsǝmndǝ ha wa? Paɗ fatˈyowun pǝɗawa kapech ha thla natwun pata wa? 26 Ɗǝpaman ɗiicha. hǝfwanda wa, hathl wanda wa, ngomawandǝ kǝ ɓinducha paɗ wa. Nat tǝ kǝɗu Chinwun thla hulafǝrta thlǝ sǝmanchan ǝn tanda. Awi pǝɗawowun ɗiichǝ ha tǝ maanda wa? 27 Wun hurwun, kǝthlǝm saka inda, nech mbahǝn chekan wanshenndǝ arta indiyan hur choktǝyan?

28 "Kǝthlǝm mǝ naa indǝ sakowun nda kǝ ɗar kapecha thla natwun pata? Ɗǝpaman fitǝ ichǝ hur hwalita tandǝ maanda, chiwa ndǝ tera, ndu kǝ yoˈumndǝ kapecha wa. 29 Chǝk tǝ kǝɗu ngǝt mbuˈowunda, chika Sulemanu tǝ kǝnauˈyan nat, tam wa kwaasa ndiˈchan kǝɗ artǝ hur fitǝ ichiɗa wa. 30 Kǝɗu, maa na Farta mbahǝn kwasandǝ hwalichi chanjeya fee nessi ɓukuya, ǝssi paɗ kǝ njang fee tandǝ kaɗ hur wata, mǝ nggun wa? Fǝ fǝr kit ngguɗyeh.

31 "Kǝthlǝm ndaˈan mǝ sakowunchǝ indǝ tǝ ndat wa, ‘Mǝnat mǝn sǝmnda? Ndu, Mǝ nat mǝn sata? Ndu, Mǝ nat mǝn pat kafa wa?’ 32 (Ichiɗiya na fǝ kumi fǝr kit kata.) Chinwun hulafǝrta shin wa yahwun ichiɗi nat ya, nan kǝsowun ndǝsi. 33 Kǝthlǝm kǝt ndaˈan, tǝrkwathl kan ǝnɗi kǝmchǝs kǝ chuwun ndat wa, kam nat ichiɗi nech kǝ yi kutǝrakti Farta, tǝ thlǝrɗaktiyan. Kǝn Farta chekowun ichiɗiya kafˈyan nat. 34 Kǝthlǝm ndaˈan mǝ sakowunchǝ inda tǝ ǝssi wa, kǝthlǝm ǝssi ɓat tǝ ɓahtiyan. Ɓahchiɗiha ɓukiya chaˈowun chǝnda kǝthlǝm ɓukiya.