1 Chat yimkǝ Yesu kǝ hur kombawal, chen kan ˈyaman pǝɗakan kǝ Kafarnahum, mǝrǝɓɗi maandǝn. 2 Tukuthl, fowun nafchi ɓakandǝ tǝ thla saafatˈyan kaɗi, ɗuk ɗar wenicha. Kǝ nak Yesu fǝrkit ˈyanda, ndang kan thla saa faɗanˈyan kaɗ yu wa, "Waˈinchi, tǝran hwirha, kaluchi ɓǝɓi fechˈyo ha." 3 Sǝktǝ kǝɗu, fowun fǝ chaˈandǝ kusiˈ i Musa kaɗi fee nech minni ndangkandǝ raˈan wa, "Nafɗa mǝthlan ˈyara Farta."

4 Yesu sǝntǝ ǝnɗi natndǝ saktǝ kǝ ɗaran, ndang kan tanda wa, "Kǝthlǝm mǝ, natwun kaɗa ɓǝɓiˈan kǝɗuyu hur wanɗǝkaɗech ˈyowun? 5 Yen nech paˈpa, kǝ ndǝ fee wa, ‘Kaluchǝfee ɓǝɓifechˈyo ha wa,’ ndu ndat wa, ‘Thlaˈu kǝ wiˈin’? 6 Yah chisi kǝ sǝn wun wa nggǝta Waˈi Nefa alkǝtˈyansi kǝ kallantǝ ɓǝɓifech ha hur heshi." Chat ndang kan thla saa faɗanˈyan kaɗ wa, "Thlaˈu, tǝru wenichiyo, kǝ pǝɗen kaɗi." 7 Nafan paɗ thlaˈkan pǝɗakan kaɗi. 8 Kǝ nak nggomndi nafchaˈan kǝɗu chat lekǝkanda, manangkandǝ Farta thla fǝranchǝ nafcha weˈtǝ alkǝt ini.

9 Kǝ nak Yesu kǝ pang tǝ wiˈta, nakan yowun nefa thlǝ thlǝt chamnda thlǝ ˈya fee ndǝ wa Matiyu, mǝthlan ɗas mǝt thlǝt chamnda. Ndang kǝ Yesu wa, "Paro nenchi." Chat thlaˈkǝ Matiyu parakan ndi.

10 Kǝ nak Yesu sǝmˈǝna ǝ wiri Matiyu, terchan fǝ thlǝt chamincha tǝ fowun fen paɗ fǝ ɓǝɓifecha, ɓech kǝ sǝmndǝ tǝ ndi tǝ kǝmsichiyan. 11 Kǝ nak Farisiyawech kǝɗu. Chihan kandǝ kǝmsichiyan wa, "Kǝthlǝm mǝ thlǝna thlǝ chaˈanan ˈyowun har sǝmˈǝn tǝ fǝ thlǝt chamincha, tǝ fowun fen paɗ fǝ ɓǝɓifecha?"

12 Kǝ sǝkkǝ Yesu inini ndakan wa, "Fǝ hashas tǝ fecha pandawu ǝn tǝ thlǝ ɗǝpa fata wa, thla nech haɗchan ndak. 13 Ɗama kǝ tausawun mǝ na ndiktǝɗiya sakta. Ndiktǝɗi ndech wa, ‘Thlǝrɗakta yahti mǝɗyowun, ngga thle ɓǝra ichawa.’ Kǝthlǝm ngga ɓechi kǝ ˈya fǝ kafecha wa, ɓechi kǝthlǝm fǝ ɓǝɓifecha."

14 Chat ɓak kǝmsichi Yohanna kǝmɗi Yesu. Chǝhan kanda wa, "Mǝchicha nggaˈan tǝ Farisiyawecha thlǝ kǝrchaˈan kwichimnda paɗ kǝmsichiyo kǝrwandǝ kwichimnda wa?"

15 Nggǝman kǝ Yesu tanda wa, "Shikechǝ chima perra nandǝ chǝt sǝɓtǝ hwira maa peˈ chima perriˈan tǝ tanda wa? Na wanshengnan ɓata thla na fee tǝrandǝ chima perriˈan kǝ malfee tandǝ ichǝt nanda. Ə fartiˈni nandǝ kǝr kwichimnda.

16 "Yowunsi nech mbumandǝ ɗohtǝ kapata tǝ yuwa chimbita wa, kǝthlǝm mbumnan nan thlahandǝ kapaɗan kaɗi, thlahtaˈan nan mbǝrandǝ thlaha tangtang. 17 Ndu kǝ thlǝr yowun yuwa ˈyam inambi kǝ hur ɗohtǝ kuruɓtǝ fiya wa. Ma ǝ thlǝr fee si, ɗohtǝ kuruɓtǝ fiyan nandǝ ɗathlǝ kaɗi, kǝ thlǝr ˈyam inabi taˈan kaɗi, sǝɓkǝ kuruɓtǝ fiyan kaɗi. Yuwa ˈyam inabi thlǝrkǝ fee kǝ yuwa kuruɓtǝ fiya. Tǝ kǝɗu nggǝ fee kuɓa ˈyam yanngga taˈan, ndu kuruɓtǝ fiyan wa."

