1 Wanmanchina, ǝnɗi kapati yahta nat tǝ wanɗikaɗatinchi, tǝ shitinchi kǝmɗi Farta, wanmanchǝn Israˈilawecha kǝ hǝraˈnda. 2 Ni mɓahǝn mbuˈowunnda nggǝ tuˈtǝs wa ndat wa, thlǝ kweˈchanɗi ha tǝ para Farta, paɗ kweˈtandǝ ha ngga kǝ ɓǝra sǝn kit wa. 3 Sǝnwandǝ mbanɗi tahsandǝ Farta, ha thla thlǝ chandǝn nafchǝ kaɗ kǝ nandǝ chǝɗchǝd ǝ pangngǝn nan wa. Ə kiindǝ mban yinanda, parawandǝ mbanɗi tahsandǝ Farta ha wa. 4 Kǝristi nech kǝ ndiit chaˈandi Musa kaɗi. Kǝthlǝm nat thla thlǝ fǝrchi kit, kǝ chok chǝdchǝɗ ǝ pangngǝn Farta.

5 Kǝɗaya yarandǝ Musa ha kǝ ɗar chok chǝdchǝɗ kǝta pangngǝn Farta tǝmɗi para kusiˈ. Ndatwa, "Nat thla perech chaˈati kusiˈ taˈan nan nat ha tǝmɗiyan." 6 Paɗ ǝnɗi mbuˈtǝ ndikti Farta, ya kǝ ndar chok chǝdchǝɗ kǝta ǝ pagngǝn Farta, thla ɓech tǝmɗi fǝr kit. Ndatwa, "Kǝ nden hur wanɗǝkaɗat ˈyo wa, ‘Wun nech tǝrtǝ kǝ hulafǝrta ‘Kǝthlǝm kǝ ɓǝ kah tǝ Kǝristi.’" 7 Ndu kǝ nden wa "‘Wun nech ɗǝt kaha kǝ kan haha ‘Kǝ thlaˈantǝ Kǝristi hur mǝmatecha.’" 8 Mǝna ndikti Farta mbuˈta? Ndichan wa, "Ndikti Farta nduk tǝwechi, nechan kǝssǝmǝn meˈyo tǝ paɗ hur wanɗǝkaɗatˈyo." Ndaˈan nech kǝ ndikti fǝr kit thla thlǝ ɓasimǝn. 9 Ndatwa, ma mbuˈin tǝ mee ˈyo, "Yesu nech kǝ Chinda," paɗ fǝrko kit hur wanɗǝkaɗechˈyo ndat wa, thlaˈan Farta, hur mǝmatecha, no mbǝs hǝraˈta. 10 Kǝthlǝm tǝ wanɗǝkaɗat thlǝ fǝrchi nef kit kǝ mɓǝsti chǝdchǝɗ kǝti Farta, tǝ mee paɗ, thlǝ nbuˈti fee kǝ mɓǝsfe hǝraˈta. 11 Kǝɗ ǝnɗi nɓuˈti laulawaɗan ndat wa, "Nat thla thlǝ fǝrchi kit kǝmɗiyan nǝǝ fat haranchǝ wa." 12 Pǝn suwa, samsamǝn kǝt suwa chik ngguɗyah. Samsamǝn kǝt suwa pǝthlǝr Yahudawecha tǝ fee nawakchi kǝ Yahudawecha wa. Chǝnɗi artiya methlan nech kǝ chǝn chikawuni, mǝthlan paɗ thlǝ fǝrchi mbǝsˈichihar nat kǝ ɗar fee thlǝ ˈyech ndi. 13 Kǝthlǝm mbuˈchi ndikti Farta ndat wa, "Nat thla echa hur thlǝm Chinda Yesu, nan hǝraˈta."

14 Nechandǝ mbǝr ˈyandǝ wa kǝni kǝ hǝraˈandechi, kǝ ɗar thla fǝrwak tǝndǝ kit kǝ anchi? Nechanɗi mbǝr fǝr kit wa kǝni kǝ ndar thla tamwaktǝndǝ sǝk kusheˈ taˈan? Nechandǝ mɓǝr sǝktawa kǝni maa ngga tǝ ɓasan fee tandǝs wa? 15 Nechandǝ mɓǝr ɓasa wa kǝni, mangga tǝ thlǝn fee tanda wa? Kǝɗ thla yarandǝfeha hur laulawati Farta ndat wa, "Ɓa tǝ fǝ wiˈ ɓaas kwastǝ ndikti Farta, ndiˈchansi." 16 Ngga nat Israiˈlawecha wa thlich kwasti ndiktǝ ɗǝya wa, kǝɗ ǝnɗi mbuˈtǝ Ishaya ndat wa, "Chinda, wun fǝrchi kit kǝ ndar ɓaasɗi, ˈyaˈan ya?" 17 Thle ya penchan tǝ ndat wa, Nǝfa nan fǝr kit tǝmɗi sik ndikti Farta. Ndikti Farta tǝ ɗi, thlǝsik tǝ fee ndaˈan nǝch kǝ ndikti kǝristi. 18 Paɗ ni chiha mee, kaa kittaˈan sikwak nandǝ ɓasan wa? Ai ǝ sǝk nda. Nakan mbuˈchi laulawaɗan ndat wa,

"Ɓǝrati shenuˈti yanda kǝmanti heshiha nat,

Ndikti yanda sheˈ kǝ ndukwa heshi."

19 Nii nggǝr chiha mee, sǝnwaknǝ Israˈilawecha saktǝ shenuˈtaˈan wa? Tǝrkwathl kanan ndech Musa wa,

"Nii ɗǝf wunchi kǝ sǝraˈwun fee chaˈwakchǝ kǝ nafcha,

Nii ɗǝf wunchi kǝ sǝɓawun hwirkaɗi kǝ ɗar hahǝɗi nawaktǝ ɗathlǝ yandǝsi."

20 Ishaya ndik chan nggǝ lekǝt fa wa,

"Ə ɓǝssichi fee ka wakchi nenchi,

pǝninchi fatinchi kǝmɗi fee chihawakchi nenchi."

21 Paɗ kǝ ɗar Israˈilawecha ndakanwa,

"nat parta thlǝ pannanchi harchi chiha,

kǝmɗi nafchiɗi thlǝ fǝrwakchi mannda tǝ paɗ kumthlǝmatˈyadǝsi."