1 Yara ndiktǝɗiya ɓechan mǝɗi Bulus, mafati Yesu Kǝristi, thla ˈya fee ndi kǝ chok kǝ tatǝ kimshaˈyan. Paɗ tataˈan, kǝthlǝm ɓas ndiktǝ Farta. 2 Kusheˈtaˈan thla mbinchan ndaˈan ɗǝftǝ Farta miyan kǝ choh, tǝmɗi fǝ shenuˈchǝ tǝ yahtǝyan, kǝɗ ǝnɗi yarandǝ fee ha hur Lawlawechi Farta fee chiɗ chiɗ. 3 Kwastǝ ndiktǝɗi nech mbinchan ya nechan kǝ ɗar Waˈyan, Chinmǝn Yesu Kǝristi. Tǝmɗi fata nechan ǝ kwathl Dauda, 4 kǝɗu pǝnchǝ fee ndi kǝ Waˈi Farta, tǝmɗi alkǝti Shemeta thla chiɗ chiɗ, tǝmɗi thlaˈtiyan hur mǝmatecha, ndaˈan nech kǝ Yesu Kǝristi Chinmǝn. 5 Tǝmɗiyan, mbǝstǝmǝn kaakǝta chokmǝn kǝ kǝmsicha kǝthlǝm thlǝman, kǝ ˈyamǝn nat pong nafcha, kǝ fǝr ndǝ kit, kǝ fǝr ndǝ maanda. 6 Thleya paɗ ǝ mbǝn tǝ wunchǝ fa, Kun tǝɗi ˈya Farta wunchi kǝ chok wun kǝ yi Yesu Kǝristi.

7 Kǝmɗi yowun nat kun tǝɗi nech ǝ Roma. Kun tǝɗi thlǝ mbǝndǝ Farta faɗan, ˈyakan wunchǝ paɗ kǝ chok wun kǝ nafchiyan fee nech chiɗ chiɗ.

Kaakǝta tǝ kǝɓikaɗi thlaˈtǝ mǝɗi Farta Chinmǝn tǝ Chinda Yesu Kǝristi kǝ chok tǝ wunchi.

8 Ə tǝrkwathl kanan nggǝt chan usoko Fartinchi, tǝmɗi Yesu Kǝristi kǝthlǝm kun nat, kǝthlǝm fee fǝr kusheˈtǝ fǝrkit ˈyowun chǝk tǝ yeni hur heshi nat. 9 Farta, thla nati chan tera nat tǝ wanɗǝkaɗatinchi yi kwastǝ ndikta thla nech mbinchan yi Waˈyan, thla pǝncha wa nggǝt kuɗuktǝ tǝ wunchi weenmǝta 10 Nggǝt shita, chǝka kwati ndat wa, tǝ yahti Farta, kǝ mbǝsi mbanda chǝka tǝ kǝni nakanya kǝ ɓi kǝmɗiyowun.

11 Kǝthlǝm nggǝt yitǝ ha kǝ wiˈyowunchi fa, kǝ fǝrowunchǝ mbǝs ǝn har yi shemeta thla nech ndǝksowunda. 12 Ndat wa nggǝt tǝ kun, kǝ ndǝksamǝn raˈan tǝ fǝrkit ˈyamǝn, yina tǝ yuwun. 13 Wanmanchina, yahchi si kǝ sǝnwun, kurɓani ɗǝf wanɗǝkaɗatsi kǝ wiˈyowun chi fa, kǝɗu paˈ kǝ nakanya nggǝma wandǝ inchǝ wa. kǝthlǝm yahchi si kǝ mbǝsi chekta ǝ mǝɗiyowun kǝɗ thla mbǝsti hur kwaan pong nafcha.

14 Heˈti Helenawechǝs indinchǝ, tǝ fee nawak chǝ kǝ Helenawecha, tǝ yi fǝ sǝn icha, tǝ fee sǝn wakchǝ ǝna. 15 Kǝthlǝm ndaˈan chich fǝrti fatsi kaan, kǝ ɓasi kwastǝ ndikti Farta thla mbinchan, kǝmɗi kun tǝɗi nech ǝ Roma.

16 Kǝthlǝm hariwu fat tǝ kwastǝ ndikta thla mbinchan yi sǝkta i Farta wa, kǝthlǝm ndaˈan nech kǝ alkǝti Farta, thla thlǝ fǝr chi hǝraˈta kǝmɗi chikawun fǝr chǝ kit, kǝmɗi Yahudawecha tǝrkwathl kanan, kǝn pong nafcha. 17 Kǝthlǝm ǝ hur kwastǝ ndikta thla mbinchan i Farta, pǝn fee yowun mbanda thla naa nef mbǝs chok chiɗ chiɗ kǝta pangngǝn Farta, mbanan paɗ ndaˈan nech kǝ fǝr kit, thlaˈtǝ tǝrkwathl kanan kǝ ndukwaɗan, kǝɗ ǝnɗi natǝn kǝ yaraɗan ndat wa, "Nat thla nech chiɗ chiɗ tǝmɗi fǝr kit nan nat ha."