18 Kǝ nak Yesu ɗar mbuˈandat kǝɗu, chat yowun pangndi wur nggomndi Yahudawecha ɓakan koptǝ pangngǝnan. Ndangkan wa, "Waˈinchi kǝ nuwaa mir chatchat ya. Ɓo kǝ ɗifeen her kafa, nan thlaˈta." 19 Thlaˈkǝ Yesu parakan nafan. Kǝmsichiyan paɗ parakandǝ ndi.

20 Chat yowun nunefa thla hurech kum nggǝrsǝ chap mǝthlan ɓahtǝ ha tǝ hatǝfa thlǝr fera. Ɓakan tǝ kǝrsǝ Yesu, tǝkan kan her mii kapatˈyan fa. 21 Kǝthlǝm mbuˈchan hur wanɗǝkaɗatˈyan wa, "Maa ǝ tǝkani her chika kapatˈyan fǝ ndak, ni kǝndǝ kaɗi."

22 Tǝɓǝr kǝ Yesu ha nakan ndi, chat ndakan wa, "Waˈinchi, tǝran hwirha. Fǝr kit ˈyo kǝnuchǝ kaɗi." Chat kǝnkan kaɗi.

23 Kǝ ɓak Yesu kyeuri pangndi wur nggomndi Yahudawechaˈan, nakan fǝ pe shilacha tǝ nggomndi nafcha tǝt hwanya ǝ wur mǝrtaˈan. 24 Ndangkan tanda wa, "Chem kesh mǝɗya. Wannuwanan ngga tǝ mǝrwa, tǝn saˈyen ndak." Masan kanda yi njir fata. 25 Kǝrsǝ chendǝ tertǝ nggomnan kesh, yimkǝ Yesu kǝ hur kǝnndi wannuwanan kǝskan herˈyan har, thlaˈkan tǝ shishingndǝfa. 26 Welkǝ kusheˈtǝ ǝnɗi chǝtǝn ha chǝk tǝ yenni, ǝ thle hahiˈyan.

27 Kǝ nak Yesu pǝɗat thlaˈtǝ minni, chat kominchǝ chap parakandǝ ndi, nakandǝ ˈya ndi tǝ alkǝta, "Kǝ haɗuchǝˈǝn fa, Waˈi Dauda."

28 Kǝ yim kǝ Yesu kǝ yowun wira, ɓak kominchiɗi kǝmɗiyan, chihangkan tandǝ mee wa, "Fǝrwun kit wa nii mbahan kǝnowundǝ kaɗ wa?" Nggǝmankan nda wa, "Aa, Chinda." 29 Kǝna tǝkan her weniti chikawun fa ndakan wa, "Kǝthlǝm fǝr kit ˈyowun na fee kǝnowundǝ kaɗi." 30 Inkǝ weniti chik yen ha. Kǝn Yesu tǝɗa ndǝ thlǝmech ˈyandǝ kaan ndakan wa, "Kǝ yahwunsi kǝ sǝn yowun ǝnɗi chowun ndi wa." 31 Paɗ chet ˈyandǝ kesh, nakandǝ fanandǝ kusheˈtǝ Yesu ha chǝk tǝ yeni, ǝ thle hahiˈan.

32 Kǝ nak kominchǝɗi chap yu pǝɗat kesh, ɓak fowun nafchǝ tǝ yowun hishnefa thla njandǝ hwaˈǝrchǝ shenuˈta kǝmɗi Yesu. 33 Kǝ chen kǝ Yesu hwaˈarchaˈan kesh, nafɗi mbahan wakchǝ shenuˈtaˈanyu shenuˈkan. Nggomndi nafchaˈan sakandak inda ndakandǝ wa, "Tamwamǝn na weˈtǝ ǝn kǝɗ thleya ǝ hahi Israˈila wa."

34 Paɗ ndak Farisiyawecha wa, "Tǝ alkǝti kutur hwaˈarcha, thlǝ rǝkandǝn hwaˈarchaˈan kesh."

35 Thlaˈtǝ minni Yesu parakan nat mǝrǝɓcha tǝ wanmǝrǝɓcha. Nakan chaˈandǝ kaɗ ǝ hur wur nggomndi Yahudawechaˈan. Nakan ɓas kusheˈtǝ kwastǝ ndik kuturakti hulafǝrta. Nakan kǝnandǝ chǝk ˈyen kumi hashas tǝ fata, tǝ hatǝfech kaɗi. 36 Kǝ nakan nggomndi nafchǝ terchan, haɗan kǝ nafchaˈan fa. Kǝthlǝm tandǝ ɓahtǝ ha, paɗ yowunsi nech kǝsandat su wa. Kǝɗ chohrechǝɗi nawaktǝ thlǝ paratsi. 37 Ndang kǝ Yesu kǝmsichiyan wa, "Tar sǝfaktǝ kaan paɗ nakan fǝ tarchaˈan terwanda wa. 38 Kǝthlǝm ndaˈan shiyaman Chinda thlǝ hǝnggaɗan, kǝ thlǝntǝ fǝ tarcha kǝ chandǝ tar sǝfaktaˈan."