1 Nii chihaa mee, kar Farta nafchiyan wa? Auwa, nggǝt tǝ indinchi thlǝ Israˈila naki, kwathl Ibrahim, paɗ weˈtǝ ndǝ Benjamin. 2 Kar wu Farta nafchiyan wa, fee taatǝn tǝrkwathl kanan. Sǝnwowun ǝnɗi mbuˈtǝ laulati Farta, kǝ ɗar Iliya mǝɗi ɗǝtǝn tǝ tǝta kǝmɗi Farta, kǝ ɗar nafchi Israˈila? 3 Ndatwa, "Chinda, ɓǝlandi fǝ mbanchiyo, paɗ fufohankandi mǝt thle ɓǝra ichiyo kaɗi. ngǝt ndak takcha, paɗ tandǝ kata kǝ ɓǝlichinda"? 4 Weˈtǝ nggǝmǝn mi fǝraandǝ Farta? "Ɗǝfani indinchi nafchǝha aru muɗ, fee kopwakchǝha kǝ manaandǝ Farta yi lekta thla thlǝ ˈya fee wa Baˈal." 5 Kǝɗu choktǝn nakanya, Takǝt nafchis fee tatǝ Farta nguɗeyh kǝthlǝm kaakǝtˈyan. 6 Taˈtǝ Farta chok kǝ ɓǝra kaakǝtyan nga kǝ ɗar tarchiɗi chǝt ndat wa, ma taˈtǝ Farta chok kǝ ɓǝra ǝnɗi chit nafcha, kaakǝtˈyan chokwa kǝ ka kaakǝtawa.

7 Kǝn hacha? Tǝ wulan nafchi Israˈilawecha mbǝsandǝ ǝnɗi natndi kata wa. Paɗ fee tatǝ Farta nggudeyh mbǝssancha, kwaan nafchaˈan nggǝlan kandǝ thlǝmech ˈyanda kǝ ɓǝra ˈyati Farta. 8 Kǝɗ thla yarandǝ fee ha ndat wa,

"Fǝran Farta tandǝ Shemeta yi kumi sǝnwaktǝ ǝna, wenita yi kumi nata,

thlǝmata yi kumi sǝkta, paˈ kǝ ɓukiya."

9 Ndak Dauda wa:

"Sǝm ǝn ˈyanda kǝ chok kǝ ɗafta,

thla ɗǝ faandǝ fee tanda kǝthlǝm kǝ kǝsandǝchi, kǝ hǝmndiyandǝha. Kǝ chok kǝ nɗakwan che wansar tanda,

10 Kǝ chok wenichanda tǝ wuthlǝ fa thla nawaktǝndǝ naa mǝta,

kǝ kun felchandǝha kǝ kweˈkǝɗan."

11 Paˈ kǝ nakanya ngǝt chiha mee. Chek Israˈlawecha wansarta, hǝmchandǝha kǝ nggǝr thlaˈta wa wa? Auwa, paɗ ɓǝɓifaɗi chindiya, chok kan kǝ mban hǝraˈti fee nawakchi kǝ Yahudawecha, chichan kǝɗu, kǝthlǝm kǝ ɗǝftǝ Israˈilawecha kǝ sǝraˈta. 12 Ma ɓǝɓifaɗi chǝt nda ndaˈan ɓech tǝ mbǝs ǝn har hurheshi, wulandǝyanda paɗ ɓi tǝ mbǝs ichikǝhar kǝmɗi fee nawakchǝ kǝ Yahudawecha, wun nech sǝn sǝrtǝ mbǝs ǝn kǝ har ma nggom Israˈilawechi kaɗ nat? 13 Ngǝt ndiktǝ tǝ wunchi kun tǝɗi nawakchi kǝ Yahudawecha. Nakan ngǝt nech kǝ kimshaa yi Yesu kǝmɗi fee nawakchǝ kǝ Yahudawecha, ni nat tǝ thlaˈkirsha tǝ terchi. 14 Paɗ kǝ ɗǝfi nafchin chi kǝ sǝraˈta, tǝ kǝɗu nati hǝraˈndǝ feuna hurnanda. 15 Ma kartǝɗi kartǝfe tanda, chok kǝ ǝna tahsandǝ nafchi heshiɗiya tǝ Farta, nech thlǝt tandǝ nat wa kǝni? Nechan ɓat tǝ mbǝs shishingnda mǝɗi fee mǝrcha. 16 Ma njohǝmǝn ɗi nggak tǝ fee chit har fǝrandǝ fee Farta chǝdchǝɗ, pinwa takǝɗan nan nat chǝdchǝɗ. Kǝɗu ma thlaran chǝdchǝɗ naa njartaan nat chǝdchǝɗ paɗ. 17 Paɗ ma chalthlan fee njartǝ ɗǝftǝ inabi kaɗi yi wira, chi ɗǝ nech kǝ njartǝ ɗǝftǝ inabi yi chanjeya, kǝnan fee ret ˈyowun tǝ ɗǝftǝ inabi yi wiri, thlǝ necho mbǝs ɗǝsǝmɗiyo fii thlaar ɗǝftǝ inabin, 18 mǝthl nen thlaˈandǝ kirshawa kǝ ɓǝra njartǝ ɗǝftǝ inabi tǝɗi chicha thla ndǝ fee kaɗi. Maachi thlaˈandǝ kirsha kǝ kuɗukin tǝ ndat wa ngga chi thlǝ kǝrchǝ thlaar ɗǝftaˈan wa, thlaar chaˈan thlǝ furuchi ɗǝsǝmnda. 19 Maˈ kǝ ndenwa, chathlanfe njarchaˈan kaɗi maˈ kǝ kǝnan fee retˈyo tǝ inabi taˈan. 20 Chok kǝɗu, chicha thlanchi fee kaɗi kǝthlǝm kumi fǝr kit ˈyanda. Kun paɗ thlarwun ha kǝ dar fǝr kit yowun, kǝthlǝm daˈan kǝ chok wun tǝ thlaˈkirshi fawa, lekaman Farta. 21 Ma malawu Farta kaa njartǝ dǝftǝ inabi taˈan wa, chikǝni, nen maluchu wa.