18 Kǝthlǝm thlǝ pinchǝ fee hatǝ hwiri Farta thlaˈtǝ hulafǝrta, kǝ ɗar kumi para Farta nat, tǝ tar ɓǝɓifata yi nafcha fee thlǝ njekanchǝ kittaˈan, tǝmɗi tar ɓǝɓifechˈyanda. 19 Kǝthlǝm nat ǝnɗi nafee mbahǝn sǝnda kǝ Farta, nechan hayang kǝmɗi yanda. Kǝthlǝm Farta pǝnandech kǝɗu. 20 Kǝthlǝm fartǝɗi nggak tǝ fee tǝn heshi. Ichi Farta thla thlǝ mbahǝn waktǝ fee nat tǝ wenita, ndat wa alkǝˈyan yi kǝ kwekǝɗan tǝ choktiyan kǝ Farta, nechan hayang tǝmɗi ichiɗi tǝndǝn. Kǝthlǝm ndaˈan nafcha ǝ mban hǝraˈtǝ yandǝs wa.

21 Chika nakan wa ǝ sǝndǝ Farta, nat tǝ kǝɗu manawandǝ kǝɗ Farta wa, chawandǝ usoko paɗ wa. Kaɗat ˈyanda chikan kǝ kohaɗan. Wanɗǝkaɗech ˈyanda sǝnwakcha ǝna, pong kaɗi. 22 Thlǝ tǝrchanda wa ɗathl chanda, kǝɗu chokka ndǝ kǝ ɓam cha. 23 Mbeɗan kandǝ maandǝ Farta thla thlǝ mǝr wakcha, tǝ saktǝ fati nefa thla thlǝ mǝrcha. Mbeɗan kandǝ ha tǝ saˈmbǝrcha fee tǝndǝ fee kǝɗ ɗingcha, tǝ yi ɗǝparecha, tǝ ˈYi weˈ tǝ ichiɗi thlǝ kah chǝ hwir haha.

24 Kǝthlǝm ndaˈan fǝr kǝ Farta tandǝ kǝ thlǝnadǝ ɓǝɓi icha, thla nawakchǝ chǝdchǝɗ thla yah tǝ wanɗǝkaɗech ˈyanda, naka ndǝ ɓahandǝ fech ˈyanda kǝ raˈan. 25 Mbenɗan kandǝ kittaˈan tǝ ɗi ha nech kǝ yi Farta tǝ lekta. Nakandǝ maanandǝ ichiɗi tahǝs tǝ fee, mǝni thla nggǝtchǝ minchi. Mǝthlan tǝɗi chaˈchǝ si kǝ chim fee anchi kǝ poriˈ. Kǝ chok kǝɗu.

26 Kǝthlǝm ndaˈan fǝr kǝ Farta tanda kǝ yah ti wanfata fee thlǝ fǝrchǝ hartǝfata. Nǝssi yandǝ paɗ mbeɗa kandǝha kǝm ɗi nunef tǝ hish nef ha, thla nech keˈkeˈ si kǝɗ ǝnɗi tahǝs tǝ Farta, tǝ weˈ tǝ kǝmǝnɗi tahǝs waktǝ Farta. 27 Kǝɗu paɗ hǝssa mbenɗan kandǝ kǝmndǝ ha tǝ nǝssa thla tahǝs tǝ Farta tǝ kǝmnda tǝ hǝssa kǝɗ fen. Hǝssa tǝ hǝssa nakan ndǝ thlǝnadǝ ǝna har tǝfatkaɗi, nakandǝ kaɓan indiyandǝ ɓǝɓi ǝna thla nech keˈkeˈ tǝ tanda kǝthlǝm ɓǝɓifechiɗi thlǝ chit nda.

28 Nakan nawandǝ kim si kǝ sǝndǝ Farta wa, Fǝr kǝ Farta tanda kǝ koha kaɗata, yi chit ǝnɗi kǝm wakchǝ si kǝ chǝ fee wa. 29 Ndiiɗ kandǝ kaɗi tǝ chika weˈtǝ yen kumi kaakǝta, tǝ ɓǝɓifata, tǝ yahti wanfata, tǝ atekrikǝta hur wanɗǝkaɗata, ndiiɗ ndǝ kaɗ tǝ sǝraˈta, tǝ ɓǝlfata, tǝ yaanda, lekta, tǝ pongǝn wanɗǝkaɗata. Fǝn nech kǝ fǝ kalwar micha, 30 Tǝ fǝ sǝɓandǝ thlǝm nafchǝ kaɗi, tǝ fee nech kǝ atǝkrechǝ Farta, tǝ fǝ ˈyara fecha, tǝ fǝ thlaˈandǝ incha, tǝ fǝ maanandǝ inchi yanda, tǝ fǝ kaa mban chit ɓǝɓifecha, tǝ fee thlǝ fǝrawak chǝ maandǝ parchǝ nanda. 31 Fen fǝ kumi ɗaathlcha, fee thlǝ ndiiɗa wakchǝ ɗǝf mee ha, fǝ kumi mbǝnfecha, tǝ fee thlǝ haɗawak tǝ ǝn tandǝ fa. 32 Chika nakan wa ǝ sǝndǝ chakmeˈi Farta tǝ ndat wa, fee thlǝ nech thlǝnadǝ weˈtǝ inchiɗiya kǝmdǝs kǝ mǝrnda, kǝɗu ngga wa tǝthl thlǝnandǝ ichiɗiya ɗeng wa, thlǝ nechan ndǝ nggǝ maandǝ fee thlǝ nech chiɗan kǝɗu.