22 Ə mǝɗa thlǝ mbahǝndǝmǝn naa kafati Farta tǝ paɗ ɓahta, pǝntǝ ɓahtiyanha kǝmɗi fee hǝmchiha, paɗ pǝnkan kafatˈyan kǝmɗiyo, ma nɗin kǝ pangnga tǝ choktǝ hur kaakǝtˈyan. Maa ɗiwen kǝ pangnga tǝ choktǝ hur kaakǝtˈyan wa, chi paɗ nafe chalthlu tǝ kaɗi ǝ fǝl inabi taˈan. 23 Tǝ paɗ ma ɗǝwu Yahudawecha kǝ pangngga tǝ kumi fǝr kit ˈyandawa, nafe wumandadha tǝ fǝl inabi taˈan, kǝthlǝm naa Farta mbahǝn ngǝrandad kaɗi kǝ fǝl inabi mǝɗi natndǝ choh. 24 Ma kun tǝɗi nawakchi kǝ Yahudawecha, kun tǝɗi nech kǝɗ njartǝ ɗǝftǝ inabi yi hurhwalita thla chalthlandǝfe kaɗi, wumankǝ fee ret tanda tǝ thla nech ǝ wiri, chich fee thleya paɗ nga kǝɗ thla thlǝ kǝnadǝ fee reti ɗǝfchawa. Chika nakan wa nafchi Israˈilawacha nechandǝ kǝɗ weˈtǝ inabi yi wira, nan nat paˈpa kaˈan mǝɗi Farta kǝ ngǝrtǝ ngǝrandǝ njarchaˈan tǝɗi chathlandǝ fee kaɗi ǝ ɗǝf tǝɗiya thla nech kǝ fǝlan.

25 Wanmanchina, yahǝnchis kǝ sǝnwun wuɓtǝ ndiktǝɗiya, kǝthlǝm nan ˈyatowun saktǝ ndat wa ɗathliyowun nggǝ sǝrtaˈan suwa. Kwaˈkwa tǝ indi nafchi Israˈilawecha ngga kǝ pori wa, paɗ nan ɗǝt kǝ pangnga har kǝ fartǝɗi naa tertǝ fee nawakchi kǝ Yahudawecha kǝmchis kǝ ɓaanda kǝmɗi Farta kǝ tǝrndǝha ǝ ndiiɗi. 26 Tǝ mbanɗiya nafe hǝraˈandǝ nat nafchi Israˈilawecha. Kǝɗ ǝnɗi yarandǝ fee ha ndat wa,

"Thlǝ hǝraˈta nechan ɓat thlaˈtǝ Sihiyona.

nan mbǝhandǝ nat kumi para Farta kaɗi ǝ hur wanɗǝkaɗati wanchi Yakubu."

27 Ə ɗǝf miiɗi chiti tǝ tandiya tǝ khunnata,

fartǝɗi nati tǝrandi ɓǝɓǝfatˈyandǝ kaɗi.

28 Kǝthlǝm karndǝ kwastǝ ndikta, chok kǝ Yahudawecha kǝ fǝ atǝkrekǝti Farta kǝthlǝm ngun. Paɗ kǝthlǝm tatǝɗi chit Farta, chok ndǝ kǝ shikechaˈan kǝthlǝm kaakech nanda. 29 Nakan pafǝn kǝti Farta tǝ ˈyatˈyan chokndǝ kǝɗ ǝnɗi natnda. Nga ichiɗi naa Farta tam malanda wa. 30 Choh ngun tǝɗi nawakchi kǝ Yahudawecha ngun fǝ kumi fǝr manda kǝmɗi Farta, paɗ nakanya mbǝswun chok tǝ kǝ fee haɗanchi Farta fa tǝmɗi kumi fǝr mandi Yahudawecha. 31 Kǝɗu paɗ nakanya Yahudawecha fǝr wandǝ manda kǝmɗi Farta wa. Thleya paɗ nakanya naa Farta haɗandatfa kǝɗ thla haɗandǝwunfǝyu. 32 Kǝthlǝm ngǝran Farta chika wun nefa kǝ mafata yi kumi fǝr manda, kǝthlǝm kǝ haɗanchi chika wunfǝ nat.

33 Hwengǝkǝti kaɗati Farta, tǝ sǝn ǝnˈyan, tǝ langǝ kǝtˈyan, sǝrtaˈan suwa. Chakmiɗi naa Farta

chandǝ nafcha hwenga,

nefsi nech mbahǝn sǝn mbanchiyan wa.

34 Wun tamchi sǝn enɗi nech hur wanɗikaɗati Farta?

Ndu thlǝ sakanchan ǝn ha tǝndi?

35 Wun tamchǝ fǝran pafǝn Farta,

kǝ chok nwaat kǝ tiyan fee?

36 Chǝk mii nat mǝthlan tǝncha. Chǝk mii nat chechan tǝmɗiyan. Ə mǝɗiyan nafe mbǝs chikamǝ.

Chika mǝ nat yaˈan. Maanda kǝn kǝ yaˈan kǝ kweˈkǝchi. Kǝ chok kǝɗu.